உன்னதமான உயர்ந்த மனிதர்கள் நம்மிடையே வாழ்வது - பகல் கனவா அல்லது நிஜமாகும் சாத்தியமா?

கேள்வியாளர்: சத்குரு, இங்கே இருப்பவர்களின் உடல்களுக்குள் மேன்மையான உயிர்களை தரவிறக்கம் செய்வது குறித்து நீங்கள் பேசியதாக நான் கேள்விப்பட்டேன். அதன் பொருள் என்ன என்பதை உங்களால் விளக்கமுடியுமா?

சத்குரு: தற்போது, நாங்கள் யோகா கற்றுக்கொடுத்து, ஒரு கட்டமைக்கப்பட்ட முறையில் மற்ற நிகழ்வுகளையும் நடத்திவருகிறோம், ஆனால் முற்றிலும் வித்தியாசமான தளத்தில் இயங்கக்கூடிய மற்ற விஷயங்களையும் எங்களால் செய்யமுடியும். சில சமூகப் பொறுப்புகளை நாம் ஏற்றுக்கொண்ட காரணத்தால், சிறிது காலத்துக்கு அவற்றை நாம் ஒத்திவைத்துள்ளோம். எனது பயணங்களை கூடுமான அளவு குறைத்துக்கொண்டு, வேறொன்றை ஆரம்பத்திலிருந்து தொடங்கும் எண்ணத்தில் இருக்கிறேன். அப்போது நான், இந்தியாவில் இருக்கும் ஈஷா யோக மையத்தில் எனது நேரத்தின் ஒரு பகுதியையும், அமெரிக்க ஆசிரமத்தில் என் நேரத்தின் ஒரு பகுதியையும் கழிப்பேன், ஆனால் அத்தகைய காலகட்டத்தில் பெரும்பாலும் நான் ஒரே இடத்தில் அமர்ந்திருப்பேன்.  

மேன்மையான உயிர்களை, வாழ்ந்துகொண்டிருக்கும் உயிர்களுக்குள் தரவிறக்கம் செய்வதில் தியாசோஃபிகல் சொஸைட்டியும் பெருமுயற்சியுடன் ஈடுபட்டிருந்தது. குறிப்பிட்ட சில அமானுஷ்யமான சாத்தியங்களை அவர்கள் முயற்சி செய்தனர், ஆனால் அது பிரம்மாண்டமான திட்டமாக இருந்த காரணத்தால் அவர்களது இலக்கை அவர்களால் சாதிக்க இயலவில்லை. பல காலங்கள் கடந்திருந்த, மைத்ரேயன் என்று குறிப்பிடப்பட்ட மிக நுட்பமான ஒரு உயிரை அவர்கள் கீழே எடுத்துகொண்டு வருவதற்கு முயற்சி செய்துகொண்டிருந்தனர். கருத்தியலின்படி, அது சாத்தியம்; ஆனால் நடைமுறையில், அது மிகவும் கடினமாக இருந்தது; ஆகவே அது நிகழாமல் போனது. அதைப்போன்ற எந்த விஷயத்தையும் நாம் நினைத்துக் கொண்டிருக்கவில்லை.