பக்தியின் தாள லயம்:

மேடையின் ஓரத்தில் மின்னும் திறன்

துவக்கத்தில், ஈஷா சம்ஸ்கிருதி வழங்கும் அனைத்து பாடங்களையும் பயின்ற அஷ்வின், பிறகு மிருதங்கத்தில் சிறப்பு கவனம் செலுத்தத் துவங்குகிறார். ஏதேனும் ஒரு கலை வடிவத்தில் ஒருவர் தனிச்சிறப்பான இடத்தை அடைகிறார் என்றால், அவரிடம் இயற்கையாகவே இருக்கும் திறமை என்பது துவக்கப் புள்ளி மட்டுமே. அஷ்வின் தொடர்ந்து பேசுகையில், "நான் பல நுணுக்கமான விஷயங்களை கவனமாக கற்றுக்கொள்ள வேண்டியிருந்தது. ஏனெனில், இது தனியாக 'டிரம்ஸ்' வாசிப்பது போன்றதில்லை, மிருதங்கத்திற்கு என்று ஒருவித வடிவமும் அணுகுமுறையும் தேவையாக இருக்கிறது." பெரும்பாலான கலைஞர்கள் மேடையில் நடுநாயகமாகவும், புகழ் வெளிச்சத்திலும் திகழ விரும்புக்கூடும். இங்கே அஷ்வினின் பங்களிப்பு என்பது மிக மென்மையான இயல்புடையது. இந்திய பாரம்பரிய இசை நிகழ்ச்சி எதுவாக இருந்தாலும், மிருதங்கம் இன்றி அது முழுமை அடையாது. இவர் மற்ற இசைக்கலைஞர்கள் மற்றும் நடன கலைஞர்களுடன் இணைந்து பயிற்சி செய்ய வேண்டியதாக இருந்தது. ஏனெனில் இசையும் நடனமும் இயைந்து ஒருங்கிணைந்த ஒரு அனுபவத்தை பார்வையாளர்களுக்கு வழங்க வேண்டும்.

மேடையில் ஓரமாக இருப்பதில் அதற்கேயுரிய சவால்கள் இருக்கவே செய்கின்றன. ஒருவர் மிக வேகமாக சூழ்நிலையை புரிந்துகொண்டு, எளிதாக அதற்கேற்ப நடப்பவராக இருக்க வேண்டும். "என்னைப் பொறுத்தவரையில், ஒரு நடனத்திற்கு பக்கவாத்தியமாக வாசிப்பதையே மிக சவாலானதாக கருதுகிறேன்" என நேர்மையாக பகிர்ந்துகொள்ளும் அஷ்வின் அதற்கான காரணத்தை விளக்குகிறார், "ஏனெனில் உங்கள் சொந்த இசைத் திறனை காட்ட நீங்கள் அங்கு இல்லை. நீங்கள் ஒரு கலைஞருக்கு பக்கபலமாக இருக்கிறீர்கள். அதேநேரத்தில், மிருதங்கத்தின் அழகையும் வெளிக்கொண்டு வருகிறீர்கள். தன் இசைக்கருவியின் மீது தீரா அன்பும், தன் துறையில் ஆழமான ஈடுபாடும் கொண்டு, தன் சக கலைஞர்களுடன் அமர்ந்து, இசை கோர்ப்பின் தன்மை மற்றும் நடன கலைஞர்கள் வெளிப்படுத்தும் உணர்ச்சிகளுக்கேற்ப தன் வாத்திய இசையை வெளிப்படுத்த முனையும் அஷ்வின், "இசையும் நடனமும் எப்போதும் பொருத்தமாக இருக்க வேண்டும்" என்கிறார் புன்னகையுடன்.

பாரம்பரிய கலைகளை உயிர்ப்புடன் பரிமாற

"முன்பு மிருதங்கத்தின் உடல் பகுதி மண்ணால் செய்யப்பட்டு வந்தது. மக்களின் வாழ்க்கை முறை மாறுதலுக்கு உட்பட்டதைப் போலவே, மிருதங்கத்தையும் மரத்தால் உருவாக்கத் துவங்கினர். இன்று மீண்டும் காலமாற்றம் காரணமாக புதிய தளங்களில் மிருதங்க இசை தடம் பதிக்க துவங்கியிருக்கிறது. இந்த முறை, எப்படி இசை பரிமாறப்படுகிறது என்பதில் புதுமை புகுந்திருக்கிறது. பெரும்பாலான மக்களை எளிதாக சென்றடைய, ஆன்லைனிலேயே கற்றுக்கொள்ளும் வாய்ப்பு பிறந்திருக்கிறது. புராஜெக்ட் சம்ஸ்கிருதியின் இசை பிரிவில் ஆன்லைன் வகுப்புகளை உருவாக்க உதவியுள்ளதன் மூலம் இந்திய பாரம்பரிய இசை உலகின் மூலை முடுக்கெல்லாம் எட்டுவதற்கு உறுதுணையாக இருக்கிறார் அஷ்வின்.

"மக்கள் நேரலையில் கலந்துகொள்ளும் போது அவர்கள் உள்வாங்கும் தன்மை வேறு இயல்பில் இருக்கும் என்பதால் நாங்கள் என்ன வெளிப்படுத்துகிறோம் என்பதிலும், எப்படி வெளிப்படுத்துகிறோம் என்பதிலும் இன்னும் கவனமாக இருக்க வேண்டியிருக்கிறது." தங்களது கலை வடிவத்தில் ஈஷா சம்ஸ்கிருதி மாணவர்கள் மற்றும் முன்னாள் மாணவர்கள் கொண்டுள்ள திறனும், அவர்கள் ஈடுபடும் எந்த செயலிலும் காட்டும் பக்தியும் இந்த புதிய தளத்தில் கலை வடிவங்களின் தூய்மை மற்றும் நேர்மையைப் பராமரிக்க அனுமதிக்கிறது.

கற்றுத்தரும் அணுகுமுறை மாறுகிறதே தவிர, உள்ளடக்கம் என்பது பழங்காலம் தொட்டே அப்படியே இருக்கிறது. "தங்களை அந்தளவு ஈடுபடுத்திக்கொள்ள நேரம் கிடைக்காத மக்களுக்கென்று நாம் சிலவற்றை வழங்க முடியும். பாரம்பரிய கலை வடிவத்தை பாதுகாப்பதற்கான ஒரே வழி, அவர்களுக்கு நாம் என்ன கற்றுத்தர முடியும் என்பதிலும், அதிலிருந்து அவர்களால் எவற்றை உள்வாங்க முடிகிறது என்பதிலும் மட்டுமே இருக்கிறது. இந்த கலை வடிவங்கள் மறைந்து போகக்கூடாது என்பதற்காக, இந்த கலை வடிவங்களில் பொதிந்துள்ள அழகை மக்கள் பார்ப்பதற்கு நாம் முயற்சி செய்கிறோம்" என நம்பிக்கையுடன் நிறைவு செய்கிறார் அஷ்வின்.