குரு பௌர்ணமி - இந்த நாளை மிக குறிப்பிடத்தக்க ஒன்றாக மாற்றுவது எது?

"எனக்கு என்ன கிடைக்கும்?" என்பதை தவிருங்கள்

கடந்த சில ஆண்டுகளில், நான் மக்களை மூன்று ஆயுள்காலத்திற்கான வேலையை செய்ய வைத்திருக்கிறேன். அவர்கள் மேலும் உழைக்க உழைக்க, அவர்கள் இன்னும் அதிக திறமையான, அற்புதமான மனிதர்களாக மாறிவிட்டனர். இங்கும் உலகெங்கும் பல விஷயங்கள் நடந்தேறியுள்ளது. கடந்தகாலத்தின் குருமார்களை நான் வணங்குவதைப் போலவே இதை நிகழச்செய்த ஒவ்வொரு தன்னார்வத் தொண்டரையும் நான் வணங்குகிறேன். மனிதர்கள் தங்கள் மனதில் இருந்து, "எனக்கு என்ன கிடைக்கும்?" எனும் கேன்சர் போன்ற ஒரேயொரு எண்ணத்தை மட்டும் எடுத்துவிட்டால், அதுவே அற்புதமான ஒரு உலகை உருவாக்கும். ஈஷாவைக் குறித்த மிக அற்புதமான விஷயம் இது தான் - "எனக்கு என்ன கிடைக்கும்?" என்ற எண்ணம் இல்லாத மனிதர்களின் நடுவில் தொடர்ந்து இருக்க முடிவது. இதுவே தங்கள் வாழ்நாளின் கடைசி தினம் என்ற ரீதியில் தான் அவர்கள் அனைத்தையும் அணுகுகிறார்கள்.

மலையே கோவில்

மேலும் இங்கிருக்கும் இந்த பிரமாண்டமான மலைகள் இயற்கை சார்ந்து மட்டும் பிரமாண்டமாக இல்லை. என் குரு இந்த மலையை தன் கடைசி வசிப்பிடமாக தேர்வு செய்திருந்தார். எனவே எனக்கு இந்த மலை கல்லால் மண்ணால் ஆன ஒரு குன்று அல்ல - நான் எப்போதும் இந்த மலையை ஒரு கோவிலாகவே பார்த்திருக்கிறேன். நான் எல்லா இடங்களுக்கும் பயணித்துள்ளேன், ஆனால் என் மனதில், இதைவிட மிக அழகான ஒரு இடத்தை நான் கண்டதில்லை.

சத்குருவின் இருப்பை உணருங்கள்‍

நாம் குறிப்பிடத்தக்க அளவிலான சக்தியை இங்கே முதலீடு செய்துள்ளோம். நீங்கள் சிறிது விருப்பத்தோடு இங்கு வந்தால், நீங்கள் யாராக இருந்தாலும் உங்களுக்குள் ஒரு அதிர்வை உருவாக்க நம்மால் முடியும். நீங்கள் விருப்பத்தோடு வரவில்லையென்றாலும், உங்களை தேவையானபடி செதுக்க நாம் சித்தமாக உள்ளோம். நீங்கள் ஒரு கல்லைப் போல இருந்தாலும் சரி, குறிப்பிட்ட சக்தி குவிப்பு இருக்கும் வகையில் ஒரு நாளில் குறிப்பிட்ட நேரத்தை நாம் வகுத்துள்ளோம். குறிப்பாக நீங்கள் தீட்சை பெற்றிருந்தால். அது மிக சக்தி வாய்ந்ததாக இருக்கும்.

நீங்கள் எங்கு இருந்தாலும் சரி, சில வகையான எண்ணம், உணர்வு அல்லது உருவம் மூலம் இந்த இடத்தோடு நீங்கள் தொடர்பில் வந்தால் அந்த குறிப்பிட்ட கால நேரம் ஒரு சக்தி வாய்ந்த இருப்பாக உங்களுக்கு வேலை செய்யும். நாம் குறிப்பிட்ட பரிமாணத்தில் சக்தியை பதித்துள்ளோம். அதன்படி, நீங்கள் எந்த நேர மண்டலத்தில் இருந்தாலும், உங்கள் உள்ளூர் நேரப்படி 6:20ல் இருந்து 6:40 மணிக்குள் அந்த சக்தியின் இருப்பை உணரக்கூடிய வகையில் நீங்கள் இருப்பீர்கள் - காலை, மாலை இரண்டு நேரங்களிலும். இந்த உலகில் உள்ள ஒவ்வொரு மனிதரும் தங்கள் சுய மாற்றத்துக்கான கருவிகளைக் கொண்டிருக்க வேண்டும், அதை அவர்கள் உபயோகிக்க வேண்டும் என்று நான் விரும்புகிறேன். மனிதரின் வாழ்வை மாற்றும் இந்த தொழில்நுட்பங்கள் ஒவ்வொருவருக்கும் கிடைக்கச் செய்யவேண்டும்.

ஒவ்வொருவரையும் சத்குருவாக பாருங்கள்

சத்குருவின் மீது நான் அளவற்ற அன்போடு இருக்கிறேன் என்று உரிமை கோரும் ஒவ்வொருவரும், இந்த குரு பௌர்ணமியில் தொடங்கி, உங்கள் பார்வை படும் அனைத்தையும் சத்குருவாக பார்க்க, நடத்த வேண்டும் என்று நான் விரும்புகிறேன் - ஆண், பெண், குழந்தை, விலங்கு, மரம் மற்றும் அசைவற்ற பொருட்கள் என எதுவாக இருந்தாலும். இந்த ஒரு விஷயத்தை மட்டும் நீங்கள் செய்யுங்கள். உங்கள் வாழ்க்கையின் எஞ்சிய  மற்ற விஷயங்களை - உங்களின் விதி மற்றும் முக்தி- அனைத்தையும் நான் பார்த்துக் கொள்கிறேன்.