நகைச்சுவையில் இருந்து நிலத்திற்கு... - ஒரு நடிகர் ஏன் இயற்கை விவசாயத்தை தேர்ந்தெடுத்தார்

அதிர்ச்சியான உண்மை - மகத்தான நதி வற்றிப் போனபோது

ராஜேஷ் குமார்: ஒரு நடிகனாகவும் நகைச்சுவையாளனுமான எனக்கு மேடைகளில் நிகழ்ச்சிகளை வழங்குவது பயம் அளிப்பதில்லை; உண்மையில் அவை என்னை உற்சாகப்படுத்தும். செப்டம்பர், 2017-இல் நதிகளை மீட்போம் இயக்கத்துக்காக நடைபெற்ற பொது நிகழ்ச்சிகளில் நிகழ்ச்சி தொகுப்பாளராக பங்கேற்கும் வாய்ப்பு எனக்கு வழங்கப்பட்ட போது நான் மிக உற்சாகம் அடைந்தேன். மூன்று பொது நிகழ்ச்சிகளை தொகுத்து வழங்கிய பின்னர், நான் எனது சொந்த ஊரான பீகாரில் உள்ள பர்மாவுக்கு பயணம் செய்தேன்.

என் வீட்டுக்கு அருகாமையில் இருந்த ஒரு வறண்டு போன நிலப்பகுதியில் நான் நின்றிருந்தேன். அங்குதான் பத்து வருடங்களுக்கு முன்னர் வரையிலும் ஃபால்கு நதி தன் முழு மகிமையோடு பாய்ந்து கொண்டிருந்தது. அந்த நதியின் கரைகளில், அங்கு வளர்ந்திருந்த அடர்ந்த வனப்பான பசுமை நிறைந்த பகுதிகளில் நான் வாழ்ந்த நாட்கள் இன்னும் எனக்கு பசுமையாக  நினைவில் உள்ளது. ஆனால் கடந்த பத்து வருடங்களுக்குள்ளாக இந்த மகத்தான, வற்றாத ஜீவநதி முற்றிலுமாக வற்றி, இந்த நிலப்பரப்பே தாகத்திலும், வறண்டும் காட்சியளிக்கின்றது.

துன்பகரமான இந்த காட்சியனுபவம் எனக்குள் ஏதோ ஒன்றை உலுக்கியது. சத்குருவின் வார்த்தைகள் என் மனதில் எதிரொலித்துக் கொண்டே இருந்தன, "உங்கள் மனதை நீங்கள் தீர்மானிக்க வேண்டும் - தீர்வின் பாகமாக இருப்பீர்களா அல்லது பிரச்சனையின் பாகமாக இருக்கப் போகிறீர்களா?" அது என்னை சிந்திக்க வைத்தது. "அரசாங்கத்தையோ சமூகத்தையோ குறை சொல்வதில் என்ன பலன்? அல்லது தீர்வுகளைப் பற்றி வெறுமனே விவாதித்துக் கொண்டிருப்பதில் என்ன பலன்?" உடனடியாக நான் என் மனதில் ஒரு தீர்மானம் மேற்கொண்டேன், தீர்வின் பக்கம் நின்றேன் - நதிகளை மீட்போம் இயக்கத்துடன் என்னை இணைத்துக் கொண்டு களம் இறங்கினேன்.

ஒரு நதியை புனரமைப்பது என்பது எளிதில் நடந்துவிடக்கூடிய காரியமல்ல என்று எனக்கு தெரியும். ஒரு ஒட்டுமொத்த தலைமுறையும் உறுதியுடனும், அர்ப்பணிப்புடனும் தொடர்ந்து முயற்சிகள் எடுக்க வேண்டிய தேவையுள்ளது. ஆனால் அதற்கான முதற்படியை யாராவது ஒருவர் எடுக்காவிட்டால், அந்த தீர்வை நோக்கி நாம் முன்னே செல்லமாட்டோம் என்பதும் எனக்கு தெரிந்திருந்தது. அந்த தீர்வு பலனளிக்க பல வருடங்கள், ஏன் சகாப்தங்களைக் கூட எடுக்கக்கூடும்.

அதை சாத்தியமாக்கும் தீர்வுகள் குறித்து நான் ஆராய்ந்து கொண்டிருந்தபோது, சத்குருவின் நுண்ணறிவு மறுபடியும் எனக்கு உதவியது. அதை சாத்தியமாக்கும் தீர்வானது, சுற்றுச்சூழலையும் பொருளாதாரத்தையும் இணைக்கும் விதமாக உருவாக்கினால் தான் பலனளிக்கும் என்று அவர் பலமுறை கூறியிருந்தது என் நினைவுக்கு வந்தது. அவ்வாறு செய்யாவிட்டால் பொருளாதார நோக்கம் சுற்றுச்சூழலை எளிதாக வெற்றி பெற்றுவிடும். இதுவே என்னை மேரா பேமிலி ஃபார்மர் (என் குடும்ப விவசாயி) என்ற முன்னெடுப்பை மேற்கொள்ள செய்தது.