ஒரு திடமான குணநலனைக் கட்டமைப்பது: இது செய்வதற்கு உகந்த ஒரு முதலீடுதானா?

நவீன வாழ்க்கையின் போக்கில் பயணிப்பது

சத்குரு: நம்மையே நாம் மேலோட்டமாகப் பார்த்தால், மிகச்சரியாக ஒரே விஷயங்களை விரும்பும் இரண்டு மனிதர்கள் இல்லை என்பது புரியும். ஏன் ஒரு நபரின் விருப்பமும், மற்றொரு நபரின் விருப்பமும் முற்றிலும் வித்தியாசமாக இருக்கிறது? அதற்குக் காரணம், நமக்கு வெளிப்பட்ட விஷயங்கள் மற்றும் பழக்கப்படுத்துதல். பெரும்பாலான வடிவமைத்தலும் தன்னுணர்வு இல்லாமல்தான் நிகழ்கிறது. இந்த விதமான தாக்கத்தினை உங்கள் மீது ஏற்படுத்துவது யார்?

பெற்றோர்கள் எல்லா விதமான முயற்சியும் செய்தனர். ஆனால் கடந்த 20-25 வருட காலங்களில் பெற்றோரின் தாக்கம் வெகுவாகக் குறைந்துகொண்டுள்ளது. பாட்டிமார்கள் பெரும் தாக்கத்தினை ஏற்படுத்திய காலம் ஒன்று இருந்தது. இப்போது தங்கள் பாட்டிமார்களை யார் கேட்கின்றனர்? அவர்கள் கூகுளை ஆலோசனை கேட்கின்றனர். ஆகவே, உங்கள் மீது பெருமளவு கவனம் செலுத்தும் நெருக்கமான மக்கள், அவர்கள் சரியாக இருந்தாலும் அல்லது தவறாக இருந்தாலும், அவர்களின் தாக்கம் குறைந்துகொண்டுள்ளது.

இன்றைக்கு குழந்தைகள் மீது, அது வீதியாக இருந்தாலும், இணையதளமாக இருந்தாலும், பள்ளிக்கூடமாக இருந்தாலும் அல்லது அவர்கள் எங்கு சென்றாலும், அவர்களுக்குத் தெரியாத மற்றவர்களால் தாக்கம் ஏற்படுத்தப்படுகிறது. இந்த மாபெரும் மாற்றத்தை நாம் கவனமுடனும், பொறுப்புடனும் கையாளவில்லையென்றால், அது ஒரு பேரழிவாக இருக்கக்கூடும். ஏனென்றால், உங்கள் மீது நியாயமான அக்கறை இல்லாத மக்கள் உங்களை வார்த்தெடுக்க முயற்சிக்கின்றனர்.

குணச்சித்திரமா, கேலிச்சித்திரமா விவேகமானவரா?

நீங்கள் நியாயமாக எந்த மனிதரைக் கேட்டாலும், அவர்கள் உயர்ந்த நிலையிலான இனிமையை விரும்புகின்றனர். உங்களுக்கு நான்கு அம்சங்கள் உள்ளன – உடல், மனம், உணர்ச்சிகள் மற்றும் சக்திநிலைகள். இந்த நான்கு அம்சங்களும் இனிமையாக இருக்கவேண்டும். உடல் இனிமை அடைந்தால், நாம் அதனை ஆரோக்கியம் என்று அழைக்கிறோம்; அது மிகவும் இனிமையானால், அதனை நாம் இன்பம் என்று அழைக்கிறோம். மனம் இனிமை அடைந்தால், நாம் அதனை அமைதி என்று அழைக்கிறோம்; அது மிகவும் இனிமையானால், அதனை ஆனந்தம் என்று அழைக்கிறோம்.

உங்களுடைய உணர்ச்சிகள் இனிமையானால், அதனை அன்பு என்றும், உணர்ச்சிகள் மிகவும் இனிமையானால், நாம் அதனை கருணை என்றும் அழைக்கிறோம். உங்கள் சக்திநிலைகள் இனிமையானால், அதனை பேரின்பம் என்று அழைக்கிறோம்; அவை மிகவும் இனிமையானால், நாம் அதனை பரவசம் என்று அழைக்கிறோம். உங்களைச் சுற்றிலும் இனிமையை உருவாக்குவது என்பது பல்வேறு மக்களையும், விஷயங்களையும் சார்ந்தது, ஆனால் உடல், மனம், உணர்ச்சி மற்றும் சக்தியின் இனிமைக்கு நூறு சதவிகிதம் நீங்கள்தான் பொறுப்பு.

ஒரு குணத்தைக் கட்டமைக்க முயற்சிக்க வேண்டாம். நீங்கள் வலிமையான ஒரு குணம் கொண்டவரானால், பிறகு கேலிச்சித்திரமாக ஆகிவிடுவீர்கள். நீங்கள் குழந்தையாக இருந்தபோது, உங்களுக்கு அருகில் அசைக்கமுடியாத ஒரு குணத்துடன் இருந்த ஒருவரை நீங்கள் ஒரு கேலிச்சித்திரமாகவோ அல்லது ஒரு விசித்திரமான படைப்பாகவோதான் நினைத்தீர்கள். அவர்கள் ஒரு வித்தியாசமான வளர்ச்சி நிலையில் இருந்தனர். யாராவது அப்படிப்பட்ட அசைக்கமுடியாத குணத்தை வெளிக்காட்டும்போது, அந்த முட்டாள்தனத்தை ஒருவராலும் தாங்கிக்கொள்ள முடியாது.

உயிர் - அனைத்து குணச்சித்திரங்களுக்கும் இயக்குனர்

உங்களது இயல்பிலேயே நீங்கள் ஆனந்தம் நிரம்பியவராக இருக்கும்போது, உங்கள் வாழ்க்கையில் நீங்கள் ஒரு தடையாக இருப்பதில்லை; நீங்கள் ஒருபோதும் பிரச்சனையாக இருப்பதில்லை. இந்த ஒரு விஷயம் நிச்சயம் செய்யப்பட வேண்டும்: அதாவது உங்கள் வாழ்க்கையில் நீங்கள் பிரச்சனையாக இருக்கக்கூடாது. ஆயிரக்கணக்கான மற்ற பிரச்சனைகள் உள்ளன. உங்களுக்கு அதிகமான பிரச்சனைகள் ஏற்பட்டால், அது மேலானது. ஏனென்றால் உங்களுக்கு நிறைய பிரச்சனைகள் ஏற்படுகின்றன என்றால், நீங்கள் உலகத்தில் நன்றாக செயல்படுகிறீர்கள் என்று அர்த்தம். உங்களுக்கு பிரச்சனைகளே இல்லை என்றால், ஒருவேளை நீங்கள் உறங்கிக்கொண்டிருக்கலாம். ஆனால் நீங்கள் அழுத்தம் நிரம்பியவராக, இறுக்கமானவராக, துன்பம் அல்லது கோபம் கொள்ளும் அந்தக் கணமே, நீங்கள் பிரச்சனையாகிவிடுகிறீர்கள். இந்த ஒன்றை மட்டும் கவனித்துக் கொள்ளுங்கள்; பிறகு உங்களுக்கென ஒரு குணம் தேவையில்லை - நீங்கள் வாழ்க்கையைப் போலவே இருக்க முடியும். நீங்கள்தான் வாழ்க்கை. வாழ்க்கையே அனைத்து கதாபாத்திரங்களின் இயக்குனர்.

உங்கள் உடல் இப்போது இருப்பதற்கான பரிணாம வளர்ச்சியை அடைந்தது. ஆனால் இந்த மாதிரி நீங்கள் பிறக்கவில்லை. நீங்கள் எதைச் சாப்பிட்டாலும், அது நீங்களாகவே மாறுகிறது, ஏன்? ஏனென்றால், உயிர்சக்தி உங்களுக்குள் துடித்துக்கொண்டிருக்கிறது. சிறிதளவு மரபியல் மற்றும் பரிணாமத்தின் வரையறை இருக்கிறது, ஆனால் மற்றவை, உயிர்சக்தி என்று நீங்கள் அழைக்கும் புத்திசாலித்தனத்தால் செய்யப்படுகிறது. இந்த உயிர்சக்தியை முழு ஆற்றலில் வைத்திருப்பது நீங்கள் செய்யவேண்டிய மிக முக்கியமான விஷயமாக இருக்கிறது. மற்றபடி, குணநலன்களைக் கட்டமைக்காதீர்கள்.