சத்குருவின் புகைப்படத்தை உங்களுடன் வைத்திருப்பதால் நிகழும் உண்மையான தாக்கம் என்ன?

மனித உடல் கொண்டுள்ள அளப்பரிய சாத்தியம்

இதே விதமாக, பொருள்தன்மையான இந்த உடலை தெய்வீக வடிவமாக்க முடியும், ஏனெனில் உடலில் சக்கரங்கள் எப்படி அமைந்துள்ளதோ அப்படிப்பட்ட மனிதர்தான் நீங்கள். உங்களது திறமைகள், குறைகள், போராட்டங்கள் என எல்லாமும் இந்த 114 சக்கரங்களின் மாறுபட்ட விகிதாச்சாரம், பரிணாமம் மற்றும் தீவிரத்தைப் பொறுத்தே அமைகிறது. இந்த சக்கரங்களின் அமைப்பு நீங்கள் எப்படிப்பட்ட மனிதர் என்பதை நிர்ணயிக்கிறது. உங்களுக்கு கற்றுக்கொடுக்கப்பட்டுள்ள எந்தவொரு சாதனாவாக இருந்தாலும், அது இந்த 114 சக்கரங்களையும் ஒருங்கிணைப்பதை நோக்கியே இருக்கிறது. நாம் பொதுவாக ஏழு சக்கரங்களைப் பற்றி பேசினாலும், இந்த ஏழு சக்கரங்கள் மட்டுமே எல்லாமும் ஆவதில்லை. மற்ற சக்கரங்களின் தாக்கமும் உங்களது அன்றாட வாழ்வின் அனைத்து அம்சங்களிலும் வெளிப்படுகின்றன.

எனவே நான் எப்படிப்பட்ட உயிர் என்பதை தவிரவும், எனது உடல் பல வழிகளிலும் மற்றவர்களிடம் இருந்து மாறுபடுகிறது. கிரியா பயிற்சிகள் மற்றும் சக்தியைப் பற்றிய ஆழமான புரிதல் கொண்ட ஒருவரால் இந்த உடல் எந்த விதத்தில் வித்தியாசப்படுகிறது என்பதை அறியமுடியும். இந்த ரூபத்திற்கே ஒரு குறிப்பிட்ட தாக்கம் உள்ளது. இதன் ஒரு அம்சமாக, பார்வை பலன் உண்டு. ஏதோ ஒன்றை பார்ப்பதால் எப்போதுமே ஒரு குறிப்பிட்ட தாக்கம் ஏற்படுகிறது. ஏனெனில் அது பலவற்றையும் உங்களுக்கு நினைவூட்டுகிறது.

ரூபங்களால் பல வழிகளிலும் உங்கள் விழிப்புணர்வின் மீது தங்களை பதித்துக்கொள்ள முடியும். உங்கள் மனவெளியில் மட்டுமின்றி, உங்கள் சக்திகளின் மீதும் அவை தங்களை பதித்துக் கொள்கின்றன. சம்யமா வகுப்பில் பங்கேற்கும் மக்கள் நீண்ட நேர தியானத்தில் ஈடுபட்ட பிறகு தங்கள் கண்களைத் திறந்து என்னைப் பார்க்கும்போது, எனது ரூபம் மிக எளிதாக அவர்களது அமைப்பிற்குள் பதிந்து விடுகிறது. இது நிகழ்ந்த பிறகு, ஒரு புகைப்படம் அந்த மனிதருக்கு மிகப்பெரும் வித்தியாசத்தை ஏற்படுத்தும்.

அப்படியில்லை என்றாலும் கூட, புகைப்படமானது ஒரு சிறு தெய்வம் போலவே செயல்படுகிறது. இது வெறுமே உங்கள் நம்பிக்கை அல்ல. ஒரு புகைப்படத்திற்கு பதிலாக நாம் வேறு ஒரு ரூபத்தை வடிவமைத்து உங்களுக்கு வழங்கினால், அது இன்னும் நல்ல பலன் தரும். ஆனால் ஒரு புகைப்படமே போதுமானது, அதில் பார்வை பலன் மற்றும் மனோரீதியான தாக்கம் உள்ளது.

அதோடு, நாம் வழங்கும் புகைப்படங்கள் உங்களது வழக்கமான உணர்வோடு அவற்றுடன் ஈடுபடுத்திக்கொள்ள முடியாதவாறே உள்ளன. அவை ஒரு மனிதருக்குள் பிடிப்பற்ற தன்மையை உருவாக்குகிறது. அவை உங்கள் தீவிரத்தை மேம்படுத்தும் அதேநேரத்தில், நீங்கள் அங்கேயே தேங்கி நின்று விடவும் அனுமதிப்பதில்லை. இயல்பாக நான் இருக்கும் புகைப்படங்கள் மூலம் என்னை ஒரு சாதாரண மனிதனாக மக்கள் தங்கள் வீடுகளுக்கு எடுத்து செல்லக்கூடாது என்பதற்காகவே ஒரு ரூபமாக, பல விதங்களிலும் புனிதமாக இருக்கும் புகைப்படங்களை வழங்குகிறோம்.