அருளுடன் வாழ்வதற்கும் இறப்பதற்கும் உங்களது உயிர்சக்திகளை இளமையாக வைத்துக்கொள்வது எப்படி

நீங்கள் கம்பீரமாக இறப்பதற்கு வியான பிராணன் திறனளிக்கிறது

உங்களுக்கு கணிசமான வியான பிராணன் இருந்தால், உடலுக்குள் நீங்கள் தளர்வாகிறீர்கள். எது உடல் மற்றும் எது உடல் அல்லாதது, நீங்கள் என்பது என்ன மற்றும் நீங்கள் அல்லாதது என்ன என்று பிரித்து உணர்தல் இருந்துவிட்டால், அப்போது விரும்பும்பொழுது அல்லது அதற்கான நேரம் வரும்போது, உடலை விடுவது அதிக முயற்சியின்றி எளிதாகிவிடும். நிச்சயமாக நன்றாக வாழமுடியும், மற்றும் நன்றாக இறப்பதும் சாத்தியமாக இருக்கும். துரதிருஷ்டவசமாக, நன்றாக வாழும் பலரும், நன்றாக இறப்பதில்லை.

பரமஹம்ச யோகானந்தர் பற்றி கேள்விப்பட்டிருப்பீர்கள். அமெரிக்காவுக்கு சென்று, ஒரு எழுச்சியை உருவாக்கிய முதல் யோகிகளுள் ஒருவராக இருந்தார். சுவாமி விவேகானந்தர் நிலத்தை உழுதார், ஆனால் யோகாவின் விதைகளை ஊன்றியவர் யோகானந்தர் என்றே நான் கூறுவேன். லாஸ் ஏஞ்சல்ஸ்-ல், ஒரு கூட்டத்தில் 1952 மார்ச் 7 ஆம் தேதி, அவர் தனது உடலைவிட்டு நீங்கினார். அவர் தனது மக்களிடம், அவரது உடலை 21 நாட்களுக்கு வைத்திருக்க முடியும் என்றும், அது நன்றாக இருக்கும் என்றும் கூறியிருந்தார். மூன்று வாரங்களுக்கு, எந்த காப்புகள் அல்லது குளிரூட்டுதலும் இல்லாமல், அவரது உடல் சீர்கெடும் அறிகுறிகள் எதுவும் இல்லாமல் இருந்ததாக, பிணவறை இயக்குனர் கூறும் ஒரு சான்றிதழ் இன்றைக்கும் இருக்கிறது. அவரது உடல் மாற்றம் அடையாமல் இருந்தது. இது ஏனென்றால், போதிய வியான பிராணன் இருந்தால், உடலில் அழுகும் தன்மை இருப்பதில்லை.

அதன் பொருள் என்னவென்றால், தற்பொழுது உங்களுக்கு பதினெட்டு வயதாகிறது என்று வைத்துக்கொள்வோம். இப்பொழுது நீங்கள் உங்கள் வியான பிராணனை மேம்படுத்துகிறீர்கள் என்றால், அணுக்களின் அளவில் உங்கள் வயது பதினெட்டிலேயே நிலைத்து நின்றுவிடக்கூடும். நீங்கள் வேறு விதங்களில் மூப்படைவீர்கள், ஆனால் அடிப்படையான சக்திநிலையில் மற்றும் உங்களுக்குள்ளேயே உடல் எப்படி இயங்குகிறது, உணர்கிறது என்பது அதே பதினெட்டு வயதில் நிலைத்துவிடும். இதனால் நீங்கள் அழிவற்றவராக இருப்பதற்கு முயற்சி செய்கிறீர்கள் என்பது அல்ல. அது என்னவென்றால், வாழ்வை ஆழமாக உணர்ந்து, செயல்பாட்டில் பெரும் தாக்கம் ஏற்படுத்தும் வகையில் பயனுள்ள வாழ்க்கை வாழ விரும்புகிறீர்கள்.

உங்களது வியான பிராணன் நன்றாக இல்லையென்றால், உங்கள் வாழ்வின் உணர்தல் ஆழமாக இருக்காது, ஏனென்றால் உங்கள் உடல் ஒரு தடையாக இருந்துவிடும். உணவு, பாலுறவு மற்றும் சிறிய சந்தோஷங்கள் மட்டுமே மக்களை ஒட்டுமொத்த வாழ்க்கையிலும் அவர்களை பிஸியாக வைத்துள்ளது. மிக ஆழமான ஏதோ ஒன்றைச் செய்வதைப் போல உணரக்கூடிய அளவுக்கு, தங்கள் பிழைப்பையே அவர்கள் சிக்கலாக்கிக் கொள்கின்றனர். உங்கள் வாழ்வின் மீது குறைந்த அளவுக்கான தாக்கத்தை ஏற்படுத்தும் உடலை உருவாக்குவது என்றால், உடல் ஒரு தடையாக இல்லை என்பது பொருள். உடல் ஒரு தடையாக இல்லை என்றால், நீங்கள் ஆன்மீகப் பாதையில் இருப்பது மட்டுமல்ல, ஆன்மீகத்தின் நெடுஞ்சாலைப் பயணத்தில் இருக்கிறீர்கள்.