புதிரான விஜி: தங்கள் வாழ்க்கை, விஜியின் தீவிரமான பக்தி, மஹாசமாதி குறித்து சத்குரு

பயணத்தில் பன்னிரண்டு ஆண்டுகள்

திருமணத்திற்குப் பின், முதல் இரண்டு‌ மூன்று வருடங்கள், எங்கள் வாழ்க்கை மோட்டார் சைக்கிளிலேயே கழிந்தது. மோட்டார் சைக்கிளில் ஒரு கூடாரத்தை எடுத்துக்கொள்வோம், சாலையோரங்களில் உறங்குவோம். நாங்கள் பயணத்திலேயே இருந்தோம் – சில நேரம் நோக்கத்துடன், பெரும்பாலான நேரங்கள் எந்த நோக்கமும் இல்லாமல். இந்த சில வருடங்கள் எனக்குள் அதிகமான வித்தியாசத்தை ஏற்படுத்தியதுடன், ஒரு பெரும் அனுபவமாகவும் இருந்தது. நான் எனக்கே உரிய விநோதமான வழிகளில் அதைக் கழித்தேன் – கால் நடையாக நடந்தும், வண்டி ஓட்டியும், எங்காவது வெறுமனே அமர்ந்துகொண்டும் இருந்தேன். குறிப்பிட்ட சாதனா எதையும் நான் செய்யவில்லை. மற்றொரு இரண்டு வருடங்களை நான் தியானம் செய்வதில் கழித்தேன். விஜி வேலைக்குச் சென்று, எனக்கான உணவு, உடை என அனைத்தையும் கவனித்துக்கொண்ட நாட்கள் அவை. அதற்குப் பிறகு, நாங்கள் பல இடங்களுக்கும் செல்வதில் மும்முரமாகிவிட்டோம்.

நாங்கள் இருவரும் வாழ்வில் இணைந்த பிறகு, பன்னிரண்டு வருடங்களுக்கு, நாடோடிகளைப்போல் இடையறாமல் பயணித்துக்கொண்டே இருந்தோம். மக்கள் எங்களிடம் அற்புதமாக இருந்தார்கள். இருப்பினும், ஒரு பெண் என்ற நிலையில், அவளுக்கென்று வீடோ, சமையலோ இல்லை. ஒவ்வொரு நாளும், நாங்கள் வெவ்வேறு நகரத்தில் இருந்தோம். அவள் எனது நிழல்போல இருந்தாள். நான் செல்லுமிடம் எங்கும் அவள் வந்தாள். அவள் யோகா செய்ததே, எனக்கு யோகா முக்கியம் எனும் காரணத்தினால்தான். அவளுடைய ஆரோக்கியத்திற்காகவோ நல்வாழ்விற்காகவோ விஜி யோகா செய்யவில்லை – தனது நல்வாழ்வை அவள் பொருட்படுத்தவே இல்லை. நாள் முழுவதும் அவள் வேலை செய்து கொண்டும், யோகா வகுப்புகளை ஒருங்கிணைக்கவும் உதவினாள்.