கர்மவினையை கரைப்பதற்கான சிறந்த வழி  - விரைவில் கரைக்கத் தொடங்குவதன் பயன்

உங்களுக்குள் இருக்கும் இந்தத் தடைகளை நீங்கள் விலக்கவில்லையென்றால், நீங்கள் எவ்வளவுதான் கடினமாக முயற்சி செய்தாலும், அவைகள் நிகழாது. கர்மவினையைப் புரிந்துகொள்வதற்குப் பல வழிகள் உண்டு. அதனை  நாம் இரண்டு அம்சங்களாகப் பிரிக்கமுடியும்: சஞ்சிதா என்பது, கர்மவினையின் கிடங்கு போன்றது, மற்றும் பிராரப்தா என்பது, தற்போது நிகழ்ந்துகொண்டிருக்கும் பரிவர்த்தனைக்குரிய கர்மவினை போன்றது. அது ஒரு கடை என்பது போல் நீங்கள் நினைத்துக்கொள்ளலாம் – உங்கள் கடையில் தற்போது இருக்கும் இருப்பை நீங்கள் செலவழிக்கவேண்டும்; இல்லையென்றால், அது குளறுபடியாகிவிடும். நீங்கள் ஆன்மீகப் பாதையில் இருப்பதாகக் கூறும்போது, கர்மக்கிடங்கிலிருந்து  அதிகமான இருப்பு வெளிவருவதை உறுதிப்படுத்துவது முக்கியமானது.

ஆகவே, கடையில் உங்களுக்கு அதிகமான இருப்பு இருக்கும் நிலையில், தினசரி அளவில் அதை நீங்கள் விற்பனை செய்யவில்லை என்றால், நீங்கள் மிகமோசமான குளறுபடியும், தவறான நிர்வாகம் செய்ததாகவும் உணர்வீர்கள். இதைத் தவிர்ப்பதற்கு, நீங்கள் சில்லறை விற்பனையைக் குறைத்துக்கொண்டு, கர்மவினையை எரிக்காமல், அமைதியாக வாழமுடியும். கர்மக்கிடங்கின் மதகுக்கதவுகளைத் திறந்துவிட்டால், பெருமளவு இருப்புகள்  திறந்துவிடப்படும். அதன் பிறகு, நீங்கள் உண்மையிலேயே உங்கள் வியாபாரத்தை சந்தைப்படுத்தவேண்டும். எந்த இடைவெளியும் இல்லாமல், 24 மணி நேரங்களுக்கு, நீங்கள் நிறுத்தமில்லாமல் விற்றுக்கொண்டிருக்கவேண்டும். பொதுவாக, சில்லறைக் கடைகள் அளவில் சிறியவை; ஆகவே அங்கே அளவுக்கதிகமான இருப்பு இருந்தால், அது உங்கள் தலை முழுவதும் ஆக்கிரமித்துவிடும்.

கர்ம சம்யமா குறித்த சம்யமா வகுப்பில் பங்கேற்றவர்களுடன் மேற்கொள்ளப்பட்ட ஒரு விரிவான ஆராய்ச்சியும் இருக்கிறது. மூன்று மாத பயிற்சிக்குப் பிறகு, BDNF போன்ற பல்வேறு அம்சங்களை அளவீடு செய்தபோது, பங்கேற்பாளர்கள் அவர்களது செல்லுலார் நிலையில் சராசரியாக 6 ½ ஆண்டுகள் இளமையாக இருந்தது கண்டுபிடிக்கப்பட்டது. இளமையாக இருப்பது என்றால், நீங்கள் அதிக பாரம் சுமக்க முடியும் என்பதுடன் கர்மக்கிடங்கிலிருந்து நாம் அதிகமாகவும் விடுவிக்கமுடியும். கிடங்கிலிருக்கும் இருப்பை நீங்கள் அப்படியே வைத்திருந்தால், நீங்கள் செய்வதெல்லாம் விற்பனையைத் தள்ளிப்போடுவது மட்டுமே. நீங்கள் நல்ல உடல் நிலையில் இருந்து, இந்தத் திசையில் செல்வதற்கான அவசரத்தில் இருக்கும்போது, அதை நீங்கள் தள்ளிப்போடக்கூடாது.

இந்த வாய்ப்பு மீண்டும் வருமா என்பது நமக்குத் தெரியாது. பெரும்பாலான மக்களுக்கு, அவர்கள் இறந்தபிறகு நிகழும் ராம நாம சங்கீர்த்தனம் மட்டும்தான் ஆன்மீகமாக இருக்கிறது. வாழ்வின் இறுதிகட்டத்தில்தான் அது வருவதாக அவர்கள் நம்புகின்றனர். அது ஆரம்பத்தில் வந்துவிட்டால், அதை சாத்தியமாக்குவது சிறந்தது. வாழ்க்கை மிகவும் சிக்கலானதாகவும், தொந்தரவு தருவதுபோலவும் தோன்றினால், அது பரவாயில்லை ஏனென்றால் தொல்லைகளைக் கையாள்வதற்கு நம்மிடம் கருவிகள் உள்ளன. உங்களுக்குள் இருக்கும் எதனையும் நீங்கள் தவிர்க்காமல் இருப்பது முக்கியம்; அவை அனைத்தும் இப்போதே வரட்டும். நீங்கள் ஆரோக்கியமாகவும், நன்றாகவும், திறனுடனும் இருக்கும்போது, எல்லா முட்டாள்தனங்களும் உங்களிடம் வரட்டும்.

இருப்பினும், உங்களுக்கு அற்புதமான ஒரு வாழ்க்கை கிடைத்திருப்பதாக ஒவ்வொருவரும் நம்புகின்றனர். இந்த விஷயங்களையெல்லாம் நீங்கள் செய்யக்கூடாது என்பதில்லை, ஆனால் அந்த அற்புதமான வாழ்க்கையில் உங்களைத்தவிர அனைத்தும் நிகழ்கிறது. ஒட்டுமொத்த நாடகமும் நிகழ்கிறது, ஆனால் நீங்கள் மலர்வதில்லை. “ அற்புதமான வாழ்க்கை” உங்களுக்கு வேண்டுமென்றால், அது பொருளாதாரத்துக்கு நல்லது. ஒரு “அற்புதமான வாழ்க்கை” என்றால், நீங்கள் எப்போதும் எதையாவது வாங்கிக்கொண்டும், மேலும்மேலும் வங்கிக்கடன் பெற்றுக்கொண்டும் இருக்கிறீர்கள், மற்றும் அதனால் பொருளாதாரம் செழித்துக்கொண்டிருக்கிறது.

உங்களுக்கு ஒரு அற்புதமான வாழ்க்கை கிடைத்திருந்தால், அதற்கு அர்த்தம், நீங்கள் அதிகமாகப் பொருட்களை வாங்குகிறீர்கள், மற்றும் உங்கள் பக்கத்து வீட்டுக்காரரைக் காட்டிலும் உங்கள் வீட்டிற்கு அமேசான் விற்பனையாளர் அடிக்கடி வருகிறார் என்பதால், அது பொருளாதாரத்துக்கு நல்லது. பொருளாதாரத்தை மலரச் செய்வதற்கு, நீங்கள் இயன்ற அளவுக்கு கடினமாக உழைக்கவேண்டும். கடின உழைப்பு சௌகரியமான விஷயம் அல்ல, ஆனால் கடினமாக உழைப்பதுதான் ஒரு நட்சத்திரமாகமுடியும். உங்களுக்கு ஒரு அற்புதமான வாழ்க்கை இல்லாமல்போகலாம், ஆனால் நீங்கள் உழைத்தால், உங்களால் ஒரு நட்சத்திரமாகமுடியும், அது நல்லதும்கூட. நீங்கள் ஒரு நட்சத்திரமாகிவிட்டீர்கள் என்றால், வாழ்வில் ஒளியும், தெளிவும் வந்துவிடுகிறது.

படகு பாதியளவு நதியை மட்டுமே கடந்திருந்தபோது, தண்ணீர் உள்ளே கசியத் தொடங்கியது. படகோட்டி கேட்டான், “ ஐயா, உங்களுக்கு எப்படி நீந்துவது என்று தெரியுமா?” அறிஞர் பதிலளித்தார், “ இல்லை, எனக்கு எப்படி நீந்துவது என்று தெரியாது”. அதற்கு படகோட்டி, “ ஐயா, எப்படி நீந்துவது என்று ஒருவேளை நீங்கள் காளிதாசரிடம் ஆலோசனை கேட்க வேண்டியிருக்கலாம்”, என்று கூறிவிட்டு, தண்ணீரில் பாய்ந்து நீந்திச் சென்றுவிட்டான். இப்படித்தான், பிழைப்புக்குக்கூட, அறிவாற்றலைவிட உங்களது உணர்திறன் மிக அதிக முக்கியமானதாக உள்ளது. அறிவாற்றல் உபயோகமானதுதான், ஆனால் அது உங்களை முழுமையடையச் செய்யாது.

உலகத்தை நீங்கள் கவனித்துப்பார்த்தால், துன்பமான, இறுக்கமான, வாட்டமான முகங்களைச் சுமந்திருப்பவர்கள் படித்தவர்களா அல்லது படிக்காதவர்களா? அப்படிப்பட்ட முகங்களுக்குச் சொந்தக்காரர்கள் படித்தவர்களாகத்தான் இருக்கின்றனர், ஏனென்றால் அவர்கள் அறிவாற்றலின் தரிசு நிலங்களாக உள்ளனர். தங்களுக்கு எல்லாமே தெரியும் என்று அவர்கள் எண்ணுகின்றனர், ஆனால் அவர்கள் இந்தக்கணம் சுவாசித்துக்கொண்டிருக்கின்றனரா, இல்லையா என்பதுகூட அவர்களது உணர்வில் இல்லை. துரதிருஷ்டவசமாக, அவர்களது வாழ்வின் பெரும்பாலான நேரங்களில், அவர்கள் சுவாசிக்கின்றனரா, இல்லையா என்பதை பெருவாரியான மக்கள் அறிந்திருக்கவில்லை. அவர்களுக்கு ஆஸ்துமா அல்லது கோவிட் இருக்கும்போது மட்டும்தான் சுவாசிப்பதைக் குறித்து அவர்கள் அறிகின்றனர்.

ஆகவே, உங்கள் சஞ்சித கர்மாவின் பாரத்தை நீங்கள் குறைத்தால், உங்களுக்கு நிகழும் முதல் விஷயம் என்னவென்றால், நீங்கள் அமைதியாக அமர்ந்தகணமே, வெளிப்படையான விஷயங்களாகிய உடலின் சுவாசம், இதயத்துடிப்பு, மற்ற உங்களது உணர்வுகளைப்பற்றி நீங்கள் விழிப்புணர்வு கொள்வீர்கள். இதற்குக் காரணம், நீங்கள் உங்கள் கர்மவினையின் இருப்பைக் (stock) குறைத்துள்ளீர்கள். நீங்கள் வெறுமனே அமர்ந்திருக்கும்போது, குறைந்தபட்சம் நீங்கள் சுவாசித்துக்கொண்டிருப்பது உங்களுக்குத் தெரியவேண்டும்.