கனவுகளைத் துரிதப்படுத்துதல்: கனவு யந்திரத்தை சத்குரு எப்போது, எதற்காக அமைத்தார்

கனவுகள், ஞாபகம் மற்றும் எதார்த்தத்தின் மாயை

உங்கள் மனரீதியான வரம்புக்கு உட்பட்டு நிகழ்கின்ற எந்த விஷயமும் ஒரு கனவுதான். பலருக்கும், எதார்த்தத்தைவிட கனவுகள் அதிக ஆற்றலுடன் இருப்பது எதனாலென்றால் அவர்கள் நிஜமாகவே ஒருபோதும் எதார்த்தத்தைத் தொட்டது கிடையாது. அவர்கள் “வாழ்க்கை” என்று அழைப்பது எதுவோ, அது அவர்களது சிந்தனையில் உணர்வதுதான். ஒட்டுமொத்த பிரபஞ்ச பிரம்மாண்டத்தைவிட, நீங்கள் சிந்திப்பது, உணர்வது அதிக முக்கியமாகிவிட்டது. இவ்வளவு பரந்ததும், புரிந்துகொள்ள முடியாததுமான ஒன்று உங்களை மேம்படுத்த இயலாமல், ஆனால் உங்களது சொந்த உருவாக்கமான ஒரே ஒரு எண்ணம் உங்களை சாய்த்துவிட முடிந்தால், பிறகு இது கனவுதானே? தவிர, இதில் மேலும் மோசமானது என்னவென்றால், இந்தக் கனவுகூட உங்களுடையது இல்லை.

இவை, உங்களது சமூகம் சார்ந்த சூழல்களில் இருந்தும், மரபியல் சார்ந்த விஷயங்களின் வடிவிலும், நீங்கள் கிரகித்த பதிவுகளின் அடிப்படையில் எழுகின்ற நிர்பந்த நிகழ்வுகளாக இருக்கின்றன. மரபியல் சார்ந்தது என்று நான் கூறும்பொழுது, அது உங்கள் பெற்றோரிடமிருந்து வருபவை மட்டுமல்ல - உங்கள் மரபியல் என்பது உங்களது முன்னோர்கள் வரைக்கும் மட்டும் செல்லாமல், அது மேலும் தாண்டி, விலங்கு இயல்புக்குள் செல்கிறது. இன்று, இதனை நாம் அறிவியல்பூர்வமாக அறிகிறோம், ஆனால் ஒருசெல் உயிரியானது பல்வேறு சிக்கலான நுட்பங்களுக்குள் பரிணாமம் அடைந்து, இன்று நாம் மனிதவடிவில் இங்கே அமர்ந்திருக்கிறோம் என்பதை எப்போதும் நாம் அறிந்து வந்துள்ளோம்.

உங்கள் ஆன்மீக சாத்தியத்தை பூதசுத்தி எவ்வாறு மேம்படுத்துகிறது

உங்களது பெற்றோரை, உங்கள் தாத்தா பாட்டியை மற்றும் உங்கள் பாட்டன் பூட்டியை, நீங்கள் அவர்களைப் பார்த்ததில்லை, அவர்களை அறிந்திருக்கவில்லை என்றாலும், உங்களுக்குள் எங்கோ உங்களது உடல், அவர்களை நினைவில் வைத்திருக்கிறது. இந்த ஞாபகம், உங்களின் தற்போதைய புரிதலின் தளங்களுக்கும் அப்பால் செல்கிறது. அது மனித வடிவையும், விலங்கு இயல்பையும் கடந்து, அடிப்படையான மூலக்கூறுகளுக்கு செல்கிறது. இதன் காரணமாகவே, யோகாவில் பூதசுத்தி மிக அடிப்படையான சாதனா வடிவமாக இருக்கிறது. உங்கள் தந்தை, தாய், தாத்தாபாட்டி, முன்னோர்கள், மனிதக்குரங்கு, மற்றும் அந்த ஒருசெல் விலங்கு ஆகிய எல்லா ஞாபகத்திலிருந்தும், பஞ்ச பூதங்களையும் நீங்கள் தூய்மைப்படுத்துகிறீர்கள். இந்த ஞாபகத்தை நீங்கள் அழித்துவிட்டால், பிறகு நீங்கள் யாரோ ஒருவருக்கு ஏதோ ஒன்றாக இல்லாமல், உங்களுக்கே உரித்தான சாத்தியமாக இருக்கிறீர்கள்.