ஆரோக்கியமற்ற எதிர்பார்ப்புகளின் சூழலும் அதன் மூலக்காரணமும்
எதிர்பார்ப்பு இல்லையென்றால், நோக்கம் இல்லை என்று அர்த்தமல்ல. ஆனால், “நான் விரும்பியது எனக்குக் கிடைக்கவில்லை. எனக்கு வேண்டியது நிகழவில்லை”, என்று நீங்கள் கணக்குப் போடுவதில்லை. ஒரு குறிப்பிட்ட திசையில் செல்ல விரும்புகிறீர்கள், ஆனால் எவ்வளவு தூரம் நீங்கள் செல்வீர்கள் என்பது உங்களிடம் எவ்வளவு எரிபொருள் உள்ளது என்பதைப் பொறுத்துள்ளது. மேலும் உங்களுக்கு எதிர்பார்ப்புகள் இருந்தால், உங்கள் வாகனத்தின் எஞ்சினை முறுக்கேற்றுவதிலேயே எப்போதும் உங்கள் எரிபொருளை வீணாக்கிக்கொண்டு இருப்பதுடன், நீங்கள் வெகுதொலைவிற்கு செல்லவும் மாட்டீர்கள்.
உங்களைச் சுற்றிலும் பல எதிர்பார்ப்புகள் உள்ளன, ஏனென்றால் உங்களது குழந்தைப் பருவத்திலிருந்தே, “நீ என்னவாகப் போகிறாய்? நீ ஒரு மருத்துவராக வருவாயா அல்லது தகவல் தொழில்நுட்பப் பொறியாளராக வருவாயா?” என்று சுற்றிலும் இருப்பவர்கள் கேட்டுக்கொண்டே உள்ளனர். தங்களது குழந்தைகள் குறித்து பெற்றோர்களுக்கு இருக்கும் எதிர்பார்ப்புகள் பெரும்பாலும் நிஜமற்றதாகவும், முட்டாள்தனமாகவும் உள்ளது. அது அவர்களுக்கும் நல்லதில்லை, குழுந்தைகளுக்கும் நல்லதில்லை. குழந்தைப் பருவத்திலிருந்தே, அதே நடைமுறையை நீங்கள் பழக்கப்படுத்துகிறீர்கள்.
உங்களது எதிர்பார்ப்புகளுக்கு உங்கள் மீது ஏன் அவ்வளவு பலமான பிடிமானம் இருக்கிறது என்றால், “இது, இது, இது மட்டும் நிகழ்ந்துவிட்டால், நான் மகிழ்ச்சியாக இருப்பேன்,” என்று நீங்கள் நினைக்கிறீர்கள். எப்பொழுதும் நீங்கள், மகிழ்ச்சி என்பது நாளை குறித்தது, இன்றைய விஷயம் அல்ல என்று நினைக்கிறீர்கள். நீங்கள் விரும்பும் விஷயங்கள் உங்களிடமிருந்து ஒவ்வொரு நாளும் சிறிது விலகினால், உங்களுடைய எதிர்பார்ப்பு மேலும் மேலும் வலிமையடைகிறது, நீங்கள் மேலும் மேலும் துன்பப்படுகிறீர்கள்.
எல்லாவற்றையும் மாற்றும் ஒரு அணுகுமுறை
இப்போது, நீங்கள் நிஜமாகவே பரவசத்தில் இருக்கிறீர்கள், ஆனால் ஒரு குறிப்பிட்ட விஷயம் நிகழவேண்டும் என்று விரும்புகிறீர்கள். அதனை நீங்கள் பின்தொடர்ந்துகொண்டு இருக்கிறீர்கள், ஆனால் நாளைக்கே, உங்களுக்கு விருப்பமானதை நெருங்குவதற்கு பதில், அது மேலும் உங்களைவிட்டு விலகிச் செல்கிறது என்று வைத்துக்கொள்வோம். இருப்பினும் நீங்கள் ஆனந்தமாக இருக்கும் காரணத்தால், அது பெரிய அளவில் துன்பத்தை உருவாக்காது.
உங்களுக்குள் என்ன நிகழ்கிறது என்பது மற்றவரால் அல்லாமல், உங்களால் முடிவு செய்யப்படுவதை முதலில் நிலைநிறுத்துங்கள்.
ஆகவே, உங்களை நிலைநிறுத்திக்கொள்ளாமல், உலகத்தில் விஷயங்களைச் செய்வதற்கு நீங்கள் முயற்சிக்கிறீர்கள். இதனை முன்னரே கிருஷ்ணன் கூறியுள்ளான், “யோகஸ்தஹ குருகர்மானி.” அதாவது, முதலில் உங்களை யோகத்தில் நிலைப்படுத்துங்கள்; பிறகு செயலாற்றுங்கள். ஆனால், நீங்கள் ஒரு குளறுபடியான நிலையில் செயல்படத்தொடங்கி, இப்போது யோகாவின் பக்கம் திரும்புகிறீர்கள். உங்களிடம் இருந்து, மற்றவர்களிடம் இருந்து, உலகத்திடம் இருந்து என்ன வேண்டும் என்று விரும்புகிறீர்களோ அவற்றை மறந்துவிடுங்கள். உங்களுக்குள் என்ன நிகழ்கிறது என்பது மற்றவரால் அல்லாமல், உங்களால் முடிவு செய்யப்படுவதை முதலில் நிலைநிறுத்துங்கள். இந்த ஒரு விஷயத்தை மட்டும் நீங்கள் செய்துவிட்டால், இயல்பாகவே, நீங்கள் இனிமையாக இருப்பதைத்தான் விரும்பித் தேர்வு செய்வீர்கள்.
நீங்கள் மிகவும் இனிமையாக இருக்கும்போது, உங்களது சிந்தனை மாறுகிறது: “இன்னமும் 10,000 விஷயங்கள் என் வாழ்க்கையில் நிகழாமல் இருக்கிறது - அதனால் என்ன? ஆனந்தமான உற்சாகத்துடன், நான் அதைத் தேடிச்செல்வேன் என்பதுடன் அந்த எதிர்பார்ப்புகள் நிறைவேறும் வாய்ப்புகள் இப்போது மேலும் அதிகமாக உள்ளது. அவைகள் நிகழவில்லை என்றால், அதைப் பொருட்படுத்த வேண்டியதில்லை. ஏனென்றால், எப்படி இருந்தாலும் இங்கு வாழ்ந்திருக்கும் என் அனுபவம் எனக்கு அற்புதமாகவே இருக்கிறது.”
எதிர்பார்ப்புகளில் இருந்து நன்றியுணர்வுக்கு நகர்தல்
அடித்தளத்தை நிலைப்படுத்தாமல், நாம் எங்கேயோ செல்ல முயற்சிக்கிறோம் – அதுதான் பிரச்சனை. உங்களது காரை ஓட்டவேண்டும் என்றால், அது சரியான நிலையில் இருக்கிறதா என்பதை நீங்கள் முதலில் பார்க்கவேண்டும். அதனுடைய இரண்டு சக்கரங்கள் சரியாக பொருத்தப்படாமல், ஜாக்கியின் மீது இருக்கும்போதே நீங்கள் அதை ஓட்டுவதற்கு முயன்றால், அது பேரழிவாக இருக்கும்.
நீங்கள் இளமையாக இருக்கும்பொழுது, உங்களையே ஸ்திரப்படுத்திக் கொள்வதற்கான நேரம் இது, உடனே கார் ஓட்டுவதற்கு அல்ல. சக்கரங்களை நன்றாக பொருத்துவதற்கு முன்பு நீங்கள் ஓட்டினால், அது வலி மிகுந்ததாகவும், பேரழிவாகவும் இருக்கப்போகிறது. உங்களுக்கு நீங்களே அதைச் செய்துகொள்ளாதீர்கள். இந்த வாழ்வை அது எப்படி இருக்கிறதோ அந்த விதமாக பார்த்தால், படைப்பின் பிரம்மாண்டமான தன்மையினால் நீங்கள் ஆட்கொள்ளப்படுவதைத் தவிர்க்கமுடியாது. மலைகள், ஏரிகள், சமுத்திரங்கள், எல்லையில்லாத பிரபஞ்சம் மற்றும் இந்த பூமியில் நிகழ்ந்துகொண்டிருக்கும் அளவிடற்கரிய உயிரினங்கள் அனைத்துமே நமக்கு பிரம்மிப்பூட்டுகிறது.
உயிரின் செயல்முறையை உற்று நோக்கும்போது – அதன் பன்மை, அதன் புத்திகூர்மை மற்றும் ஒரு ஒருங்கிணைந்த சக்தியாக இந்த சின்னஞ்சிறு கிரகத்தின் மீது வாழ்ந்துவரும் இலட்சோபலட்சம் கோடி உயிரினங்களின் சமநிலை - உங்களை வியப்பில் ஆழ்த்தாமல் இருக்கமுடியாது. இந்தப் படைப்பில் இருக்கும் எல்லா உயிர்களுக்குமான நன்றியுணர்வின் ஆழமான அனுபவம் உங்களுக்கு கிடைக்கட்டும்.
