திபெத்திய பௌத்தம் ஏன் இவ்வளவு வலுவான தாந்திரீகக் கூறுகளைக் கொண்டுள்ளது?

திபெத்தின் தொலைந்துபோன தாந்திரீகம்

சமூகம் ஏற்றுக்கொள்வதற்காக பௌத்த சீருடையை அணிந்திருந்த தாந்திரீகர்கள் இவர்கள். துன்பங்களில் இருந்தும், மற்றும் அதைப்போன்ற விஷயங்களில் இருந்தும் உங்களை விடுவிப்பதற்கான அற்புதமான விஷயங்களை அவர்கள் செய்தனர். இதனை ஒருபோதும் எளிய தியான செயல்முறைகளால் மட்டும் செய்திருக்க முடியாது. திபெத்தில் செய்யப்பட்டது அதி அற்புதமானது. ஆனால் அது தலைமுறை தலைமுறையாக தொடரும்போது, அதிலுள்ள அறிவியல் மறைந்துபோய், வெறும் சீருடை மட்டுமே நிலைத்தது. அதைத்தான் இன்றைக்கு நாம் காண்கிறோம். அது முற்றிலுமாக தொலைந்துவிடவில்லை. ஆனால் பெரும்பாலும் காணாமல் போய்விட்டது.

தாந்திரீகம் என்றால், மீண்டும் உயிரை செயலுக்குள் ஈடுபடுத்துவது என்பது பொருள். இவை அனைத்தும் இந்தியத் துணைக்கண்டத்தில் உருவாகி, இன்னமும் ஒரு சிறிய அளவில் செயல்முறையில் உள்ளது. ஆனால் மக்கள் இது வேறு ஏதோ ஒன்று என்பதாக தவறாகப் புரிந்துகொண்ட காரணத்தால், இது பெரும்பாலும் அழிக்கப்பட்டுவிட்டது. பதிமூன்றாம் நூற்றாண்டில் ஆக்கிரமிப்பாளர்கள் வந்தபோது, தாந்திரீகம் என்று அறியப்பட்ட அனைத்தையும் அவர்கள் அழிக்கத் துவங்கினர். ஏனெனில் கடவுள் மட்டுமே படைப்பவர் என்பதற்கு இது எதிராக இருப்பதாக கருதப்பட்டது. படைப்புடன் நீங்கள் குளறுபடி செய்யமுடியாது – அதுதான் அவர்களின் கருத்து.

அதற்கு பின்னர், ஆங்கிலேயர்கள் வந்தபோது, பாலுறவு மற்றும் நிர்வாணம் போன்றவற்றால் அதிர்ச்சியுறும் அவர்களது 19ஆம் நூற்றாண்டு கருத்துகளுடன், அவர்களால் இயன்ற எல்லா இடங்களிலும் தாந்திரீகத்தை வேரோடு அழித்தனர். மிகக் குறைவாகவே அதன் எச்சம் மிஞ்சியுள்ளது. அதனையும் சில நவீன நூலாசிரியர்கள் முழுமையாக சிதைக்கின்றனர். அந்தக் காரணத்தினால், மிக அற்புதமான உயிரின் இந்தப் பரிமாணம் முழுமையாக தடம்புரண்டுவிட்டது.

ஆனால் கடந்த காலத்தில் இங்கு செய்யப்பட்ட பணிகளை நீங்கள் பார்த்தால், இது உண்மையிலேயே தனித்துவமானது.