நாக சர்ப்பத்தால் ஒரு மரணம்

ஆன்மீக வளர்ச்சிக்கும், சர்ப்பத்துக்குமான ஆச்சரியகரமான உறவு

ஆன்மீக செயல்முறையில் எங்கெல்லாம் சக்தியின் நகர்வு கையாளப்படுகிறதோ, அங்கு சர்ப்பம் மிகவும் முக்கியத்துவம் பெறுகிறது. மனித அமைப்பில், உருப்பெறாத சக்தியின் அடிப்படை வடிவம், ஒரு சர்ப்பமாக, குண்டலினியாக குறிக்கப்படுகிறது. ஒருவிதத்தில், யோகாவின் ஒட்டுமொத்த செயல்பாடும், இந்த சர்ப்பத்தை எழுச்சியூட்டுவதன் மூலம் உயர்த்தி நகர வைப்பதாகவே இருக்கிறது. பெருமளவுக்கு உருப்பெறாமல் இருக்கும் இந்த சக்தி, மனித அமைப்பில் முழு வெளிப்பாடு அடைந்து, அதன் உச்சத்தை எட்டுவதே யோக செயல்முறையின் சாரமாக இருக்கிறது. ஆகவே, நவீன யோக விஞ்ஞானத்தின் தந்தையாக அறியப்படும் பதஞ்சலி முனிவர், சர்ப்பத்தின் உடல் மற்றும் மனிதத் தலையைக் கொண்டவராகக் குறிக்கப்படுவதில் ஆச்சரியம் இல்லை.

இந்த குறியீடு மிகத் தெளிவாக இருக்கிறது - உங்களில் இருக்கும் அடிப்படையான இயல்பை விழிப்படையச் செய்து, அதன் உச்சத்திற்கு எடுத்துச் செல்ல வேண்டுமென்றாலும் அல்லது வேறு எங்கிருந்தாவது அந்த சக்தி அருவியாக உங்கள் மீது பொழிய வேண்டுமென்றாலும் – இரண்டு வழிகளிலும், சர்ப்பத்தின் இயல்பும், இந்த சக்தியும் மிக நெருக்கமான தொடர்பும் சம்பந்தமும் கொண்டுள்ளன. ஒரு மனிதருக்குள் செயல்படாமல் இருக்கும் ஒவ்வொரு அம்சத்துடனும், ஏறக்குறைய இது பொருந்துகிறது. மனிதர்கள் இன்னமும் முழுமையான உயிர்களாக இல்லை – அவர்கள் அதை நோக்கி முன்னேறிக் கொண்டிருக்கிறார்கள் அல்லது பின்னோக்கிச் செல்கிறார்கள்.

நாக சர்ப்பம் ஒரு ஆபத்தான ஆயுதமாகும் பொழுது

இந்தியாவின் சில குறிப்பிட்ட பகுதிகளிலிருந்து வருபவர்கள் இதுபோன்ற கதைகளைக் கேட்டிருக்கக்கூடும்: ஒரு நாக சர்ப்பத்துக்கு நீங்கள் ஏதேனும் தீங்கிழைத்தால், 12 வருடங்கள் ஆனாலும் அதை நினைவில் வைத்திருந்து, உங்களைத் தேடி வந்து அது தீண்டும் என்பார்கள். இது நாக சர்ப்பத்தைக் குறித்து் கூறப்படும் நியாயமில்லாத விஷயம், ஆனால் இந்த அசாதாரண விஷயம் அல்லது கதை எங்கிருந்து, ஏன் தோன்றியது என்றால் – நீங்கள் குறிப்பிட்ட விஷயங்களைச் செய்தால், ஒரு நாகத்துடன் நட்பு ஏற்படுத்திக்கொண்டு, குறிப்பிட்ட நபருடைய சக்தியின் வாசனையை ஒரு நாக சர்ப்பத்துக்கு பரிச்சயப்படுத்திவிட்டு, பிறகு ஒரு குறிப்பிட்ட சூழலை உருவாக்கினால், அவர் எங்கிருந்தாலும், நாகம் அந்த நபரை, அவரை மட்டும் தேடிச்சென்று தீண்டும்.

இந்தியாவில் இப்படிப்பட்ட ஒரு நம்பிக்கை முறை நிலவியது. ஒரு குறிப்பிட்ட நபரை, ஒரு சர்ப்பம் தீண்டவேண்டும் என்றால், அந்த நபரின் துவைக்கப்படாத உள்ளாடைகளை திருடுவார்கள். ஒரு துவைக்கப்படாத உள்ளாடை வீட்டிலிருந்து திருடப்பட்டதென்றால், அந்த வீட்டினர் உடனடியாக அவர்களது வீட்டின் ஒவ்வொரு சிறு துவாரத்தையும் அடைத்துவிட முயற்சி மேற்கொள்வார்கள் அல்லது எங்காவது பயணம் கிளம்பி விடுவார்கள். அவர்கள் தம் வசிப்பிடத்தின் சுற்றுப்புறத்தில் எங்கும் இருப்பதில்லை, ஏனென்றால் அவர்களது உடல்ரீதியான சக்தியுடன்  நாகத்திற்கு பரிச்சயம் ஏற்படுத்தி அவர்களைத் தீண்டுவதற்கு அதை பழக்கப்படுத்தலாம். ஒரு நபர் எங்கிருந்தாலும் தேடிச் சென்று, அவரை தீண்டுவதற்கு ஒரு சர்ப்பம் வழிநடத்தப்பட முடியும். ஒரு குறிப்பிட்ட சடங்கு, செயல்முறையை செய்துவிட்டால், அது அந்த நபரைத் தேடிச் செல்லும்.

இந்த எதிர்மறையான பயன்பாடு எப்பொழுதும் அதிக சுவாரஸ்யமானது; அதனால்தான் அது அதிகமாக கவனத்தை ஈர்க்கிறது. ஆனால் இந்த சக்தியைப் பயன்படுத்துவதற்கான நேர்மறையான வழிகளும் இருக்கின்றன. ஒருவரது நல்வாழ்வுக்கும், வளர்ச்சிக்கும் அதை எண்ணற்ற நேர்த்தியான வழிகளில் பயன்படுத்த முடியும். சர்ப்பத்தை வழிபடுவது இந்தியாவுக்கு மட்டுமே உரித்தானது அல்ல – ஏறக்குறைய ஒவ்வொரு மனித நாகரிகமும் அதைச் செய்துள்ளது. கடந்த 2000 வருடங்களாகத்தான், மற்ற சமூகங்களில் இத்தகைய விஷயங்கள் நலிந்துள்ளன; அதற்கு முன்பு அது எல்லா இடங்களிலும் நிலவியிருந்தது. மோசஸ்கூட ஒரு சர்ப்ப ஆலயம் அமைத்ததாக கூறுகின்றனர். சர்ப்பமும், மனித வாழ்வும் நெருக்கமான தொடர்புடையவை.