ശിവന്റെയും പാർവതിയുടെയും വിചിത്രമായ വിവാഹം

അപ്പോഴാണ് വരനായ ശിവൻ വന്നത് - ജട പിടിച്ച മുടി, തലമുതൽ കാൽവരെ ഭസ്മം പുരട്ടിയിരിക്കുന്നു, രക്തം ഒലിക്കുന്ന ഒരു ആനയുടെ  തോൽ ധരിച്ചിരിക്കുന്നു. അദ്ദേഹം പൂർണ്ണമായും ലഹരിയിലായിരുന്നു, പൂർണ്ണമായും ആനന്ദാവസ്ഥയിൽ. അദ്ദേഹത്തിന്റെ അനുയായികൾ എല്ലാം ഭ്രാന്തരും വികൃതരുമായ ജീവികളായിരുന്നു, മനുഷ്യരൂപത്തിലല്ലാത്തവർ. അവർ ആർക്കും മനസ്സിലാകാത്ത ഒരു ഭാഷയിൽ തങ്ങൾക്കിടയിൽ എല്ലാത്തരം ശബ്ദങ്ങളും ഉണ്ടാക്കിക്കൊണ്ടിരുന്നു.

പാർവതിയുടെ അമ്മ മീന ഈ വരനെ കണ്ട് ബോധം കെട്ടു വീണു! പാർവതി ശിവനോട് കെഞ്ചി, "അങ്ങ് ഇങ്ങനെയായിരിക്കുന്നതിൽ എനിക്ക് പ്രശ്നമില്ല. അങ്ങ് എങ്ങനെയാണോ അങ്ങനെ തന്നെയാണ് എനിക്ക് വേണ്ടത്. പക്ഷേ എന്റെ അമ്മയ്ക്ക് വേണ്ടി കുറച്ചുകൂടി മനോഹരമായ രൂപം കാണിക്കാമോ." ശിവൻ സമ്മതിച്ചു, അദ്ദേഹം വളരെ മനോഹരമായ ഒരു രൂപം സ്വീകരിച്ച്, നന്നായി വസ്ത്രധാരണം ചെയ്ത്, വീണ്ടും വിവാഹത്തിന് വന്നു.

ശിവന്റെ മാറ്റം കണ്ടപ്പോൾ, അവർ അദ്ദേഹത്തെ സുന്ദരമൂർത്തി എന്ന് വിളിച്ചു. അതായത് അവർ കണ്ട ഏറ്റവും സുന്ദരനായ മനുഷ്യനായിരുന്നു അദ്ദേഹം. അദ്ദേഹത്തിന് ഒൻപത് അടി ഉയരമുണ്ടായിരുന്നു. ശിവൻ എഴുന്നേറ്റ് നിന്നാൽ ഒരു കുതിരയുടെ തലയോളം ഉയരമുണ്ടായിരുന്നുവെന്ന് അവർ പറയുന്നു. അദ്ദേഹം ദക്ഷിണേന്ത്യയിലേക്ക് വന്നപ്പോൾ, അവിടുത്തെ സാധാരണ നാലര മുതൽ അഞ്ച് അടി വരെ ഉയരമുള്ള സ്ത്രീകളുടെ ഇരട്ടി ഉയരം അദ്ദേഹത്തിനുണ്ടായിരുന്നുവത്രേ. അദ്ദേഹത്തിന് ഏകദേശം ഒൻപത് അടി ഉയരമുണ്ടായിരുന്നു. ഏറ്റവും സുന്ദരനായ പുരുഷനായിരുന്നു അദ്ദേഹം. അദ്ദേഹത്തിന്റെ സാന്നിധ്യം എല്ലാവരെയും വിസ്മയിപ്പിച്ചു.

ശിവനും പാർവതിയും: ഒരു സന്ന്യാസി ഒരു രാജകുമാരിയെ വിവാഹം ചെയ്തപ്പോൾ

ശിവൻ വിവാഹത്തിനായി ഇരുന്നു. ഇന്ത്യയിൽ, പ്രത്യേകിച്ച് ഇത്തരം വിവാഹങ്ങളിൽ, വധൂവരന്മാരുടെ പൂർവികരെക്കുറിച്ച് വലിയ അഭിമാനത്തോടെ പ്രഖ്യാപിക്കാറുണ്ട് - അവരുടെ വംശാവലി, അവർ എവിടെ നിന്നാണ് വന്നത്, അവരുടെ രക്തം എത്ര ശുദ്ധമാണ്, അവരുടെ കുടുംബ പരമ്പര മുഴുവനും അവിടെ പ്രഖ്യാപിക്കും. 

വധുവിന്റെ കാര്യത്തിൽ, പാർവതിയുടെ പിതാവായ ഹിമവത് ഹിമാലയ പർവത മേഖലയിലെ രാജാവായിരുന്നു. വധുവിന്റെ വംശാവലിയെക്കുറിച്ച് നിരവധി മഹത്തായ കാര്യങ്ങൾ പറയപ്പെട്ടു. എന്നിട്ട് അവർ ചോദിച്ചു, "വരന്റെ കാര്യമോ?" 

ശിവൻ നിശ്ശബ്ദനായി ഇരുന്നു. അദ്ദേഹം ഒന്നും പറഞ്ഞില്ല. അദ്ദേഹത്തിന്റെ കൂടെയുണ്ടായിരുന്ന ആർക്കും തന്നെ മനുഷ്യർക്ക് മനസ്സിലാകുന്ന ഭാഷ സംസാരിക്കാൻ അറിയുമായിരുന്നില്ല. അവർ അവ്യക്തമായ ശബ്ദങ്ങൾ ഉണ്ടാക്കുകയായിരുന്നു. വധുവിന്റെ പിതാവ് ഇതിൽ അപമാനിതനായി: "പൂർവികരില്ലാത്ത ഒരു മനുഷ്യൻ എന്റെ മകളെ എങ്ങനെ വിവാഹം ചെയ്യും? അദ്ദേഹം എവിടെ നിന്ന് വരുന്നുവെന്നോ, അദ്ദേഹത്തിന്റെ മാതാപിതാക്കൾ ആരെന്നോ, വംശാവലി എന്താണെന്നോ ആർക്കും അറിയില്ല. ഈ മനുഷ്യന് എന്റെ മകളെ എങ്ങനെ നൽകും?" അദ്ദേഹം കോപത്തോടെ എഴുന്നേറ്റു. 

അപ്പോൾ വിവാഹ വിരുന്നുകാരനായിരുന്ന നാരദ മുനി, ഏകതാര എന്ന ഒറ്റ കമ്പിയുള്ള വാദ്യവുമായി മുന്നോട്ട് വന്നു. അദ്ദേഹം ആ ഒറ്റ കമ്പി മീട്ടി, "ടാങ്ങ്, ടാങ്ങ്, ടാങ്ങ്." 

രാജാവ് കൂടുതൽ കോപിഷ്ഠനായി. "എന്തിനാണ് നിങ്ങൾ ഏകതാര മീട്ടുന്നത്?"

നാരദൻ പറഞ്ഞു, "ഇതാണ് അദ്ദേഹത്തിന്റെ പൂർവികത. അദ്ദേഹത്തിന് പിതാവില്ല, മാതാവില്ല."

"അപ്പോൾ അദ്ദേഹം എവിടെനിന്ന് വരുന്നു?"

"ടാങ്ങ്... അദ്ദേഹത്തിന്റെ അടിസ്ഥാനം ശബ്ദമാണ്, സ്പന്ദനമാണ്. അദ്ദേഹം സ്പന്ദനത്തിൽ നിന്നാണ് ജനിച്ചത്. അദ്ദേഹത്തിന് മാതാപിതാക്കളില്ല, പൂർവികരില്ല, വംശാവലിയില്ല. അദ്ദേഹം സ്വയംഭൂ ആണ് - സ്വയം സൃഷ്ടിക്കപ്പെട്ടവൻ, പൂർവികരില്ലാത്ത ഒരു ജീവൻ

രാജാവ് പ്രകോപിതനായെങ്കിലും, വിവാഹം നടന്നു.

ശിവപാർവതി വിവാഹം: കഥയിലെ പ്രതീകാത്മകത

ആദിയോഗിയെക്കുറിച്ച് നാം സംസാരിക്കുമ്പോൾ, ഒരു സൗമ്യനും നാഗരികനുമായ മനുഷ്യനെക്കുറിച്ചല്ല, മറിച്ച് ജീവിതവുമായി സമ്പൂർണ്ണമായി ഐക്യപ്പെട്ട ഒരു ആദിമ രൂപത്തെക്കുറിച്ചാണ് നാം സംസാരിക്കുന്നതെന്ന് ഈ കഥ നമ്മെ ഓർമ്മിപ്പിക്കുന്നു. അദ്ദേഹം ശുദ്ധമായ ബോധമാണ്, കൃത്രിമത്വം തീരെയില്ലാത്തവൻ, ഒരിക്കലും ആവർത്തനങ്ങളില്ലാത്തവൻ, നൂതനത്വവും നൈസ്സർഗികതയും നിറഞ്ഞവൻ. അദ്ദേഹം കേവലം ജീവൻ തന്നെയാണ്.

ഇതാണ് ആധ്യാത്മിക പ്രക്രിയയുടെ അടിസ്ഥാനപരമായ  ആവശ്യകത. നിങ്ങൾ ഇവിടെ വെറും ചിന്തകളുടെയും വിശ്വാസങ്ങളുടെയും അഭിപ്രായങ്ങളുടെയും ഒരു ഭാണ്ഡക്കെട്ടായി - അതായത് പുറത്തുനിന്ന് ശേഖരിച്ച ഓർമ്മയുടെ ഒരു കൂമ്പാരമായി  - ഇരിക്കുകയാണെങ്കിൽ, നിങ്ങൾ നിങ്ങളുടെ മാനസിക പ്രക്രിയയുടെ അടിമ മാത്രമാണ്. എന്നാൽ നിങ്ങൾ ഇവിടെ ജീവന്റെ ഒരു കണമായി ഇരിക്കുകയാണെങ്കിൽ, നിങ്ങൾ അസ്തിത്വത്തിന്റെ പ്രക്രിയയുമായി ഒന്നാകുന്നു. നിങ്ങൾ തയ്യാറാണെങ്കിൽ, മുഴുവൻ പ്രപഞ്ചവും നിങ്ങൾക്ക് പ്രാപ്യമാകും.

ജീവിതം എല്ലാം നിങ്ങൾക്കായി തുറന്നിട്ടിരിക്കുന്നു. അസ്തിത്വം ആർക്കും ഒന്നും തടഞ്ഞുവച്ചിട്ടില്ല. "മുട്ടുവിൻ തുറക്കപ്പെടും" എന്ന് പറയപ്പെടുന്നു. യഥാർത്ഥത്തിൽ വാതിൽ ഇല്ലാത്തതിനാൽ നിങ്ങൾക്ക് മുട്ടേണ്ട ആവശ്യമില്ല. ഓർമ്മകളുടെയും ആവർത്തനങ്ങളുടെയും ജീവിതത്തെ മാറ്റിവയ്ക്കാൻ നിങ്ങൾക്ക് അറിയാമെങ്കിൽ, നിങ്ങൾക്ക് നേരെ നടന്നുകയറാം. സാക്ഷാത്കാരത്തിലേക്കുള്ള വഴി വിശാലമായി തുറന്നിരിക്കുന്നു.