கர்மாவின் வடிகாலா கனவுகள்?

தற்போது நீங்கள் கையாள்வதற்காக உங்களுக்கு ஒதுக்கப்பட்டிருக்கும் ஞாபகங்களை மட்டும் நீங்கள் தொடுவதற்கான வழியை இயற்கை அல்லது உங்கள் உடலமைப்பு கண்டிருக்கிறது. இதுவே பிராரப்தம் என அழைக்கப்படுகிறது. நமது பாட்டிகளின் காலத்தில் சாதாரணமாக பேச்சு வழக்கில் பயன்படுத்தும் வார்த்தையாக இது இருந்தது. ஏதோ ஒன்று அவர்கள் நினைத்தவாறு நடக்கவில்லை என்றால், "அய்யோ, பிராரப்தம்" என்பார்கள் - அதாவது உங்கள் கர்மா வேலையைக் காட்டுகிறது.

எனவே இரண்டாவது வகையான கனவு, பிராரப்தத்தின் அடிப்படையில் நிகழ்வது. உங்களது பழக்க வழக்கங்கள், உங்கள் எண்ணங்கள், உங்கள் உணர்ச்சிகள் உங்கள் உடல் எப்படி உணர்கிறது என உங்களது அன்றாட செயல்களில் இது வெளிப்படுகிறது. உங்கள் உடலை நீங்கள் கூர்ந்து கவனித்தால், ஒவ்வொரு நாளும் அது வித்தியாசப்படுவதை கவனிக்க முடியும் - ஏனென்றால் நிகழும் அனைத்தையும் பிராரப்தமே உருவாக்குகிறது.

மனத்தில் வெளிப்படும் ஞாபகங்கள் உடலில் ஒரு உணர்ச்சிப் போக்கை உருவாக்குகின்றன. தற்போது எந்தவிதமான பிராரப்தம் நிகழ்கிறதோ அதுதான் உங்கள் உடல் உணரும் விதத்தை நிர்ணயிக்கிறது. நீங்கள் விழிப்புணர்வோடு இருந்து உங்கள் உடலை கவனித்தால், அன்று வரப்போவதை நீங்கள் அறிய முடியும்.

உங்களில் பலரும் இதை கவனித்திருக்கலாம், குறிப்பிட்ட சில நாட்களில் ஏதோ ஒரு மோசமான சம்பவம் நிகழ்ந்தபோது காலையிலிருந்து அதுவரையும் ஏற்கனவே நீங்கள் விளையாட்டுத்தனமாக இருந்திருப்பீர்கள், திடீரென்று ஏதோ ஒன்றில் சிக்கியிருப்பீர்கள். இதை கவனித்தறிய நீங்கள் ஞானமடைந்தவராகவோ அல்லது அபார விழிப்புணர்வு உள்ளவராகவோ இருக்கத் தேவையில்லை. ஆனால் இதைப் புரிந்துகொள்ளத் தெரியாததால் அவர்கள் தாங்களாகவே அந்த சிக்கலுக்குள் சென்றுவிடுகிறார்கள். அதை புரிந்துகொள்ள முடிந்தவர்கள், அதுபோன்ற நாட்களில் சற்று விலகியிருப்பார்கள். ஏனென்றால், கர்மப் பதிவுகள் அல்லது பிராரப்தம் உங்கள் உடல், மனம், சக்தியின் செயல்பாட்டில் மட்டுமல்லாமல் உங்களைச் சுற்றி நிகழும் நிகழ்வுகளிலும் தாக்கத்தை ஏற்படுத்துகிறது.

பிராரப்தம் தான் இப்படி வெளிப்படுகிறது, இதுவேதான் இரவில் கனவு வடிவிலும் நிகழ்கிறது. இந்த கனவுகளில் எல்லாவிதமான வினோதங்களும் கலந்திருக்கலாம் - உங்களை அறிந்தவர்கள், அறியாதவர்கள், பரீட்சையமான பரீட்சையமற்ற சூழ்நிலைகள் என எல்லாம் சேர்ந்த கலவையாக இருக்கும். இதுபோன்ற கனவுகள் உங்கள் ஞாபகத்தில் இருக்கலாம்: நீங்கள் உங்கள் வீட்டில் இருக்கிறீர்கள், ஆனால் உங்களுக்கு அறிமுகமே இல்லாத ஒருவரும் அங்கே இருக்கிறார், அல்லது நீங்கள் ஏதோ ஒரு வினோதமான இடத்தில் இருக்கிறீர்கள், உங்கள் மொத்த குடும்பமும் அங்கே இருக்கிறது.

உங்களுக்குத் தெரிந்தது, தெரியாதது, நீங்கள் விழிப்புணர்வோடு ஞாபகத்தில் வைத்திருப்பது, விழிப்புணர்வோடு ஞாபகத்தில் வைத்துக்கொள்ளாதது - எல்லாமே கனவில் கலந்துவிடுகிறது. பிராரப்தத்தின் வெளிப்பாடு, இந்த விதமான கனவுகளுக்கு ஏதேனும் அர்த்தமும் இருக்கலாம்.

கனவில் வரும் உருவங்களை நீங்கள் கவனிக்கத் தேவையில்லை; அந்தக் கனவு உங்களுக்குள் விட்டுச் செல்வது என்னவோ அதைத்தான் நீங்கள் கவனிக்க வேண்டும். இது என்ன, ஒளிந்திருக்கும் ஆசைகளை மனம் தீர்த்துக்கொள்கிறதா, இல்லை ஏதோ ஒரு மனப்பதிவு இது நிகழ காரணமாக இருந்ததா? அந்த காட்சியை நீங்கள் பார்க்காதீர்கள். அந்த காட்சி முக்கியமானதல்ல, ஆனால் அது உடலில் எதை விட்டுச் செல்கிறதோ அதுவே முக்கியமானது. காலையில் கண்விழிக்கும் போது, நீங்கள் எப்படி உணர்கிறீர்கள்?

எல்லா இறை வடிவங்களும் இப்படித்தான் உருவாக்கப்பட்டன. யாரோ ஒரு குறிப்பிட்ட நோக்கத்திற்காக அவற்றைத் தங்கள் மனத்தில் உருவாக்கி, அதை செயல்படுத்தினார்கள். இப்போது அவை அவர்களுக்கு மட்டுமல்லாமல், அனைவரின் அனுபவத்திலும் உண்மையானதாக இருக்கின்றன. உங்கள் கனவு அனைவருக்கும் ஓர் உயிருள்ள அனுபவமாக மாறும்போது, அதுதான் நிஜம். அது உங்கள் வீரியமிக்க வார்த்தைகளைக் கொண்டு அவர்களுக்குள் ஒரு தாக்கத்தை ஏற்படுத்தவோ அல்லது அவர்களை வசியம் செய்ய முயற்சிப்பதையோ பற்றி அல்ல. அவர்கள் எதையும் தெரிந்துகொள்ள வேண்டிய அவசியமில்லை.

நீங்கள் தேவியின் ஆலயத்திற்குள் நுழையும்போது, அவளது சக்தி உங்கள் முகத்தில் அறைகிறது. நீங்கள் எதையும் நம்பத் தேவையில்லை, ஏனென்றால் அவள் நிஜம். ஆனால் சில ஆண்டுகளுக்கு முன், அவள் ஒரு கனவாகவே இருந்தாள். அந்தக் கனவுதான் இன்று மெய்ப்பட்டு இருக்கும் நிஜம். நாம் அனைவருமே உடல் வடிவம் பெற்று நிஜம் ஆன கனவுகள் தான். ஆனால் பொருள்தன்மையைப் பயன்படுத்தாமலேயே ஒரு கனவுக்கு நீங்கள் உருவம் தரமுடியும். இது வழக்கமான அர்த்தத்தில் கூறப்படும் கனவு அல்ல - இதுவே படைப்பு. படைத்தல் முழுவதும் இப்படித்தான் நிகழ்கிறது.

உங்களால் மாயையுடன் விளையாட முடியும். இப்போது நான் ஒரு பந்து வைத்து விளையாட விரும்புகிறேன் என்று வைத்துக்கொள்வோம். இப்போது இங்கு பந்து எதுவும் இல்லை, ஆனால் நான் ஒரு பந்து இருப்பதாக நினைத்துக்கொண்டு விளையாடத் துவங்குகிறேன். இதை நான் போதுமான தீவிரத்துடன் செய்தால், சற்று நேரத்திற்குப் பிறகு, இங்கே ஒரு பந்து இருப்பதை யார் வந்தாலும் உணர முடியும்.

இதுதான் படைத்தல், இது உங்கள் கனவிலும் வேர் விட்டிருக்கிறது, ஏனென்றால் சஞ்சிதத்தின் எல்லைகளை நீங்கள் கடக்கும்போது நீங்கள் படைப்புக்கு மூலமாக இருப்பதன் பரிமாணத்தைத் தொடுகிறீர்கள். பொதுவாக, நீங்கள் இதை தொடும்போது, உங்கள் மனம் ஒரு குறிப்பிட்ட விதத்தில் பயிற்றுவிக்கப் படாததாய் இருந்தால் திக்குமுக்காடிவிடும். இதைத்தான் சிலர் மனமற்ற நிலை என்கிறார்கள்.

உங்கள் புரிதலுக்கு அப்பாற்பட்ட ஒரு சக்தியின் முன்னிலையில் நீங்கள் வரும் அந்தக் கணத்திலேயே, உங்கள் மனம் உறைந்துபோகும். இது குழப்பம் அல்ல - இது ஒரு குறிப்பிட்ட அளவு தயார்படுத்தல் இல்லாத நிலையில் மனம் இல்லாது போவது.

பாரம்பரியமாக சொல்லப்படுவது போல, 'நீங்கள் கடவுளை சந்திக்கும்போது,' உங்கள் மனம் உறைந்து போகிறது. என்ன ஒரு வீண் நிலை! அங்கு செல்லத்தானே இவ்வளவு பிரயத்தனம் செய்தீர்கள், ஆனால் அங்கு சென்றதும் உறைந்து போகிறீர்கள். அப்படியும் கூட அது நல்லது தான். ஆனால் போதுமான அளவு பயிற்சி பெற்ற மனமும், கணிசமான அளவு சாதனாவின் துணையும் இருந்தால், மனப்பதிவுகள் இல்லாத அந்த இடத்தை நீங்கள் கடக்கும்போதும், உங்களை நீங்கள் விழிப்புணர்வோடு வழிநடத்திக்கொள்ள முடியும்."

உங்கள் மனம் இப்போது இப்படி செயல்படுவதற்கு காரணம், மனம் வைத்திருக்கும் பதிவுகள் தான். ஞாபகங்கள் அற்ற, புரிதல் மட்டுமே இருக்கின்ற இடத்தின் எல்லைக்குள் நீங்கள் நுழையும்போது, கிட்டத்தட்ட எல்லா மனங்களும் உறைந்துவிடும். பெரும்பாலான மனங்கள் தற்போது இருக்கும் பதிவுகளைக் கொண்டே இயங்குகின்றன. அந்தப் பதிவுகளை எடுத்துவிட்டோம் என்றால், அவர்களுக்கு எதையுமே செய்யத் தெரியாது.

யோகப் பயிற்சிகளின் மூலம் நீங்கள் செய்வது என்னவென்றால், உங்கள் மனத்தின் ஞாபகங்கள் அல்லது கர்ம கட்டமைப்புகள் உதிர்ந்து விட்டாலும் உங்களுக்கு மனம் இருக்கும். உடல் உதிர்ந்து விட்டாலும் - அதாவது, நீங்கள் இறந்த பிறகும் - உங்களுக்கு மனம் இருக்கும். இப்போது நீங்கள் எங்கே செல்ல வேண்டுமோ அங்கே உங்களை நீங்கள் வழிநடத்தி செல்ல முடியும். இல்லையென்றால் வாசனை ஈர்க்கும் வழியிலெல்லாம் நீங்கள் சென்று கொண்டிருப்பீர்கள்.

இவை தான் கனவுகளின் நான்கு வகைகள். இதில் கடைசியாக வருவதை கனவு என்றே கூறமுடியாது - அது மறுபக்க கரை. எனவே எந்த கனவாக இருந்தாலும் அதை உதாசீனப்படுத்த கற்றுக்கொள்ளுங்கள். கனவுகளின் அர்த்தம் தேடத் துவங்கினால், நீங்கள் இல்லாததையெல்லாம் கற்பனை செய்து கொண்டு உங்களது உயிருக்கான அர்த்தத்தைத் தொலைத்துவிடுவீர்கள்.