நிலக்கடலை டோஃபு காய்கறி கிண்ணம்
தேவையான பொருட்கள்
¾ கப் சிவப்பு அரிசி (அல்லது உங்கள் விருப்பப்படி ஏதேனும் தானியம்)
400 கிராம் டோஃபு அல்லது பன்னீர்
200 கிராம் பூசணி, பெரிய சதுர துண்டுகளாக நறுக்கப்பட்டவை
1கப் பச்சை பீன்ஸ், நறுக்கப்பட்டவை
1 முதல் 2 மேசைக்கரண்டி ஆலிவ் எண்ணெய்
நிலக்கடலை சாஸுக்காக:
¼ கப் நிலக்கடலை வெண்ணெய்
¼ கப் ஆரஞ்சுப் பழச்சாறு
சிறிதளவு மெல்லிய துண்டுகளாக வெட்டப்பட்ட இஞ்சி
3 மேசைக்கரண்டி நல்லெண்ணெய்
2 மேசைக்கரண்டி சோயா சாஸ் அல்லது திரவ அமினோஸ்
2 முதல் 3 மேசைக்கரண்டி வெல்லப்பாகு அல்லது தேன் (சுவைக்கேற்ப)
½ முதல் 1 தேக்கரண்டி மிளகாய் தூள் (சுவைக்கேற்ப)
¾ தேக்கரண்டி இமயமலை இளஞ்சிவப்பு உப்பு (அல்லது உங்கள் விருப்பப்படி வேறொரு உப்பு)
பச்சை காய்கறிகளுக்காக:
1½ கப் பீட்ரூட், துருவப்பட்டது
1½ கப் முட்டைக்கோஸ், துருவப்பட்டது
1½ கப் கேரட், துருவப்பட்டது
½ கப் முள்ளங்கி, துருவப்பட்டது
1 அவகோடோ, நறுக்கப்பட்டது
50 கிராம் புதிய மைக்ரோகிரீன் கீரைகள் (முள்ளங்கி, கடுகு அல்லது சூரியகாந்தி போன்றவற்றின் கீரைகள்)
செய்முறை
- சிவப்பு அரிசியை தண்ணீரில் கழுவி வடிகட்டவும். ஒரு பாத்திரத்தில் 1½ கப் தண்ணீரை கொதிக்க வைக்கவும்; பின்னர் அரிசியைப் போட்டு, அதில் ஒரு சிட்டிகை உப்பு சேர்த்து கிளறிவிடவும். பாத்திரத்தை மூடி, தீயைக் குறைத்து வைத்து, அரிசி மென்மையாகும் வரை 30-40 நிமிடங்கள் வேகவைக்கவும். தீயை அணைத்து, அரிசியை 10 நிமிடங்களுக்கு மூடி வைக்கவும். பரிமாறும் முன் ஒரு கரண்டி கொண்டு சாதத்தைக் கிளறிவிடவும்.
- டோஃபு அல்லது பன்னீரை தோராயமாக 2 அங்குல நீளம் மற்றும் ¾ அங்குல தடிமன் கொண்ட துண்டுகளாக நறுக்கவும்.
- அதிகப்படியான ஈரப்பதத்தை நீக்குவதற்காக, டோஃபு அல்லது பன்னீரை பேப்பர் டவலால் உலர்த்தவும், பிறகு லேசாக உப்பு சேர்த்து தாளிக்கவும்.
- நிலக்கடலை சாஸுக்காக, குறிப்பிட்ட அனைத்து பொருட்களையும் ஒரு மிக்ஸியில் சேர்த்து மென்மையாகும்வரை அரைக்கவும். ஒரு பாதியை பரிமாறுவதற்கு எடுத்து வைத்துவிட்டு, மீதி பாதியை டோஃபு அல்லது பன்னீர் துண்டுகள் மீது சமமாக பரப்பிவிடவும். ஒவ்வொரு டோஃபு துண்டின் மேற்புறத்திலும் சாஸை தாராளமாக ஊற்றிப் பரப்பவும்
- ஒரு பெரிய வாணலி அல்லது பாத்திரத்தை மிதமான தீயில் வைக்கவும். வாணலி சூடானதும், 1 அல்லது 2 மேசைக்கரண்டி ஆலிவ் எண்ணெயை அதில் சேர்க்கவும்.
- டோஃபு அல்லது பன்னீர் துண்டுகளை கடாயில் தனித்தனியாக இருக்கும்படி போட்டு, அவை பொன்னிறமாகும் வரை, ஒவ்வொரு பக்கத்திலும் சுமார் 5-7 நிமிடங்கள் சமைக்கவும். பின்னர் டோஃபு அல்லது பன்னீரை தனியாக எடுத்துவைக்கவும். உங்கள் கடாயின் அளவைப் பொறுத்து டோஃபு அல்லது பன்னீரை கொஞ்சம் கொஞ்சமாக எடுத்து சமைக்க வேண்டியிருக்கலாம்.
- பூசணிக்காயை தோலுரித்து ¾ இன்ச் அளவில் சதுரத் துண்டுகளாக வெட்டவும்.
- தேவைப்பட்டால் அதே கடாயில் இன்னும் சிறிது எண்ணெய் சேர்த்து, பூசணித் துண்டுகளைச் சேர்க்கவும். சிறிதளவு உப்பு சேர்த்து கிளரவும். பூசணிக்காயை அவ்வப்போது கிளறி, கருகாமல் பார்த்துக்கொள்ளவும். சுமார் 10-15 நிமிடங்கள் வரை அல்லது வெளியில் சிறிது பொன்னிறமாகும் வரை சமைக்கவும். பின்னர் அவற்றை தனியாக எடுத்து வைக்கவும்.
- அதே வாணலியில், பச்சை பீன்ஸை சுமார் 5-7 நிமிடங்களுக்கு மிருதுவாகும் வரை வதக்கவும்.
- பீட்ரூட், முட்டைக்கோஸ், கேரட் மற்றும் முள்ளங்கி ஆகியவற்றைக் கழுவி, தோலுரித்து, துருவிக்கொள்ளவும். அவை ஒவ்வொன்றையும் தனித்தனியாக எடுத்து வைக்கவும்.
- கிண்ணங்களில் சிவப்பு அரிசி சாதத்தை அடிப்பகுதியில் பரப்பி, பின்னர் டோஃபு அல்லது பன்னீரையும், அடுத்ததாக பூசணித் துண்டுகளையும் பரப்பவும். அதன்பின்னர் பச்சை பீன்ஸ் மற்றும் மீதமுள்ள காய்கறிகளைச் சேர்க்கவும். .
- மீதமுள்ள நிலக்கடலை சாஸை மேற்பரப்பில் ஊற்றிப் பரப்பவும் அல்லது பக்கத்தில் தொட்டுக்கொள்ளும்படி வைத்துப் பரிமாறவும்.
குறிப்பு: புதிய மைக்ரோகிரீன் கீரைகள் சுவைக்காக மட்டுமல்லாமல், உங்கள் காய்கறி கிண்ணத்திற்கு ஊட்டச்சத்தையும் அளிக்கின்றன. முள்ளங்கி, கடுகு அல்லது சூரியகாந்தி போன்றவற்றில் முதலில் முளைக்கும் ஒன்றிரெண்டு இலைகள் மைக்ரோகிரீன் எனப்படுகின்றன. இந்த நுண்ணிய கீரைகள் அத்தியாவசிய வைட்டமின்களையும் ஆன்ட்டி ஆக்ஸிடன்ட்களையும் கொண்ட ஆற்றல் மையமாக உள்ளன. மேலும், உங்கள் வீட்டிலேயே இந்த மைக்ரோகிரீன் கீரைகளை நீங்கள் எளிதாக வளர்க்க முடியும். இதன்மூலம் உங்கள் அன்றாட உணவின் ஆரோக்கியத்தை மேம்படுத்தும் இந்த கீரைகளை நீங்கள் தொடர்ந்து பயன்படுத்த முடியும்.
