பூமியுடன் தொடர்பு: வெற்றுப் பாதங்களுடன் நடப்பதன் வாயிலாக உங்கள் ஆரோக்கியம் மற்றும் ஆன்மீக வளர்ச்சியை ஊக்கப்படுத்துங்கள்

நீங்கள் சொர்க்கத்துடன் அல்லது பூமியுடன் தொடர்பில் இல்லாமல் இருந்தால், நீங்கள் தொந்தரவை நோக்கிச் செல்கிறீர்கள். குறைந்தபட்சம் இரண்டில் ஒன்றுடன் நீங்கள் தொடர்பில் இருந்தால், சில விஷயங்கள் உங்களுக்காக கவனித்துக்கொள்ளப்படும். இரண்டுடனும் நீங்கள் தொடர்பில்லாமல் இருந்தால், நீங்கள் தொந்தரவை விலைக்கு வாங்குகிறீர்கள்.

மனித மக்கள்தொகைப் பெருக்கத்தின் காரணமாகத்தான் இன்றைக்கு தினசரி அளவில் வெறுங்காலுடன் நடப்பது ஒரு பிரச்சனையாகிவிட்டது. இல்லையென்றால், அது நன்றாகவே இருந்திருக்கும். நாங்கள் ஒருமுறை காட்டில் வாழ்ந்துகொண்டிருந்த மூன்று சிறுவர்களுடன் காட்டுக்குள் சென்றிருந்தோம். அந்த சிறுவர்கள் வெறுங்காலுடனே பாறைக்குப் பாறை தாவிக்கொண்டும், காட்டுக்குள் ஓடிக்கொண்டும் இருந்தனர். அவர்களுள் ஒரு சிறுவனுக்கு நான்கரை வயதே ஆகியிருந்தது, மற்ற இரண்டு சிறுவர்கள் ஐந்து அல்லது ஆறு வயதாக இருந்தனர். அவர்கள் காட்டைச் சுற்றிலும் உற்சாகத்துள்ளலுடன் ஓடிக்கொண்டும், தங்களது துணிச்சலை வெளிப்படுத்தியவாறும் இருந்தனர்.

அவர்களது ஆரோக்கியமான உணர்வு, முக்கியமாக பூமி மற்றும் காடு இவைகளுடன் அவர்கள் கொண்டுள்ள தொடர்பிலிருந்தே வருகிறது. சுற்றுச்சூழல், காற்று, மற்றும் மண்ணுடன் கொண்டுள்ள தொடர்புதான் அவர்களுக்கான எல்லா வித்தியாசத்துக்கும் காரணமாக உள்ளது.

குறிப்பாக, உங்களது உடல் போதுமான ஒருங்கிணைப்புடன் இல்லாமலும், எப்போதும் உங்களைத் தொந்தரவு செய்துகொண்டும் இருந்தால், நீங்கள் வெறுங்காலுடன் நடக்கவேண்டும். பூமியுடன் மேலும் அதிகமான தொடர்பு கொள்வதற்கு உங்களால் ஊர்ந்துசெல்ல முடிந்தால், அதுகூட நல்லதுதான். இதனால்தான் நீங்கள் சாஷ்டாங்க நமஸ்காரம் செய்கிறீர்கள். ஒரு கோவில் குளத்தில் முழ்கி எழுந்து, பிறகு உள்ளே சென்று சாஷ்டாங்க நமஸ்காரம் செய்வதன் நோக்கம் என்னவென்றால், அதனால் உங்கள் முழு உடலும் பூமியுடன் தொடர்புக்கு வருகிறது. சாஷ்டாங்கம் என்பதன் பொருள் இதுதான் – உங்கள் உடலின் எட்டு முக்கிய புள்ளிகளும் பூமியைத் தொடவேண்டும்.

கோவில் பிரகாரத்தில் மக்கள் மண்ணில் உருளுவதை நீங்கள் பார்த்திருப்பீர்கள். அங்கப்பிரதட்சணம் செய்வதன் காரணம் என்னவென்றால், கோவிலின் சக்தியூட்டப்பட்ட பூமியுடன் உங்கள் உடல் தொடர்பில் இருக்க வேண்டுகிறீர்கள். பூமியுடனான இந்தத் தொடர்பின் காரணத்தால் அந்தக் கோவில் சக்தி வாய்ந்ததாக இருந்தால், அது மக்களை அவர்களது நோயிலிருந்து வெளிவருவதற்கு உதவி செய்யும். ஆனால் ஈஷா யோக மையத்தில் அங்கப்பிரதட்சணம் செய்யத் தொடங்காதீர்கள். மக்கள் கூடுமானவரை நிதர்சனத்திலிருந்து விலகி, அவர்களது சொந்த இருத்தலின் மேகத்துக்குள் வாழ்ந்திருக்க விரும்பும் இன்றைய உலகத்தில், இங்கே அங்கப்பிரதட்சணம் செய்வது மிகுதியான எதிர்மறை தாக்கத்தை உருவாக்கிவிடும்.