ஆன்மீகப் பாதையில் நீங்கள் போராட்டங்களை எதிர்கொள்கிறீர்களா? நல்லது.

கேள்வி: தியானலிங்கம் மற்றும் லிங்கபைரவி கோவிலில் நேரம் செலவழித்தபிறகு, மற்றும் எங்கள் வீட்டிற்கு தேவியை அழைத்துவந்ததில் இருந்து, எனது உணர்தல்கள் தீவிரமடைவதையும், உடலியல்ரீதியான அறிகுறிகள் தோன்றுவதையும் நான் கவனித்து வருகிறேன். நான் தொழில்முறையில் ஒரு மருத்துவர் என்றாலும், நான் மேலும் ஒரு நோயாளியாகிவிட்டேன். என் வளர்ச்சிக்கு உறுதுணையாகவும், இந்த வலிமையான எதிர்மறை விளைவுகளைத் தவிர்ப்பதற்கும் எனக்கு மட்டும் தனிப்பட்ட முறையில் வழிகாட்டல் வழங்கமுடியுமா?

சத்குரு: நோயாளிகள் உங்களிடம் ஒரு குறிப்பிட்ட மருந்தை பரிந்துரைக்கும்படி கேட்கின்றார்களா? “நோயாளி” சொன்னபடி கேட்கும் விதமான “மருத்துவர்” நானல்ல.

தியானலிங்கமும், லிங்கபைரவியும் வெவ்வேறு வழிகளில் உருவாக்கப்பட்டவை. பைரவி ஒரு விதம் – உங்களுக்கு விருப்பமில்லை என்றால் நீங்கள் அங்கே செல்லத் தேவையில்லை. தியானலிங்கம் முற்றிலும் வித்தியாசமானது; அது மிகவும் சீரான ஒரேவிதமான வெளியாக (space) இருக்கிறது. தியானலிங்கம் அனைவருக்குமானது. பைரவி “பித்துத்தன்மை” கொண்ட மக்களுக்கானது.

உங்களுக்கு ஏற்படும் “அறிகுறிகள்” பற்றிக் கூறவேண்டுமென்றால், நீங்கள் ஒரு மருத்துவத்துறை நபர் என்பதால், இந்த விதத்தில் விளக்கமளிக்கிறேன்: உடலின் இரத்தக்குழாய்கள் அடைபட்டு, இதயம் கடினமாக பம்ப் செய்யவேண்டியிருந்தால், அது பிரச்சனைகளை ஏற்படுத்தமுடியும். உடலுக்கு அதிகமான பிராணவாயு தேவைப்படும்போது, இதயம் கடினமாக பம்ப் செய்யவேண்டும். ஆனால் “குழாய்கள்” குறுகியதால் இதயம் வலுக்கட்டாயமாக பம்ப் செய்தால், அது பிரச்சனைகளை உருவாக்கும். இப்படிக் குறுகிப்போய் அடைபட்டுவிடும் குழாய்கள் இரத்தக் குழாய்களை மட்டும் பாதிப்பதில்லை – உடலுக்குள் பல நிலைகளில் பாதிப்பு நிகழமுடியும். சக்திரீதியாக, பல மக்களுக்கும் இது உண்மையாக இருக்கிறது. ஒரே இடத்தில் அமர்ந்திருக்கும் பல தனிநபர்கள், ஒரே பயிற்சியை செய்யும்போது, வெவ்வேறு நிலைகளில் வித்தியாசமாக ஏன் உணர்கின்றனர்? சிலர் வலியில் இருக்கின்றனர், சிலர் பரவசத்தில் இருக்கின்றனர், மற்றும் சிலர் அந்த இடமெங்கிலும் உருள்கின்றனர். ஒரு வழியில் பார்த்தால், இவைகள் உங்கள் தனிப்பட்ட நிலையின் அறிகுறிகள்.

ஆகவே, இவைகள் எதிர்மறையான அறிகுறிகளா அல்லது நேர்மறையானவையா என்பதைக் குறித்த தீர்மானங்களுக்குள் செல்லாதீர்கள். அவைகள் வெறுமனே அறிகுறிகள். தவிர, ஒரு தனிப்பட்ட பார்வையாளர்கள் குழு மற்றும் அவர்களுக்கு ஒரு தனிப்பட்ட பயிற்சி அதிக நன்மையளிக்கும் என்ற கருத்து தவறானது. இந்த அறிகுறிகள் தோன்றுவது ஏனென்றால் அடிப்படைத் தன்மைகள் இன்னமும் அமைதியடையவில்லை. சற்று அதிக நேரம் அர்ப்பணியுங்கள் – சாதனா பாதையில் இணைந்துகொள்ளுங்கள். ஆறுமாத கால கடுமையான பயிற்சியில் மெல்லமெல்ல, பலரது அறிகுறிகளுக்கு தீர்வு காணப்பட்டுள்ளன.