விடுபடுதல்: ஞானமடைதலுக்கான பாதை மற்றும் பெண்களின் ஆன்மீக ஆற்றல்

ஆசைகள் ஒரு முடிவில்லாத பொறியாக இருப்பது ஏன்

சத்குரு: ஞானமடைதல் என்பது ஒரு சாதனை அல்ல. அது வீடு திரும்புதல். உங்கள் ஆசைகளை வெளியில் வீசிக்கொண்டிருப்பதன் மூலம், நீங்கள் விலகி ஓடிக்கொண்டிருக்கிறீர்கள். ஆனால் அதை நீங்கள் நிறுத்தினால், உயிர் வீட்டுக்குத் திரும்பும். ஞானமடைதல் என்றால் எங்கோ ஒரு இடத்துக்கு செல்வதைப் பற்றியது அல்ல. அது, எங்கோ ஒரு இடத்தைச் சென்று அடைவதற்கான அவசியம் இல்லாமை குறித்தது.

எங்கும் செல்வதற்கோ அல்லது ஏதோ ஒன்றாக ஆவதற்கோ உங்களுக்கு எந்த அவசியமும் இல்லை. இங்கேயே அமர்ந்திருங்கள். அனைத்தும் மிக நன்றாக உள்ளது. அதேநேரத்தில், நீங்கள் ஈடுபாட்டுடனும், செயலூக்கத்துடனும் இருக்கிறீர்கள். நீங்கள் சாவகாசமாக இருக்கிறீர்கள் என்பதால் இது ஒரு தத்துவம் அல்ல. நீங்கள் உயிரோட்டம் நிரம்பி இருக்கிறீர்கள். நீங்கள் தொலைதூரத்துக்கோ அல்லது வேறொரு கிரகத்துக்கோ செல்லவேண்டும் என்றால், அங்கு ஏதோ ஒன்று செய்வதற்கு இருந்தால், நீங்கள் அங்கே செல்வீர்கள். ஆனால் எந்த இடத்துக்கும் செல்வதற்கான தனிப்பட்ட அவசியம் உங்களுக்கு இல்லை.

விழிப்புணர்வைத் தேர்வு செய்தல்

நீங்கள் தெளிவு பெறுவதற்கு, சிறிது காலம் எல்லாவற்றிலிருந்தும் விலகியிருங்கள். நீங்கள் இங்கு வந்தால், உங்களுக்கு நாம் ஒரு சிறப்பு சாதனாவை வழங்குவோம்; ஒரு வாரத்துக்கு மௌனத்தில் அமர்ந்திருங்கள். நீங்கள் மிகுந்த நிச்சலனமும், தெளிவான சிந்தனையும் கொண்டு, கட்டாயங்களில் இருந்து விடுபடும்போது, வாழ்க்கையில் உங்களுக்கு எவ்வளவு தேவைப்படுகிறது என்று தீர்மானியுங்கள். அதன்படி செயல்படுங்கள். நீங்கள் என் வழியில் செல்லவேண்டியதில்லை – உங்கள் வழியில் செல்லுங்கள். தற்போது, வர்த்தக முகமைகள்(agencies) உள்ளிட்ட மற்றவர்கள் உங்களை இயக்கிக்கொண்டிருக்கின்றனர், அது நியாயமல்ல.

விஜியின் ஆழமான ஞானம்

1996 நவம்பர்/டிசம்பரில், விஜி தனக்காகத் திட்டமிட்டிருந்த நேரம் நெருங்கிக்கொண்டிருந்த நிலையில், நான் பெண்ணின் பாத்திரமேற்க முயற்சித்து, அவளிடம் எடுத்துக்கூறினேன், “பார், இப்போதும் உனக்கு ஒரு குழந்தை இருக்கிறது. இதை நீ தள்ளிப்போடலாம். நான் உனக்கு உறுதுணையாக இருப்பேன்; இதை நீ வேறொரு நேரம் செய்துகொள்ளலாம். இப்போது வேண்டாம். குழந்தைக்கு இன்னமும் ஏழு வயதுகூட நிறையவில்லை.”

விஜி அவளது வழக்கமான விவேகத்துக்கு அப்பாற்பட்ட ஒரு விதத்தில் பதில் அளித்தாள், “ஒரு தாயாக, ஒரு சிறுமி என்ற நிலையில் அவளுக்காக நான் எல்லாவற்றையும் செய்துவிட்டேன். ஆனால் இப்போது ஏறக்குறைய அவளது ஏழு வயதில், அவள் இருக்கும் விதம், அவளது புத்திசாலித்தனம், மற்றும் உங்களுடன் அவள் எப்படி, எல்லா இடங்களிலும் பழகுகிறாள் என்பதைப் பார்க்கும்போது, மேலும் அதிகமாக எதையும் என்னால் கொடுத்துவிட முடியாது. நான் அவளுக்கு அன்பையும், ஆறுதலையும் வழங்கியுள்ளேன். நான் அவளை முழுமையாக நேசிக்கிறேன், ஆனால் அவளது வாழ்க்கைக்கு இனியும் அதிகமாக எதையும் என்னால் வழங்கமுடியும் என்று நான் நினைக்கவில்லை. இதற்குமேல் வேறெதுவும், அவளை என்னுடன் பிணைக்கத்தான் செய்யும்.”

ஆன்மீகரீதியாக பெண்கள் உயர்வதற்கான சிறந்த நேரம்

கடந்த காலங்களில், குறிப்பாக கிழக்கில், துறவிகளாகவும், அருட்தொண்டர்களாகவும் உயர்ந்த பல மகத்தான பெண்கள் இருந்துள்ளனர். அவர்கள் அவரவர் வழிகளில் வித்தியாசமாக இருந்தனர், ஆனால் அவர்களை ஒருவராலும் தடுக்க முடிந்ததில்லை, ஏனென்றால் கலாச்சாரமும், சமூகமும் அதனை அனுமதித்தது.

இன்றைக்கு, ஏறக்குறைய உலகத்தின் எல்லா சமூகங்களும் இதனை அனுமதிக்கிறது. இந்த வழியில் உயர்வதற்கு, பெண்களுக்கான நேரம் இது. அவர்களை நாம் ஆண்களுடன் போட்டியாளராக்கிவிட்டது துரதிருஷ்டவசமானது. பௌதிகரீதியான உடல்கள் வேறு. உடலில், ஆண் மற்றும் பெண் என்ற பாகுபாடு உண்டு. ஆனால் ஆன்மீகத்தில் ஆண் மற்றும் பெண் என்ற பாகுபாடு கிடையாது. இந்த இடத்தில்தான் நீங்கள் உயர்ந்து, உங்களது நிறைவை அடையவேண்டும்.

உங்களுக்குள் ஞானம் எழுச்சியடைந்தால், இன்றைய உலகில் நீங்கள் கண்களுக்குப் புலப்படுவீர்கள்; இனிமேலும் உங்களை யாராலும் நிறுத்தமுடியாது – அந்த நாட்கள் மறைந்துவிட்டன. நீங்கள் அந்த உரிமைபெற்ற பெண்களின் தலைமுறையில் இருக்கிறீர்கள் – அநேகமாக அதற்கான முதல் தலைமுறையாக இருக்கிறீர்கள். நீங்கள் விழிப்புணர்வில் உயர்ந்தால், உடனடியாக நீங்கள் அங்கீகரிக்கப்படுவீர்கள். இது ஆயிரக்கணக்கான வருடங்களாக இப்படி இருந்ததில்லை. அதனை சிறப்பாகப் பயன்படுத்திக்கொள்ளுங்கள்.