உடலற்ற சர்ப்ப வடிவங்களும், நாகதோஷத்தின் புரிதலுக்கு உட்படாத இயல்பும்

நாகதோஷம் என்றால் என்ன?

சத்குரு: நாகதோஷம் என்று அழைக்கப்படும் ஒரு விஷயம் உள்ளது. நாகா என்றால் நாகப்பாம்பு. தோஷம் என்றால் இலக்காகும் தன்மை என்பது பொருள். படைப்பின் குறிப்பிட்ட சக்திகளுக்கு இலக்காகும் ஒரு தன்மையை நீங்கள் பெறமுடியும்.

பொதுவாக, இந்த விஷயங்களைப் பற்றி பேசுவதை நான் தவிர்த்து வந்துள்ளேன், ஏனென்றால் இந்தவிதமான விஷயங்களில் அதீத கற்பனைகளுடன் பைத்தியக்காரத்தனமாக பல வழிகளிலும் அவற்றைத் தவறாகப் பயன்படுத்தும் மக்கள் இருக்கின்றனர். “என்னை சத்குரு இதனைச் செய்யவைக்கிறார்", என்று அவர்கள் செய்யும் எல்லா முட்டாள்தனங்களுக்கும் உரிமை கொண்டாடும் பல மக்கள் ஏற்கனவே இருந்துகொண்டுதான் உள்ளனர். இந்த எல்லா பரிமாணங்களையும் அவர்களிடம் நான் கூறினால், அவர்களுடைய கற்பனை கட்டுக்கடங்காமல் ஓடும்.

நாகதோஷத்தைப் பொறுத்தவரை – குறிப்பிட்ட சில கணங்களில், ஒருவர் அப்படிப்பட்ட சக்திகளுக்கு இலக்காக இருக்கமுடியும். தியானலிங்கத்தில் ஒரு கணமேனும் அமர்ந்துள்ள மக்கள் நாகதோஷத்துக்கு இலக்காக முடியாது. முற்றிலும் வித்தியாசமான ஒரு வழியில் அந்தப் பரிமாணங்கள் தீர்மானிக்கப்படுகின்றன.

சர்ப்பங்களும் ஆன்மீகமும்

ஆனால் மிக அதிகமாக சர்ப்பங்களுடன் செயல்கள் செய்யப்பட்டன, ஏனென்றால் ஆன்மீக செயல்முறையைப் பின்பற்றும் எந்த ஒரு மனிதருக்கும், ‘நீங்கள்’ என்று கருதுவது இனி இல்லை என்ற நிலையை எட்டும் அளவுக்கு அசையாமல் இருப்பது உச்சபட்ச இலக்காக உள்ளது. மிக அதிகமான அசைவு இருக்கும் காரணத்தினால்தான் ‘நீங்கள்’ ஒரு நபராக இருக்கிறீர்கள். நீங்கள் அசைவில்லாமல் ஆகிவிட்டால், எல்லையுள்ள “நீங்கள்” எனப்படுவது மறைந்துபோகும்.

அசைவில்லாமல் ஆகிவிடுவதுதான் உச்சபட்ச இலக்கு. சர்ப்பம், அசைவற்ற தன்மையுடைய ஒரு விலங்கு. நீங்கள் ஒரு அரை மணி நேரம் அமர்ந்தால், உங்களது அமர்வு நிலையை மாற்றவேண்டியுள்ளது. யோகிகள் எப்போதும் சர்ப்பங்கள் மீது பொறாமையடைந்தனர் ஏனென்றால் அவைகளால் முடிவில்லாமல், மணிக்கணக்காக முற்றிலும் அசைவில்லாமல் அமரமுடியும்.

மற்றொரு அம்சம் என்னவென்றால், சர்ப்பம், குறிப்பாக நாகப்பாம்பு, ஒரு குறிப்பிட்ட புலனுணரும் தன்மை கொண்டது. உங்கள் சக்திகளை ஒரு குறிப்பிட்ட வழியில் நீங்கள் உருவாக்கிக்கொண்டால், அவைகள் உங்களிடம் ஈர்க்கப்படுகின்றன. பல யோகிகளும் இதனை உணர்ந்துள்ளனர்: அவர்கள் அமர்ந்து தியான நிலையை அடைந்து, அவர்களின் ஒரு குறிப்பிட்ட பரிமாணம் உயிர்ப்படையும்போது, அவர்களைச் சுற்றிலும் நாக சர்ப்பங்கள் இருப்பதை அவர்கள் கண்டனர்.

சர்ப்பமும், ஆன்மீகமும் இணைந்திருந்தது ஏனென்றால் இந்தக் கலாச்சாரத்தில், மக்கள் சிவனையும், சர்ப்பங்களையும் எப்போதும் இணைத்தே பார்த்தனர். சிவன் ஒரு குறிப்பிட்ட நிலையிலான உணர்தலை அடைந்து, இந்த சக்தியினால் நாக சர்ப்பங்கள் ஈர்க்கப்பட்டபோது, மீண்டும் ஒருமுறை, மக்களின் மனங்களில் இது ஆன்மீகம் மற்றும் சர்ப்பங்களுக்கு இடையிலான தொடர்பை பலப்படுத்தியது. ஆன்மீகத்தின் குறிப்பிட்ட பரிமாணங்களுக்கு, சர்ப்பம் அதிக உணர்திறனைக் கொண்டிருக்கிறது.