மர உச்சிகளிலிருந்து செயற்கை நுண்ணறிவுக்கு – மனிதகுலத்தின் பாதையில் காத்திருப்பது என்ன?

நெறியாளர்: இந்த சந்திப்பை நெறியாள்கை செய்யும் பணி எனக்கு முதலில் கிடைத்தபொழுது, நான் நினைத்தேன், “ஒரு முதனிலை விலங்கியல் ஆய்வாளர், ஒரு விருது வென்ற ஹாலிவுட் நடிகர், மற்றும் ஒரு புகழ்பெற்ற குரு இவர்களுக்கு இடையில் பொதுவாக என்ன இருக்கிறது?” ஆனால் நிதர்சனத்தில், இது ஒரு பெருநிகழ்வாக இருக்கிறது!

இவர்கள் அனைவரும் அதிகம் விற்பனையாகும் நூலாசிரியர்கள். இவர்கள் அனைவரும் பெருமளவு காட்சி ஊடகங்களில் இருந்துள்ளனர். இவர்கள் அனைவரும் வருடத்தில் குறைந்தபட்சம் எட்டு மாதங்கள் அவர்களது பணிக்காக நீளும் சாலைகளில் ஓய்வறியாமல் பயணிக்கிறார்கள். இது ஒரு வேடிக்கையான உரையாடலாக இருக்கப்போகிறது

தலைமையின் நோக்கத்தை வரையறுத்தல்

நெறியாளர்: இந்த அமர்வின் தலைப்பு, “நோக்கத்துடன் வழி நடத்துதல்”. ஒரு நோக்கத்திலிருந்து வழிநடத்துவது என்றால் உங்களைப் பொறுத்தவரை என்ன அர்த்தம் என்று உங்கள் அனைவரிடமிருந்தும் அறிந்துகொள்ள விரும்புகிறேன்.

Dr. ஜேன் கூடால்: நல்லது, உண்மையாகக் கூறவேண்டுமென்றால், உங்களுக்கு ஒரு நோக்கமில்லை என்றால், உங்களால் வழிநடத்த முடியும் என்று நான் நம்பவில்லை.

நெறியாளர்: ஏற்றுக்கொள்கிறேன்

மேத்யூ மெக்கனாகெ: ஆம், உண்மைதான்!
சந்தோஷம் என்று நாம் எதை வரையறுத்தாலும், காலையில் படுக்கையிலிருந்து எழுவதற்கான காரணம் இருப்பது ஒரு பொதுப்படையானது. நமக்கு ஒரு நோக்கம் இருக்கும்பொழுது, நாம் கட்டமைக்கும் ஒரு விஷயம் வளர்வதை நாம் உணரமுடிகிறது. நமது வாழ்நாளில் முன்னோக்கிச் சென்றுகொண்டே, நம்மைத் தொடர்ந்து வரும் மக்களுக்காக ஏதோவொன்றை விட்டுச் செல்லும் நம்பிக்கை எழுகிறது.

சத்குரு: ஒவ்வொரு உயிரும் அதனதன் நிறைவைக் காண்பதே நோக்கமாக உள்ளது. ஒவ்வொருவரும் நமது சொந்த நோக்கத்தை வளர்த்துக்கொள்வதைக் குறித்ததல்ல இது. ஒவ்வொரு உயிரின் விருப்பமாக இருக்கும் நோக்கத்தைப் பூர்த்தி செய்யும் ஒரு செயலை எப்படித் தேர்ந்தெடுப்பது என்று பார்க்கவேண்டும். ஆகவே நோக்கத்துடன் நீங்கள் வழிநடத்தாதீர்கள். செயலின் போக்கை நீங்கள் அடையாளம் கண்டுவிட்டால், நோக்கம் தானாகவே உங்களை வழிநடத்துகிறது.

நெறியாளர்: அது மிக அழகானது.

அடுத்த தலைமுறையிடம் மாற்றத்தை வளர்ப்பது

மேத்யூ மெக்கனாகெ: இளைய தலைமுறையினர் தங்களது தலைக்கும், இதயத்துக்கும் இடையில் வித்தியாசமாக சிந்தித்து, புரிந்துகொண்டால், நாம் தற்போது எப்படி வாழ்கிறோம் என்பதை அது மாற்றும்.

அமெரிக்காவின் Title I பள்ளிகளின் பாடத்திட்டமாக Just Keep Livin’Foundation என்ற அமைப்பை காமிலாவும், நானும் தொடங்கினோம். அங்கே 50 சதவிகிதம் பள்ளியில் இடை நிற்றல் விகிதமும், துணை உணவுத் திட்டமும் உள்ளன. இந்தக் குழந்தைகள் பள்ளி நேரம் முடிந்தபிறகு செல்வதற்காக, நாங்கள் ஒரு திட்டத்தைத் துவங்கினோம். ஊட்டச்சத்து இலக்குகளும்கூட இருக்கின்றன.

செயற்கை நுண்ணறிவு எல்லை: எதிர்கால மனிதகுலத்துக்கு வளம் சேர்ப்பது எப்படி?

நெறியாளர்: இங்கு நாம் தேசத்தின் மிகப்பெரிய செயற்கை நுண்ணறிவு மாநாட்டில் இருக்கிறோம். உங்களது பணியில் செயற்கை நுண்ணறிவு குறித்தும், மற்றும் உலகத்தில் மனிதர்களும், இயந்திரங்களும் எப்படி இணைந்து வாழமுடியும் என்பதைக் குறித்தும் நீங்கள் எப்படி சிந்திக்கிறீர்கள் என்று அறிந்துகொள்ள ஆவலாக உள்ளேன். சிறிதளவுக்கு, அதுகுறித்த உங்களது கவலை என்ன, மற்றும் அதன் எந்த அம்சம் குறித்து நாம் நம்பிக்கைகொள்ள முடியும் என்றும் அறிய விரும்புகிறேன்.

Dr. ஜேன் கூடால்: செயற்கை நுண்ணறிவு பல்வேறு வழிகளில் உலகத்தை ஒரு மேலான இடமாக மாற்றமுடியும் என்று என்னால் சிந்திக்கமுடிகிறது. இருப்பினும், என் கவலை என்னவென்றால், அது தவறான கரங்களில் சிக்கிவிடக்கூடாது என்பதுதான். அதுதான் அச்சுறுத்தலாக உள்ளது. செயற்கை நுண்ணறிவு, மற்ற அனைத்தையும் போல, அது ஒரு கருவி என்பதுடன், கருவி பல்வேறு வழிகளில் பயன்படுத்தப்பட முடியும். அது நல்லவர் கரங்களில் இருக்கும்போது, அற்புதமானது. ஆனால் அது எப்போதும் நல்லவர் கரங்களில் இருப்பதில்லை. தீயவர் கரங்களிலிருந்து அதை எப்படி விலக்குவது என்ற கேள்விக்கு செயற்கை நுண்ணறிவால் பதில் அளிக்கமுடியுமா?

சத்குரு: செயற்கை நுண்ணறிவு, அற்புதமான ஆற்றல் அளிப்பதாக உள்ளது. மனிதர்கள் தங்களையே சூப்பர் மனிதராக்கிக்கொள்ளக்கூடிய அந்தக் குறிப்பிட்ட ஆரம்பப்புள்ளியில் நாம் இருக்கிறோம். நமது நோக்கமும், அடையாளங்களும் இணைத்துக்கொள்ளும் தன்மையில் இருக்கும்போது மட்டும்தான் எதனுடனும் உச்சம் தொடுவது நன்மையாக உள்ளது. தேசங்கள், அமைப்புகள், அரசியல் கட்சிகள் இவற்றுக்கு இடையில், நாம் ஒருவர் மீது ஒருவர் நம்பிக்கையில்லாமல் இருக்கும்போது, ஏற்றத்தாழ்வுகள் இருப்பது தவிர்க்கமுடியாதது. ஆனால் நீங்கள் தொழில்நுட்பத்தைத் தடுக்கமுடியாது.

இந்தக் குறிப்பிட்ட தொழில்நுட்பம் செல்கின்ற வேகத்தில், அதனுடன் பயணிக்கவேண்டிய மக்களின் மாற்றத்துக்கான நேரம் மிகவும் குறைவாக இருக்கிறது. அதனால் பெருங்குழப்பம் இருக்கும், ஆனால் அனைத்துடனும் சற்று கருணையான இதயம் கொண்டு, இணைத்துக்கொள்ளும் அணுகுமுறையுடன் நாம் அதனைக் குறைக்கலாம். நாம் சிந்திக்கும் எந்த விஷயமும் ஒருமையின் நோக்கில் இருக்கவேண்டும். இல்லையென்றால், நாம் மிகுந்த அழிவு ஏற்படுத்தும் சக்தியாக இருப்போம்.

மேத்யூ மெக்கனாகெ: செயற்கை நுண்ணறிவு இரண்டு வழிகளிலும் விளைவை ஏற்படுத்தப்போகிறது. சர்வாதிகாரிகளின் கரங்கள் மற்றும் தீயவர்களின் கரங்களிலிருந்து விலக்கி வைப்பதற்கான வழியே இல்லை. நல்லவர்களின் கரங்களில் அது இருக்குமென்று நம்புகிறேன்

ஆனால் ஒட்டுமொத்தமாக, நான் ஆவலுடனும், நம்பிக்கையுடனும் இருக்கிறேன். காலந்தோறும் சமூகத்தில் பெரிய மாற்றங்களை நாம் சந்தித்திருக்கிறோம். நாம் என்ன உருவாக்குவோம் என்று பார்ப்போம், ஏனென்றால் நாமே நம்மைக் குறித்த கனவை உருவாக்குகிறோம்.

சத்குரு: பரிணாம செயல்முறை உருவாக்கியுள்ள மிக அழகான விஷயங்களுள் ஒன்றுதான் மனித மனம். ஆனால் இன்றைக்கு, மனிதர்கள் அனுபவிக்கும் பெரும்பாலான துன்பங்களுக்கு, மனித மனம்தான் அடிப்படையாக உள்ளது.

செயற்கை நுண்ணறிவு, நமது மனதின் ஒரு சூப்பர் விரிவாக்கமாக இருக்கப்போகிறது. இதனை நாம் கவனமாகக் கண்காணிப்பது அவசியம். இதனை நீங்கள் அழுத்தம், இறுக்கம், பதற்றம் என்று எதுவாகவும் அழைக்கமுடியும். ஆனால் முக்கியமாக, நமது புத்திசாலித்தனமே நம்மைக் குத்துகிறது. எந்தவொரு விஷயம், ஒரு அதிசயமாக உள்ளதோ, அதுவே துன்பமாகிவிட்டது. ஆகவே, மீண்டும் ஒருமுறை, இதிலிருந்து எப்படி ஒரு அதிசயத்தை உருவாக்குவது என்று மனிதர்கள் கற்றுக்கொள்வது முக்கியமானது.

பெரும் மாற்றம் ஏற்படுத்தக்கூடிய தொழில்நுட்பங்கள் வெளிப்படுகையில், நாம் தனிப்பட்ட மனிதர்களின் தன்னிலைமாற்றத்தின் மீது கவனம் செலுத்துவது மிக மிக முக்கியமானது. அதை நாம் செய்யவில்லை என்றால், நாம் உருவாக்குவது என்னவோ, அது நமக்கு எதிராகத் திரும்பும், அதற்குக் காரணம் தொழில்நுட்பம் மோசமானது என்பதால் அல்ல – ஏனென்றால் அதை எப்படிக் கையாள்வது என்று நமக்குத் தெரியவில்லை.

நெறியாளர்: ஆமாம், நான் ஏற்றுக்கொள்கிறேன். செயற்கை நுண்ணறிவு ஒரு கருவி, ஒரு கண்ணாடி, மற்றும் அது, நாம் என்பதன் விரிவாக்கம் என்று கேள்வியுற்றோம். அது அழகாக இருக்கும் என்று பெரிதும் நம்புகிறேன். அந்தப் புதிய தொழில்நுட்பத்திற்குள் நாம் ஒரு நோக்கத்துடன், இணைத்துக்கொள்ளுதலுடன், மற்றும் ஒருமைத்தன்மையுடன் அடியெடுத்து வைக்கவேண்டும். உங்களுக்கு மிக்க நன்றி.