வளப்படுத்தும் அன்பும், உறவுகளும்: வளர்ச்சியை ஊக்குவித்து, இணைந்து முன்னேறும் கலை

கேள்வி: ஒரு குடும்பத்துக்குள் வாழ்ந்துகொண்டு, அன்புக்குரியவர்களால் சூழப்பட்டு இருக்கும்பொழுது, அவர்களது கருத்துக்கள் மற்றும் எதிர்பார்ப்புகளுடன் இணங்கிச் செல்ல வேண்டிய அழுத்தத்தை நாம் அடிக்கடி உணர்கிறோம். இது சில நேரங்களில் நம்மை மிகவும் மகிழ்ச்சியிழக்கச் செய்கிறது. மேலான உறவுகளை எப்படிக் கட்டமைப்பது?

ஆனந்தத்தின் மூலமாகவும், செல்ஃப் ஸ்டார்ட் ஆகவும் இருப்பது

நேசத்தை ஒரு விதமான இனிமையான உணர்ச்சியாக உங்களுக்குள் நீங்கள் உணர்கிறீர்கள். இந்த உணர்வானது நீங்கள் யாரையோ பார்க்கும்போதோ, அல்லது அவர்களின் அருகாமையில் இருப்பதனாலோ தூண்டப்படமுடியும். உணர்ச்சியை யார் தூண்டுவது என்பது பொருட்டல்ல; முக்கியமானது என்னவென்றால், அனுபவம் உங்களுக்குள் நிகழ்கிறது.

அத்தகைய உணர்ச்சியின் இனிமையை நீங்கள் அனுபவிப்பது அற்புதமானது. ஆனால் உங்களுக்குள் ஒரு அனுபவத்தை உணர்வதற்கு அடுத்த நபரை நீங்கள் ஒரு திறவுகோலாகப் பயன்படுத்துகிறீர்கள். அங்கே ஒரு பூட்டு இல்லை, கதவு இல்லை, மற்றும் தடை இல்லாதபொழுது, நீங்கள் ஏன் ஒரு திறவுகோலை பயன்படுத்துகிறீர்கள்? அது ஏனென்றால், நீங்கள் ஒரு “தள்ளு வண்டி (புஷ்-ஸ்டார்ட்) இயந்திரமாக” இருக்கிறீர்கள். ஒரு புஷ் ஸ்டார்ட் இயந்திரம் என்பது, இருபத்தி ஐந்து வருடங்களுக்கு முந்தைய அம்பாசடர் போல், எஞ்ஜினை இயக்கத் தொடங்குவதற்கு முன், அதைத் தள்ளிவிடவேண்டிய ஒரு பழைய காரைப் போன்றது.

இப்போது, எல்லா கார்களுக்கும் செல்ஃப் ஸ்டார்ட் உள்ளது, அவற்றுள் பலவற்றுக்கும் தூர இயக்கி (remote start) கூட உள்ளது – இது ஒரு தொழில்நுட்ப முன்னேற்றம். நீங்கள் செல்ஃப் ஸ்டார்ட் ஆக இருப்பதற்காக, உங்களது தொழில் நுட்பத்தை உயர்த்திக்கொள்வதற்கு நீங்கள் விரும்புவீர்களா? நீங்கள் காலையில் கண் விழித்தால், நீங்களாகவே ஆனந்தம், அன்பு, மற்றும் உற்சாகத்துடன் ததும்புகிறீர்கள் – உங்களைத் தூண்டிவிட உங்களுக்கு யாரும் தேவைப்படுவதில்லை. நீங்கள் ஒரு செல்ஃப் ஸ்டார்ட் இயந்திரமாக ஆவதற்கு விருப்பம் கொண்டால், நீங்கள் எங்களிடம் வரவேண்டும்.

சங்கரன்பிள்ளையும், ‘நான் உன்னை நேசிக்கிறேன்’ என்பதன் தவறான பிரயோகமும்

உங்களுக்கு ஒரு நகைச்சுவை கூறட்டுமா. ஒரு நாள் மாலை நேரம், சங்கரன்பிள்ளை பூங்கா ஒன்றில் நடைபழகச் சென்றார். ஒரு பென்ச் மீது அழகான, இளம்பெண்ணொருத்தி அமர்ந்திருப்பதைக் கண்டார். அவரும் அதே பென்ச் மீது சென்றமர்ந்தார். சிறிது நேரம் கழித்து, அவர் சற்று நெருக்கமாக நகர்ந்தார். அவள் சற்றே விலகி நகர்ந்தாள். சில நிமிடங்களுக்குப் பிறகு, அவர் மீண்டும் சற்று நெருங்கி நகர்ந்தார். அவள் சிறிதளவு விலகி நகர்ந்தாள். மீண்டும், அவர் நெருக்கமாக நகர்ந்தார். இதற்குள், அவள் பென்ச்சின் மறுமுனைக்குச் சென்றுவிட்டதுடன், அவள் அவரை தூரமாகத் தள்ளிவிட்டாள்.

சூரியன் சரியான கோணத்தை அடைவதற்காக இரண்டு நிமிடங்கள் சங்கரன்பிள்ளை காத்திருந்தார். பிறகு, அவர் முழந்தாளிட்டு, “ நான் உன்னைக் காதலிக்கிறேன். என் வாழ்க்கையிலேயே நான் யாரையுமே நேசித்திராத அளவுக்கு உன்னை நான் காதலிக்கிறேன்”, என்றார். காதலின்பொருட்டு பெண்கள் முட்டாளாகிவிடமுடியும். ஒருவேளை அது மதியப்பொழுதின் இடைப்பட்டதாக இருந்திருந்தால், அவள் துளியும் நம்பியிருந்திருக்கமாட்டாள். ஆனால் சூரியன் மறைந்துகொண்டிருந்தது, சூழல் சரியாக இருந்தது, ஆகவே இயற்கை அதன் போக்கில் அனுமதித்தது. பிறகு, அவர் தன் கைக்கடிகாரத்தைப் பார்த்தார், நேரம் இரவு எட்டு மணியாகி இருந்தது. அவர் எழுந்துகொண்டவராக, “நான் போகவேண்டும்”, என்றார். அவள் கேட்டாள், “நீங்கள் எங்கே செல்கிறீர்கள்? என்னைக் காதலிப்பதாகக் கூறினீர்கள்!”. “என் மனைவி காத்துக்கொண்டிருக்கிறாள்; நான் போகவேண்டும்”, என்றார் அவர்.

“நான் உன்னைக் காதலிக்கிறேன்” என்பது எப்போதும் மக்கள் தங்களுக்கு வேண்டியதைப் பெறுவதற்கான “திறந்திடு சீசேம்” மந்திரச்சொல்லாகப் பயன்படுத்தப்படுகிறது. அவர்களது தேவைகள் உடலளவில், மனதளவில், உணர்ச்சியளவில், பொருளாதார அளவில், அல்லது சமூக அளவில் இருக்கலாம். இந்தத் தேவைகளைப் பூர்த்தி செய்துகொள்வதற்கு இந்த மந்திரம் பயன்படுத்தப்படுகிறது என்பதுடன், அது பாதி நேரங்களில் பலனளிக்கவும் செய்கிறது. ஆனால், காதலுடன் இருக்கும் ஆனந்தத்தை அனுபவிப்பது மிக முக்கியமானது. வாழ்க்கையில் உண்மையிலேயே பெரிய படிகளை எடுப்பதற்கு உணர்ச்சியின் இனிமை உங்களுக்குத் தேவையாக இருக்கிறது. உங்கள் இதயத்தில் அன்பின் இனிமை இல்லையென்றால், உலகத்தில் பெரிய படிகளை எடுக்க முயற்சிப்பது, விரக்திக்கு வழிவகுக்கக்கூடும்.