பஞ்சமுண்ட சாதனா: இந்த அதிர்ச்சியூட்டும் தாந்திரீக பயிற்சியின் நோக்கம் என்ன?

அடக்குமுறை மீது நாட்டமா, விடுதலையில் நாட்டமா?

ஆகவே, “அவர்களது நோக்கங்கள் என்ன?” என்ற கேள்வி எழுகிறது. அதிகாரத்துக்கான மனித ஆர்வம் வரம்பில்லாதது. மக்கள் பணம் சம்பாதிக்கலாம், அறிவியல் ஆராய்ச்சி செய்யலாம், தங்களைக் கல்வியில் மேம்படுத்திக்கொள்ளலாம், தேர்தலில் போட்டியிடலாம், அல்லது ஒரு துப்பாக்கியைக் கையிலெடுக்கலாம் – அதிகாரத்தின் தேடுதலில் அனைத்தையும் செய்யலாம். பஞ்சமுண்டா மற்றும் அதைப்போன்ற பயிற்சிகளும்கூட அதற்காகத்தான் இருக்கின்றன. அவர்கள் தங்களைச் சுற்றியுள்ள உயிர்களின் மீது ஆளுமை கொள்வதனால் அதிகாரத்தைப் பெறுவதற்கு விரும்புகின்றனர். ஆனால் உங்களைச் சுற்றியுள்ள மக்கள் மீது அடக்குமுறை செலுத்துவதால் நீங்கள் என்ன சாதிப்பீர்கள்?

வாழ்வின் இலக்கு முக்திதானே தவிர, அடக்குமுறை அல்லது அதிகாரம் அல்ல; தன்னிலிருந்தே விடுபடுவது, தான் சேர்த்துவைத்த பயனற்ற பொருட்களிலிருந்து, உடல் மற்றும் மனதின் வழிகளிலிருந்து, விலங்கு இயல்பிலிருந்து, மற்றும் வாழ்வின் இருமைகளிலிருந்து விடுபடுவது. ஆகவே, அத்தகைய பயிற்சிகள் அதிகாரத்தைக் கைப்பற்றுவது குறித்தவை என்பதால், நாம் அவற்றை விட்டுவிடுவோம்.

அச்சமூட்டும் முட்டை மர்மம்

அதற்குப் பிறகு, நான் மற்றொரு நபரிடம் சென்றேன். அவர் பழுப்பு மற்றும் செந்தூர வண்ணத்தில் கண்ணாடி பாட்டில்கள் வைத்திருந்தார். அவர் சில ஆவிகளைப் பிடித்து, பாட்டில்களில் அடைத்து வைத்திருப்பதாகக் கூறினார். அவர் மைசூர் நகர மாநகராட்சியில் ஒரு அதிகாரியாகப் பணிபுரிந்து கொண்டிருந்தார், ஆனால் மாலை வேளைகளில், அவர் ஒரு கருப்பு உடை அணிந்துகொண்டு மந்திரவாதியாக இருந்தார். அவரை நான் நட்பாக்கிக்கொண்டு, அவருடன் அமர்ந்திருந்தேன். அவரது 15-18 பாட்டில்களில் ஒரு பாட்டிலைப் பெறுவதற்காகக் காத்திருந்த தருணங்களில், அவர் எல்லாவித விசித்திரமான விஷயங்களையும் கூறினார். ஆனால் அந்த பாட்டில்களுக்கு அருகில் என்னை ஒருபோதும் நெருங்கவிடாமல் மிகவும் எச்சரிக்கையாக இருந்தார்.

அவர் ஒரு கோலம் வரைந்து, அதன் ஒவ்வொரு ஐந்து மூலையிலும் முட்டைகளை வைத்தார். அந்த ஐந்து முட்டைகளும் ஒரு சப்தத்துடன் தெறித்து உடைந்தன. அது, ஆவிகள் வந்துவிட்டதற்கான நிரூபணம் என்று அவர் கூறினார். இதனை நேரடியாக என் கண்முன்னே நான் பார்த்ததால், இது உண்மையாகவே எனக்கு ஆர்வமூட்டியது. ஒவ்வொரு முட்டையும் மற்றதிலிருந்து 8 – 9 சதுர அடி தொலைவில் இருந்த நிலையில், எப்படி முட்டைகள் வெடித்தன? முட்டைகளுக்குள் சிறு வெடிகளை அவர் வைத்திருப்பதற்கான வழியே இல்லை. அவை சாதாரணமான கோழி முட்டைகள்தான். “இது என்ன?” என்று நான் பார்த்துக்கொண்டும், சிந்தித்துக்கொண்டும் இருந்தேன்.

நான் கொல்லைப்புறம் சென்று, மேலும் கீழுமாக நடந்துகொண்டும், ஒவ்வொன்றையும் பார்த்தபடியும் சிந்தனையில் இருந்தேன். அப்போது மரத்திலிருந்து தொங்கிக்கொண்டிருந்த ஒரு கொய்யாப்பழத்தை நான் பார்த்தேன், கைதட்டினேன், அது விழுந்துவிட்டது. ஒரு கைதட்டலில் கொய்யாக்களை என்னால் விழவைக்கமுடிந்ததை நான் உணர்ந்தேன். எனது நண்பன் ஒருவனை அழைத்துவந்து, “இதைக் கவனி”, என்று கூறினேன். எனக்கு அப்போது 17 – 18 வயதுதான் ஆகியிருந்தது. நான் ஒரு பழத்தைச் சுட்டிக்காட்டினேன், மேலும் ஒரு கைதட்டலுக்குப் பிறகு, அது மண்ணில் விழுந்தது.

பிறகு என் ஒட்டுமொத்த உடலமைப்பிலும், மனரீதியாகவோ அல்லது உணர்ச்சிரீதியாகவோ இல்லாத, ஆனால் இரசாயனரீதியாக ஆழமான ஒரு நிலையில் கடுமையான விலகல் அல்லது வெறுப்புணர்வு ஊடுருவியது. இந்த விஷயங்களை மீண்டும் அந்த மாதிரி நான் ஒருபோதும் பயன்படுத்தமாட்டேன் என்பதை அறிந்துகொண்டேன். மறுபடியும் அந்த நபரிடம் ஒருக்காலும் செல்லவோ, பாட்டில்களில் இருந்த அவரது ஆவிகளில் விருப்பம் கொள்ளவோ இல்லை.