தாளம் தப்பினால்: இசைத் துறையிலும், அதைக் கடந்தும் மனநலப் பிரச்சனைகளை எப்படிக் குறைப்பது

சத்குரு: நமஸ்காரம். நீங்கள் பத்து வயதிலிருந்து இசை உருவாக்கத்தில் இருப்பதும், மற்றும் ஐந்து விதமான கருவிகளை இசைப்பதும் அற்புதமானது.

கேப்ரியெல்லா: உங்களுடன் பேசுவது பெருமையாக இருக்கிறது.

சத்குரு: தயவுசெய்து கூறுங்கள், நாம் எதைப்பற்றி பேசலாம்?

கேப்ரியெல்லா: நாம் மனநலம் குறித்துப் பேசலாம். எமது மனரீதியான ஆரோக்கியத்தை எப்படி கவனித்துக்கொள்வது?

சத்குரு: துரதிருஷ்டவசமாக, கலைஞர்களுக்கு, குறிப்பாக இசைக்கலைஞர்களுக்கு வழக்கத்தைவிட மிக அதிகமான மனநலப் பிரச்சனைகள் இருப்பதாகத் தோன்றுகிறது. சமீபத்திய கணக்கெடுப்பின்படி, நேர்காணல் செய்யப்பட்ட 1500 கலைஞர்களில், கிட்டத்தட்ட 73 சதவிகிதத்தினருக்கு மன அழுத்தமும், மனநிலை மாறுபடும் பிரச்சனைகளும் (bipolar) இருப்பதாகக் கூறுகிறது. இசை என்பது மனித வாழ்க்கையில் ஓர் அற்புதமாக இருக்கும் காரணத்தால், இசைக்கலைஞர்களின் இந்த நிலைமை மிகவும் துரதிருஷ்டவசமானது. இசைத் தொழில்துறை தான் இதற்கெல்லாம் காரணம் என்று நான் எண்ணுகிறேன். இசைமீதான காதலுக்காக மட்டும் மக்கள் தங்களை இசையில் ஈடுபடுத்திக்கொண்டால், அவர்கள் மிக அற்புதமாக செயல்படுவார்கள் என்று நான் நினைக்கிறேன்.

இசை என்பது குணப்படுத்தும் மகத்தான ஒரு ஹீலர். அது ஒருவரது வாழ்க்கையில் சமநிலை, அமைதி, ஆனந்தம் மற்றும் அன்பைக் கொண்டுவரக்கூடியது. ஆனால், துரதிருஷ்டவசமாக, இன்றைக்கு அது மனநிலையில் சமனற்ற தன்மைகளைக் கொண்டுவருகிறது. இது எல்லா இசைக்கலைஞர்களும் கவனித்துப் பார்க்கவேண்டிய ஒன்று என்று நான் நினைக்கிறேன். தாங்கள் மிகவும் நேசிப்பதைச் செய்யும் மக்களே மனரீதியாக நோயுற்றால், பிழைப்புக்காக மட்டும் எதையோ செய்துகொண்டிருக்கும் மற்ற அனைத்து மக்கள் குறித்து என்ன கூறுவது?

கேப்ரியெல்லா: ஆமாம், இதை நான் ஏற்றுக்கொள்கிறேன். ஒரு இசைக்கலைஞராக இருப்பது என்பது மிகவும் உணர்வுபூர்வமான தன்மை. இசையானது அதிக தாக்கம் ஏற்படுத்தும் விஷயங்களுள் ஒன்று, ஏனென்றால் ஒவ்வொருவரும் அதை நேசிக்கின்றனர். நீங்கள் எந்த மொழி பேசினாலும், ஒரு இசைக்கோர்வையைக் கேட்டு, அதனால் தாக்கத்துக்கு உள்ளாகமுடியும். தொழிலுக்காக மட்டும் இந்தத் துறையில் இருக்கும் மக்கள், சிலநேரங்களில் இந்த பலவீனத்தை அவர்களது சொந்த நலனுக்காக பயன்படுத்துகிறார்கள் என்று நினைக்கிறேன். ஒரு கலைஞர் என்ற வகையில், உங்களுக்குள் இருப்பதை உலகத்துக்கு வெளிப்படுத்துவதைத் தவிர வேறு வழி இல்லை.

எனது அனுபவத்தில், தூய்மையான இசை மற்றும் ஆனந்தத்தின் மீதான காதலால், அதிலிருந்து பலன் பெறுவதற்கும், நம்மைப் பயன்படுத்திக்கொள்வதற்கும், மக்களை அனுமதிக்கும்போது, அது நம்மை களைப்படையச் செய்வதுடன், உள்ளுணர்வின் குரலுக்கு செவிசாய்ப்பதும் கடினமாகிறது. ஏனென்றால் கலைஞர்களின் மனம் மற்றும் அவர்களது கற்பனைத் திறன் மீது தாக்கம் ஏற்படுத்துவதற்கு பலரும் முயற்சிக்கின்றனர். அதன் விளைவாக அதன் தூய்மை மாறிவிடுகிறது.