மகிழ்ச்சியாக இருப்பது எப்படி? மகிழ்ச்சிக்கான 10 குறிப்புகள்!

நாம் இன்றைக்கு மகிழ்ச்சியை எந்த அளவுக்குத் தீவிரமாக தேடுகிறோம் என்றால், இந்த பூமியின் வாழ்வே அச்சுறுத்தலில் இருக்கின்றது. மகிழ்ச்சியின் தேடுதலில் இருக்காதீர்கள். உங்களது மகிழ்ச்சியை உலகத்தில் எப்படி வெளிப்படுத்துவது என்பதை அறிந்துகொள்ளுங்கள். நீங்கள் உங்கள் கடந்தகால வாழ்க்கையைத் திரும்பிப் பார்த்தால், உங்கள் ஆனந்தத்தை வெளிப்படுத்தும் கணங்கள்தான் வாழ்க்கையின் மிக அழகான கணங்களாக இருக்கின்றனவே தவிர, நீங்கள் அதனைத் தேடிக்கொண்டிருக்கும்போது அல்ல.

நீங்கள் சேமித்து வைப்பது ஒருபோதும் உங்கள் தன்மையாக இருக்காது. நீங்கள் எதனை வெளிப்படுத்துகிறீர்களோ அதுதான் உங்கள் தன்மையாக இருக்கும். நீங்கள் உங்கள் ஆனந்தத்தை சேமித்து வைத்தால், உங்கள் வாழ்க்கையின் முடிவில், "அவள் ஒவ்வொரு துளி ஆனந்தத்தையும் தனக்குள் சேமித்து வைத்தாள்; அவளுக்கு மிக ஆனந்தமான இறப்பு" என்று யாரும் கூறமாட்டார்கள். அவர்கள், "இந்த மோசமான ஜந்து ஒருபோதும் தன்னுடைய வாழ்க்கையில் சிரிக்கக்கூட இல்லை" என்று கூறுவார்கள். ஆனால் நீங்கள் தினமும் உங்கள் ஆனந்தத்தையும், அன்பையும் வெளிப்படுத்தினால், மக்கள், "ஓ, அவள் ஒரு ஆனந்தமான, அன்பான உயிராக இருந்தாள்" என்று கூறுவார்கள்.

7. புன்னகை செய்யுங்கள்!

நீங்கள் காலையில் கண் விழித்தவுடன், புன்னகைப்பது தான் உங்கள் முதல் வேலையாக இருக்க வேண்டும். யாரைப் பார்த்து? ஒருவரைப் பார்த்தும் அல்ல. ஏனென்றால், நீங்கள் விழித்தெழுந்துவிட்ட உண்மை ஒன்றும் சிறிய விஷயமல்ல. நேற்றிரவு உறங்கிய இலட்சக்கணக்கான மக்கள் இன்று எழுந்திருக்கவில்லை, ஆனால் நீங்களும், நானும் விழித்தெழுந்து விட்டோம். நீங்கள் விழித்தெழுந்தது மகத்தான விஷயமல்லவா? அதனால், நீங்கள் விழித்து எழுந்துவிட்டதால் புன்னகைக்கவும். அதன்பிறகு, உங்களைச் சுற்றிலும் பார்த்து, அங்கு யாராவது இருந்தால் அவர்களைப் பார்த்து புன்னகை செய்யுங்கள். பலருக்கும், அவர்களது அன்புக்குரியவர்களாக இருந்தவர்கள், இன்று காலை எழுந்திருக்கவில்லை. ஆனால், உங்களுக்கு நெருக்கமான அனைவரும் விழித்து எழுந்துவிட்டார்கள் - வாவ்! இது ஒரு மகத்தான நாள், இல்லையா? அதன்பிறகு நீங்கள் சற்று வெளியே சென்று மரங்களைப் பாருங்கள். அவைகளும் நேற்றிரவு இறக்கவில்லை.

இதனை நீங்கள் கேலிக்குரியதாக நினைக்கலாம், ஆனால் உங்களது அன்புக்குரிய யாரோ ஒருவர், உறக்கத்திலிருந்து எழுந்திருக்காதபோது, நீங்கள் அதன் யதார்த்தத்தை அறிந்துகொள்வீர்கள். அதன் மதிப்பை அறிவதற்கு, அதுவரைக்கும் காத்திருக்க வேண்டாம். இது கேலிக்குரிய ஒன்றல்ல, இது மிகவும் மதிப்பு வாய்ந்தது – நீங்கள் உயிரோடு இருப்பது மற்றும் உங்களுக்கு முக்கியமானதாக உள்ள அனைத்தும் உயிரோடு இருப்பது. இந்தப் பேரழிவான இரவில், பல மனிதர்களும், மற்ற பலரின் அன்புக்கு உரியவர்களும் விழித்து எழுந்திருக்காதபோது, நீங்களும், உங்கள் அன்புக்கு உரியவர்களும் எழுந்துவிட்டீர்கள். இது ஒரு அற்புதமான சம்பவம் அல்லவா? அதனைப் பாராட்டி, குறைந்தபட்சம் புன்னகை செய்யுங்கள். ஒரு சில மனிதர்களையாவது அன்பாக பார்ப்பதற்கு கற்றுக்கொள்ளுங்கள்.

8. புன்னகைப்பதற்கு உங்களுக்கு நீங்களே ஞாபகப்படுத்திக் கொள்ளுங்கள்!

பல மனிதர்களுக்கு, இதையெல்லாம் ஒரு மணி நேரத்திலேயே மறக்கமுடியும் என்பதுடன், வெகுவிரைவிலேயே அவர்களது ஊர்வன மூளை (reptilian brain) யாரையாவது கடிக்கவும் விரும்புகிறது. அதனால் ஒரு மணிநேரத்திற்கு ஒருமுறை, வாழ்க்கையின் மதிப்பைப் பற்றி உங்களுக்கே ஞாபகப்படுத்திக் கொள்ளுங்கள். நீங்கள் சிறிதும் உணர்திறனே இல்லாதவர் என்றால், ஒவ்வொரு அரை மணிநேரத்திற்கு ஒருமுறை உங்களுக்கு நீங்களே ஞாபகப்படுத்திக் கொள்ளுங்கள். நீங்கள் முழுவதுமாக உணர்திறனே இல்லாதவர் என்றால், ஒவ்வொரு ஐந்து நிமிடத்திற்கு ஒருமுறை, உங்களுக்கு நீங்களே ஞாபகப்படுத்திக் கொள்ளுங்கள். இதனை உங்களுக்கு நீங்களே ஞாபகப்படுத்திக் கொள்வதற்கு பத்து நொடிகளே தேவைப்படுகிறது. இதை இரண்டே இரண்டு நொடிகளிலும்கூட நீங்கள் செய்யலாம் – "நான் உயிருடன் இருக்கிறேன், நீங்கள் உயிருடன் இருக்கிறீர்கள், வேறென்ன வேண்டும்?"

9. உங்களுக்குள் இருப்பதை மாற்றத்துக்கு உள்ளாக்குங்கள்

தற்போது உங்கள் வாழ்க்கையின் தரம், நீங்கள் அணியும் ஆடைகளாலோ, உங்கள் கல்வித் தகுதிகளினாலோ, எந்தக் குடும்பப் பின்னணியில் இருந்து நீங்கள் வந்திருக்கிறீர்கள் என்பதிலோ அல்லது நீங்கள் வைத்திருக்கும் வங்கி இருப்புகளாலோ நிர்ணயிக்கப்படுவதில்லை. மாறாக, உங்கள் வாழ்க்கைத் தரமானது, நீங்கள் எந்த அளவுக்கு உங்களுக்குள் அமைதியாகவும், ஆனந்தமாகவும் இருக்கிறீர்கள் என்பதையே சார்ந்துள்ளது.

யாரோ ஒருவர் உணவு இல்லாமலும், மற்றும் உயிர் வாழ்வதற்குத் தேவையான அடிப்படைத் தேவைகள் இல்லாமலும் இருந்தால், கண்டிப்பாக அவர் உடலளவில் துன்பம் அடையமுடியும். அது கவனிக்கப்பட வேண்டியது. அப்படிப்பட்ட மக்களுக்கு, முதலில் அந்த விஷயங்களில் நாம் கவனம் செலுத்த வேண்டும். ஆனால் பெரும்பாலானவர்களுக்கு, அவர்களின் தேவைகள் ஒரு முடிவில்லாத பட்டியலாக உள்ளது. வீதியில் நடந்து செல்லும் மனிதரைவிட, கார் ஓட்டிச் செல்லும் மனிதர் மகிழ்ச்சியாக இருக்கிறார் என்று நீங்கள் நினைக்கிறீர்களா? இல்லை. உங்களிடம் என்ன இருக்கிறது என்பதால் அது முடிவு செய்யப்படுவதில்லை. நீங்கள் அந்தக் கணத்தில் எப்படி இருக்கிறீர்கள் என்பதையே அது சார்ந்துள்ளது. 

10. மற்றவர்களுடன் ஒப்பிடுவதை நிறுத்துங்கள்

பெரும்பாலான மனிதர்கள், அவர்களிடம் இல்லாத ஏதோவொன்றுக்காகத் துன்பப்படவில்லை. அவர்கள் தங்களை வேறொருவருடன் ஒப்பிட்டுப் பார்க்கின்றனர். நீங்கள் ஒரு மோட்டர் பைக்கில் செல்லும்போது, மற்றொருவர் ‘மெர்சிடீஸ்’ காரில் செல்வதைப் பார்த்து, உங்களுக்கு நீங்களே துன்பம் ஏற்படுத்திக்கொள்கிறீர்கள். சைக்கிள் ஓட்டிச் செல்லும் ஒருவருக்கு, நீங்கள் மோட்டர் பைக்கில் செல்வதை  பார்க்கும்போது, அது அவருக்கு ஒரு ‘லிமோஸின்’ உல்லாசக் காராக இருக்கிறது. வீதியில் கால்நடையாக நடந்து செல்லும் யாரோ ஒருவர், சைக்கிளைப் பார்த்து, “வாவ், எனக்கு மட்டும் அது கிடைத்திருந்தால், என் வாழ்க்கையில் என்னவெல்லாம் நான் செய்திருப்பேன்!” என்று நினைக்கிறார். இது ஒரு முட்டாள்தனமான விளையாட்டு என்பதுடன், தொடர்ந்து இது நிகழ்ந்துகொண்டும் இருக்கிறது.

மகிழ்ச்சியாக இருப்பதற்கு, வெளிச்சூழ்நிலைகளை சார்ந்திருக்கும் அனைவருமே, தங்கள் வாழ்வில் உண்மையான ஆனந்தத்தை ஒருபோதும் அறிந்துகொள்ளமாட்டார்கள். நாம் உள்முகமாகப் பார்த்து, நமது நலனை எப்படி நாமே உருவாக்கிக்கொள்வது என்பதை பார்க்க வேண்டிய நேரம் இது. உங்களது உள்தன்மை மாறினால்தான், உண்மையான நல்வாழ்வு கிடைக்கும் என்பதை உங்கள் வாழ்க்கை அனுபவத்திலிருந்தே நீங்கள் தெளிவாகப் பார்க்கமுடியும். நீங்கள் ஆனந்தமாக இருப்பதற்கு, வெளிச்சூழ்நிலைகளைச் சார்ந்திருந்தால், நீங்கள் புரிந்துகொள்ள  வேண்டியது என்னவென்றால், வெளிச்சூழ்நிலையானது 100% நீங்கள் விரும்பியவாறு ஒருபோதும் நிகழ்வதில்லை. இதுதான் யதார்த்தம் என்பதால், குறைந்தபட்சம் இந்த ஒரு நபராவது – அதாவது நீங்கள் – எப்படி இருக்கவேண்டும் என்று நீங்கள் விரும்புகிறீர்களோ அந்த விதமாக இருக்கவேண்டும். நீங்கள் விரும்புகிற விதமாக நீங்களே இருப்பது நிகழ்ந்துவிட்டால், ஆனந்தமாக இருப்பதுதான் இயற்கையான தேர்வு. இதனை நீங்கள் எங்கும் தேடிச் செல்ல வேண்டியதில்லை. நீங்கள், உங்களது உண்மையான தன்மைக்கு மாறிவிட்டால், நீங்கள் ஆனந்தமாகத்தான் இருப்பீர்கள்.