சத்குரு: இந்தப் பிரதிஷ்டையில் ஈடுபடக் கூடியவர்களுக்காக 90 நாள் ஹோல்னஸ் பயிற்சி நடைபெற்றது. அதில் ஏறக்குறைய 70 பேர் பங்கேற்றனர். அந்த 70லிருந்து 14 பேரைத் தேர்ந்தெடுத்து தியானலிங்கப் பணிக்கு பயன்படுத்துவதுதான் நோக்கமே. ஒரே நிலையிலான உடல், மனம், உணர்வு போன்றவற்றில் ஒன்றுகிற 14 பேரை உருவாக்குவது, அவ்வளவு எளிதல்ல. அதற்கென்று பெரும் முயற்சி எடுக்கப்பட்டது. ஆனால், அது நிகழவில்லை. எனவே இரண்டே பேரை வைத்துக்கொண்டு இன்னமும் தீவிரமான முறையில் மேற்கொள்ள முடிவு செய்தோம்.

அந்த இரண்டுபேரும் என்னோடு இணைந்து சக்திநிலையில் ஒரு முக்கோணத்தை உருவாக்கிய பிறகு அவர்களுடைய மனம், உணர்வுகள், சக்திநிலை எல்லாம் ஒன்றாக வேண்டிய சூழல் ஏற்பட்டது. ஒரு மனிதருக்கு இடது முழங்காலில் ஏதோ ஒரு வலி ஏற்பட்டால், மற்ற இரண்டுபேரும் அதேபோல் இடது முழங்காலில் உணர்வார்கள். இது இவர்கள் வாழ்க்கை. இது அவர்கள் வாழ்க்கை என்பதெல்லாம் இன்றி எல்லாம் ஒன்றாகக் கலந்திருந்தது. 

இந்த முக்கோண வியூகத்தை அமைப்பதன் நோக்கமே, சக்திநிலையை ஏற்படுத்தி என் குருவின் சக்திநிலையை வரவேற்று தியானலிங்கத்தின் பிராணப் பிரதிஷ்டை செய்வதுதான். அது நிகழ வேண்டுமென்பது அவருடைய கனவு. எனவே அதை நான்
செய்யவேண்டும் என்று நினைக்கவில்லை. அவர் வந்து செய்யவேண்டும் என்று எதிர்பார்த்தேன். அதனால் தான் பல்வேறு நிலைகளில் முக்கோண வியூகம் அமைக்கப்பட்டிருந்தது. மெல்ல மெல்ல இந்த சக்திநிலை வெவ்வேறு தளங்களுக்கு உயர்ந்தது. ஒவ்வொரு படிநிலையிலும் மிக வித்தியாசமான பரிமாணங்களை இந்த முக்கோணம் ஏற்றது. அது எந்த நிலைக்கு உயர்ந்தது என்றால், முழுவதும் கரைந்து போய்விட்ட அந்த உயிர், முழுக்க விடுதலையடைந்து முக்தியடைந்த உயிர், திரும்ப வந்து தன்னைத்தானே பிராணப் பிரதிஷ்டையில் ஈடுபடுத்திக்கொள்கிற அளவுக்கு அந்த சக்திநிலை உயர்ந்து கொண்டிருந்தது.

சக்திநிலையின் முக்கோணம் என்று சொல்கிறபோது, எல்லா நிலைகளிலேயும் அங்கிருக்கிற தனிமனிதர்களின் தனித்தன்மை உருகிவிடவேண்டும். முக்கோணத்தை உருவாக்க வேண்டுமானால் பலவகைகளில் இந்த மூவரையும் இணைக்கவேண்டும். பல விதங்களில் இந்த தனித்தனிக் கட்டமைப்புகள் தளர்த்தப்படவேண்டும். அதை வேறுவிதமாக சொல்வதென்றால், இந்த மூவரும் ஒருவித சமாதிநிலையில் இருப்பார்கள். அப்போது அவர்கள் உடலோடு தொடர்பு மிகக் குறைவாக இருக்கும். ஒரு மனித வடிவம் இன்னொரு மனித வடிவத்திற்கு நீட்டிக்கப்பட்டது. சக்திநிலைகள் இப்படி நீட்டிக்கப்பட வேண்டுமேயானால், சக்திநிலை இப்படி இளகிய நிலைக்கு வந்து ஒரு முக்கோணத்தை அமைக்க வேண்டுமேயானால், அது மிக மிக சூட்சுமநிலையை எட்டவேண்டும். இத்தகைய சக்தியோடு ஒரு முக்கோணத்தை உருவாக்குகிறபோது அது பெரிய வியூகத்தை அமைக்கிறது. மிக மேம்பட்ட சக்திநிலைகள் அங்கே ஈர்க்கப்படுகின்றன. விடுதலை, முக்தி தேடுகிற அத்தனை உயிர்களும் அங்கே ஈர்க்கப்படுகின்றன. அதை நீங்கள் தெய்வீக உயிர்களின் பிரபஞ்சம் என்று அழைக்கிறீர்கள். அப்படித்தான் அந்த வியூகம் செயல்படுகிறது. இந்த சக்திநிலைகளைப் பயன்படுத்தித்தான் லிங்க வடிவம் உருவாக்கப்பட்டது.

இத்தகைய சம்பவங்களை நிகழச் செய்கிறபோது நாம் செய்கிற வேலையில் ஒரு சிறு தவறு கூட இருக்கக்கூடாது. அப்படி ஏதாவது செய்தால் என் உடலில் ஏதாவது சிக்கல்கள் இருக்கக்கூடும். அது சக்திநிலையில் சில மாற்றங்களை ஏற்படுத்தக்கூடும். நான் இன்னும் உடலில்தான் இருக்கிறேன். உடல் எப்போதுமே மிக சரியாக இருப்பது கிடையாது. உடலுக்கென்று பல விஷயங்கள் நிகழும். உதாரணத்திற்கு நான் சாப்பிட்ட உணவின் காரணமாக என் முதுகில் வலி இருக்கலாம். எனக்கு ஒரு சிறு ஜலதோஷம் பிடித்திருக்கலாம். இவையெல்லாம் அந்த லிங்கத்தில் வெளிப்படக்கூடும். எனவே, நான் என் குருவின் சக்தியை பயன்படுத்த விரும்பினேன். அந்த முறையில் பயன்படுத்தப்பட்டால் அந்தப் பணி முழுக்க முழுக்க நிறைவாக முடியும். யாராலும் அதில் குற்றம் கண்டுபிடிக்க முடியாது. அது அணு அளவு குற்றம்கூட நிகழ்ந்திருக்காது.