நீங்கள் உண்ணும் உணவிற்கும் உங்கள் மனநலத்துக்கும் இடையே உள்ள ஆச்சரியமான தொடர்பு

இந்த பெருந்தொற்று காலகட்டத்தில் உலகெங்கிலும் உள்ள மனநல மருத்துவர்கள் தொடர்ந்து அதிகரித்துக் கொண்டே செல்லும் தங்களின் சேவையின் தேவைக்கு ஈடுகொடுக்க முடியாமல் போராடுகிறார்கள். மனநோய்க்கான அடிப்படையான ஒரு காரணத்தை இங்கிலாந்தைச் சேர்ந்த பிரபலமான மனநல நிபுணர்கள் அடங்கிய குழுவினருடன் சமீடத்தில் நடந்த உரையாடலின் போது வெளிப்படுத்தினார் சத்குரு. மேலும், யோகக் கண்ணோட்டத்திலிருந்து, எதனை, எவ்வாறு உண்பது என்பதைக் குறித்தும் சத்குரு அப்போது வழிகாட்டுதல் வழங்கினார். அதன் தொகுப்பு இங்கே நமக்காக.

பேராசிரியர் ஸ்வரன்: சத்குரு, மனப்பிறழ்வு ஏற்படுவதற்கான அடிப்படைக் காரணம் என்ன?

நீங்கள் எதனை, எவ்வாறு பெறுகிறீர்கள் என்பது முக்கியம்

சத்குரு: நாம் சாப்பிடும் முறையானது, மனநோய் ஏற்படுத்துவதில் ஒரு மிகப் பெரும் பங்காற்றுகிறது. விழிப்புணர்வு இல்லாமல் பல்வேறு நிலைகளில் நாம் உட்கொள்ளும் இரசாயனங்கள் மற்றும் ஹார்மோன்கள் இன்று மனநோய்களின் அபாயகரமான ஒரு பகுதியாக இருக்கிறது. நாம் உணவை எவ்வாறு உட்கொள்கிறோம் என்பதும் மிக முக்கியமானது. சக்தி ஊட்டம் பெறுவது உட்பட, உயிரானது எத்தனையோ நிலைகளில் பெற்றுக்கொள்கிறது. இந்தியாவில் நாம் ஏதோ ஒன்றைப் பெற்றுக்கொள்ளும்போது நாம் கால்களை சம்மணமிட்டு அமர்ந்து கொள்கிறோம். ஏனெனில் நமது உடலின் கீழ்ப்பகுதியில் இருந்து பெறுவதற்கு நமக்கு விருப்பமில்லை. எதனையும் நேர்மறையாக நமது உடலின் மேற்பகுதியில் இருந்து பெறுவதற்கு நாம் விரும்புகிறோம். நாம் உணவு உண்டால், முதலில் கால்களை சம்மணமிட்டுக் கொள்கிறோம். சக்தி நிரம்பியதாக நாம் கருதும் ஒரு இடத்துக்கு சென்றால், நாம் கால்களை சம்மணமிட்டு, நமது கைகளைத் திறந்த நிலையில் வைத்துக்கொள்கிறோம்.

Sadhguru: The way we eat is a very big part of mental illness. The way we are unconsciously ingesting chemicals and hormones at various levels is a serious part of mental illnesses today. How we ingest food is also important. Life receives on so many levels, including the energetic level. In India, when we receive something, we sit with crossed legs because we do not want to receive from the lower part of our body. We want to receive anything positive from the upper part of our body. If we eat, we first cross our legs. If we go to a place that we think is energetically strong, we cross our legs and keep our hands open.

இராமனிடம் இருந்து நாம் கற்றுக்கொள்ள வேண்டிய 4 மிக சக்திவாய்ந்த வாழ்க்கைப்பாடங்கள்

இராமன் தன் வாழ்க்கை முழுவதும், குறிப்பாக இதயத்தை நொறுக்கும் இழப்பு மற்றும் சோகமான தருணங்களிலும், அவர் வெளிப்படுத்திய காலத்தால் அழியாத ஞானத்தைப் பற்றி சத்குரு விவரிக்கிறார். ஆயிரக்கணக்கான வருடங்களுக்கு முன்பு அற்புதமான உதாரணமாக இருந்த இராமன் இன்றளவும் - குறிப்பாக முன்பு எப்போதும் இல்லாத இதைப்போன்ற காலக்கட்டத்தில் - ஏன் மிகப்பொருத்தமாக இருக்கிறார் என்ற காரணத்தை இங்கு அறிந்து கொள்ளுங்கள்.

சத்குரு: இராமன் எப்போதும் "புருஷோத்தமன்" என்று அறியப்படுகிறார். அதற்கு, "உயர்ந்த நிலையில் உள்ள ஒரு மனிதன்" என்பது பொருள். அவர் பல சோதனைகளை, பெருந்துயரங்களை, தொடர்ச்சியான பல அழிவுகளைச் சந்தித்தார். தன் நாட்டை இழந்தார், பின்னர் தன் மனைவியை இழந்தார், ஒரு யுத்தம் செய்யவேண்டியிருந்தது. பின்னர் நாடு திரும்பி, மீண்டும் தன் மனைவியை இழந்ததுடன், தன் சொந்தக் குழந்தைகளையே ஏறக்குறைய கொல்ல வேண்டிய சூழல் ஏற்பட்டது. ஆனால் அவை அனைத்தையும் அவர் அமைதியாகவும், மகிழ்ச்சியுடனும் எதிர்கொண்டார். தனிப்பட்ட அளவில் அவர் அதிக வலியை அனுபவித்து, அதை அவர் வெளிப்படுத்தியிருந்தாலும், அந்த வலி அவர் செய்த எந்தச் செயலையும் தீர்மானிக்க அவர் ஒருபோதும் அனுமதிக்கவில்லை. ஒரு மனிதர் இவ்வாறு செயல்படும்போது, அவரை நாம் "புருஷோத்தமன்" என்று அழைக்கிறோம் - ஏனெனில் அவர் மனிதர்களுக்கிடையே உயர்ந்த நிலையில் இருக்கிறார்..

சமஸ்க்ரிதி - சமநிலை மற்றும் உற்சாகம் ஒருசேர இருப்பது

நாம் இராமனை வணங்குவது அவர் மிகவும் வெற்றிகரமாக இருந்தார் என்பதற்காக அல்ல. நாம் அவருடைய குணநலன்களுக்காக அவரை வணங்குகிறோம். வாழ்க்கை அவர் மீது எதனை எறிந்தாலும், அவர் சமநிலை குலையாமல் இருந்தார். வாழ்க்கை உங்களுக்கு என்ன செய்கிறது என்பது எப்போதும் உங்கள் தேர்வு அல்ல, ஆனால் நீங்கள் என்ன செய்கிறீர்கள் என்பது உங்கள் தேர்வு. இது தான் கர்மா என்பதன் பொருள். அவர் தன் கர்மாவுக்கு முழுப் பொறுப்பேற்றுக் கொண்டார். உலகம் அவருக்கு எல்லா விதமான விஷயங்களையும் செய்தது, ஆனால் அவர் – எந்தக் கசப்பும், வெறுப்பும், கோபமும் அடையாமல் - தான் செய்யத் தேவையானவைகளைத் தொடர்ந்து செய்து கொண்டேயிருந்தார்.

அவருக்கு மிக மோசமான விஷயங்கள் இழைக்கப்பட்டன - ஆனால் அவர் சமஸ்க்ரிதியில் இருந்தார். "சம்" என்றால் சமநிலையுடன், உற்சாகமாகவும் இருப்பது. "க்ரிதி" என்றால் செயல். சமஸ்க்ரிதி என்றால் வாழ்வை சமநிலையோடு உற்சாகத்தோடு வாழ்வது. சம நிலைதான், ஆனால் மரணத்தில் இருப்பதைப் போன்ற சமநிலை அல்ல. உற்சாகம்தான், ஆனால் போதையில் இருப்பதைப் போன்றதல்ல. இராமன் அதற்கான ஒரு எடுத்துக்காட்டாக இருந்தார். அவர் தன் வாழ்வை முழு ஈடுபாட்டோடும் சமநிலையோடும் நடத்தினார். ஒரு மனிதர், வாழ்வில் என்ன நிகழ்ந்தாலும் - ஏழ்மை, செல்வம், வெற்றி, தோல்வி - எதுவாக இருந்தாலும் அதனால் பாதிக்கப்படாமல் தன் மனிதத்தன்மையை இழக்காமல் வாழ்ந்தால், உண்மையிலேயே அவர்தான் ஒரு வெற்றிகரமான மனிதர் என்று இந்தக் கலாச்சாரம் கருதுகிறது.

கண்மூடித்தனமான மதிப்பீடுகள் ஏன் எப்போதும் தவறானவை

இராமாயணத்தில் ஒரு அழகான சம்பவம் நிகழ்ந்தது. சதி செய்யப்பட்ட பிறகு, இராமன் நாட்டைத் துறந்து, கானகத்தில் கடினமான ஒரு வாழ்க்கையை வாழ்ந்து வந்தபோது, அவர் மனைவியை இராவணன் கடத்திச் சென்றான். தன் மனைவி மீது கொண்டிருந்த மிகுதியான அன்பால், மனைவியின் நிலையை எண்ணி மனம் தளர்ந்து, கவலையுற்று இருந்த இராமர் நடந்தே தெற்கை அடைந்து, தமிழ் மக்களோடு சேர்ந்து ஒரு படை திரட்டி, கடல் கடந்து இலங்கை சென்று, போர் தொடுத்தார். போரின் முடிவில் பத்துத் தலை இராவணனைக் கொன்றார்.

போரை வென்ற பின்னர், இராமன் கூறினார், "நான் இராஜ்ஜியத்திற்குத் திரும்பிச் செல்ல விரும்பவில்லை. இமாலயத்துக்கு சென்று அங்குள்ள அகத்தியர் குகையில் சில காலம் கழிக்க விரும்புகிறேன். ஏனெனில் நான் செய்த மிகப்பெரிய பாவத்துக்கான பிராயச்சித்தம் தேட விரும்புகிறேன். பக்தியுடையவராக, சிவனின் மகத்தான பக்தராக, பிரமிக்கத்தக்க அறிஞராக, மாபெரும் அரசனாக, கொடையுள்ளம் கொண்ட மனிதராகவும் இருந்த ஒருவரை நான் கொன்றுவிட்டேன்." மற்றவர்கள் திகைத்து போயினர். லட்சுமணன் அவரைப்பார்த்து "நீங்கள் எதைப்பற்றிக் கூறுகிறீர்கள்? இராவணன் உங்கள் மனைவியைக் கடத்திச் சென்றான்”, என்று கூறினான். அதற்கு இராமன், " எல்லா வகையான எதிர்மறை குணங்களும் பேராசை, பொறாமை, காமம் போன்றவை அவனது மற்ற ஒன்பது தலைகளில் குடிகொண்டிருந்தன. ஆனால் ஞானம், அறிவு, பணிவு, பக்தி ஆகியவற்றைக் கொண்டிருந்த ஒரு தலை இருந்தது. நான் அந்தத் தலையைக் கொன்றுவிட்டதற்காக வருந்துகிறேன்”, என்று பதில் கூறினார்.

இந்தக் கதை உங்களுக்கு உணர்த்த முயற்சிப்பது என்னவென்றால், உங்கள் அனைவரிடமும் பத்து அல்லது அதற்கு மேற்பட்ட தலைகள் உள்ளன. ஒரு நாள் உங்கள் தலை பேராசையில் இருக்கிறது, மற்றொரு நாள் பொறாமையில், மற்றொரு நாள் வெறுப்பில், இன்னுமொரு நாள் அன்பில், அடுத்த நாள் அழகாக இருக்கிறது, அதற்கடுத்த ஏதோ ஒரு நாள் அசிங்கத்தில் மூழ்கி இருக்கிறது. நீங்கள் பொறாமையில் இருக்கும் ஒரு தருணத்தில் மக்கள் உங்களைப் பார்த்தால், "இவர் பொறாமையானவர்," என்று கூறுகிறார்கள். நீங்கள் பேராசையில் இருக்கும் தருணத்தில் அவர்கள் பார்த்தால், "இவர் பேராசையானவர்”, என்று கூறுகிறார்கள். நீங்கள் வெறுப்பில் இருக்கும் தருணத்தில் அவர்கள் பார்த்தால், "இவர் வெறுப்புடையவர்”, என்று கூறுகிறார்கள். நீங்கள் காமஉணர்வில் இருக்கும் தருணத்தில் பார்த்தால், "இவர் காமாந்தகர்”, என்று கூறுகிறார்கள். வெவ்வேறு தருணங்களில் வெவ்வேறு தலைகள் செயல்படுகின்றன. ஆனால் ஒவ்வொருவருக்கும் அன்பு, அழகு, கொடைத்தன்மை, கருணை குடிகொண்டிருக்கக்கூடிய குறைந்தபட்சம் ஒரு தலையாவது இருக்கிறது. மக்கள் செய்யும் மிகப்பெரிய தவறு என்னவென்றால் குணத்தைக் கண்டிப்பதை விடுத்து அந்த மனிதரைக் கண்டனம் செய்கின்றனர். இதை தான் இராமன் உணர்த்த முயற்சிக்கிறார்: "மற்ற ஒன்பது தலைகளைக் கொண்டு அவன் மிக மோசமான செயல்களைச் செய்தான். ஆனால் பிரம்மாண்டமான சாத்தியத்தோடு கூடிய அந்த ஒரு தலையை நான் கண்டேன். ஆனால் துரதிர்ஷ்டவசமாக, அதை நான் வீழ்த்த வேண்டியிருந்தது."

ஒரு தலைவனுக்கு, குடும்பத்தை விட நாடு முதன்மையானதாக இருக்க வேண்டும்

பதினான்கு ஆண்டுகள் வனவாசம் முடிந்த பிறகும் இராமன் நாடு திரும்புவதற்கு கூடுதலாக ஒரு வருடம் எடுத்துக்கொள்கிறார். ஏனென்றால் பக்தனாகவும் ஆனால் அவரின் மனைவியை கவர்ந்து சென்றவனாகவும் இருந்த இராவணனைக் கொன்ற காரணத்தால், இராமன் மேலும் ஒரு வருடம் தவத்தில் ஈடுபட்டார். அது போதாது என்பதைப்போல், சில அரசியல் சூழல்கள் உருவானதால், அவர் மனைவி கருவுற்று இருந்தபோது, அவளை மீண்டும் அவர் காட்டுக்கு அனுப்பினார்.

ஒரு அரசனுக்கு, அவரது அரசி கருவுற்று, இராஜ்ஜியத்துக்கு ஒரு வாரிசு வழங்குவது என்பது மிக முக்கியமான ஒன்று. இராமன் தன் மனைவியை மிகவும் நேசித்தார். அவரின் உலகமாக அவள் இருந்தாள். அப்படி இருந்தாலும் தன் குடிமக்களை முன்னிறுத்தி, அவளைக் காட்டிற்கு அனுப்பினார். அங்கு அவள் இரட்டைக் குழந்தைகளைப் பெற்றெடுத்தாள். இதை அறியாமல், அவர் தன் குழந்தைகளை ஏறக்குறைய கொல்லும் அளவுக்குச் சென்றது மிகக் கொடுமையான ஒன்று. மேலும், அவர் தனது அன்புமனைவியை மறுபடி பார்க்கவே இல்லை. அவள் காட்டிலேயே இறந்துவிட்டாள். மக்கள் என்னிடம், "அவர் தன் மனைவியிடம் நியாயமாக நடந்து கொண்டாரா? இதுதான் குடும்பத்தை நடத்தும் விதமா?", என்று கேட்பதுண்டு. நீங்கள் ஒரு சாதாரண மனிதராக இருந்தால், இது ஒரு நல்ல கேள்வி. .ஆனால் நீங்கள் ஒரு அரசனாக, அல்லது ஒரு நாட்டின் தலைவனாக இருக்கும்பட்சத்தில், தன் குடும்பத்தை விட நாட்டை உயர்ந்த இடத்தில் வைக்கும் ஒருவர்தான் நமக்கு வேண்டும். இந்தக் காரணத்தினால் தான் நாம் அந்த மனிதருக்குத் தலைவணங்குகிறோம்.

கர்மா:

முன்னதாகவே விதிக்கப்பட்ட கட்டுப்பாடா அல்லது உங்கள் வாழ்வை நீங்களே வடிவமைக்க வழங்கப்பட்டுள்ள அதிகாரமா?

ஜெர்மன் நாட்டைச் சேர்ந்த வாழ்வியல் பயிற்சியாளர் லாரா மலினா சைலர் சத்குருவிடம் கர்மாவைப் பற்றி பொதுவாக நிலவி வரும் தவறான கருத்துகளைக் குறித்து தெளிவுபடுத்தும்படி கேட்டுக்கொண்டார். அதற்கு பதிலளித்த சத்குரு கர்மாவின் உண்மையான அர்த்தம், அது செயல்படும் விதம், அதனைக் கொண்டு ஒருவர் தன் விதியை தானே எவ்வாறு தீர்மானிக்க முடியும் என்பது போன்ற விஷயங்களை விளக்கினார்.

லாரா: நீங்கள் தற்போது கர்மாவைப் பற்றி அருமையான ஒரு நூலை எழுதியுள்ளீர்கள். இது குறித்து நான் மிக உற்சாகம் கொள்கிறேன். ஏனெனில், மேற்கத்திய நாடுகளில் கர்மாவைப் பற்றி மிகத்தவறான புரிதல் உள்ளது என்றே நான் உணர்கிறேன். மக்கள் அது ஏதோ தண்டனை போலவோ அல்லது அதனை உங்களால் மாற்ற முடியாது என்றும் நினைக்கின்றனர். கர்மாவைப் பற்றிய உங்கள் கருத்துகளை கேட்க நான் ஆர்வமாக உள்ளேன்.

சத்குரு: கர்மா என்பதற்கு பொருள் - செயல். உயிர் வாழும் மனிதர்களாகிய நாம் என்ன செய்தாலும் சரி, உறக்கம் விழிப்பு என எந்த நிலையில் இருந்தாலும் சரி, அடிப்படையில் நாம் நான்கு நிலைகளில் செயல்புரிகிறோம். உடல் சார்ந்த செயல்கள் தொடர்ந்து நிகழ்ந்துகொண்டே இருக்கிறது - நீங்கள் விரும்பினாலும் விரும்பாவிட்டாலும். நீங்கள் அதை கூட்டவோ குறைக்கவோ முடியும், ஆனால் அதை முற்றிலுமாக உங்களால் நிறுத்த முடியாது. அடுத்ததாக, மனம் சார்ந்த செயல்முறைகள், உணர்வு சார்ந்த செயல்முறைகள் மற்றும் சக்தி சார்ந்த செயல்முறைகள் - அதாவது, உங்கள் உயிர்சக்தியின் செயல் - ஆகியவை உள்ளன. இந்த நான்கு பரிமாணங்களிலும் எப்போதும் செயல்கள் நிகழ்ந்து கொண்டிருக்கின்றன - உங்களது விழிப்பு மற்றும் உறக்கம் இரண்டு நிலையிலும். ஆனால் இன்று காலை கண் விழித்ததில் இருந்து இதுவரையிலும் நீங்கள் செய்துள்ள உடல் சார்ந்த, மனம் சார்ந்த, உணர்வு சார்ந்த, சக்தி சார்ந்த செயல்களை உண்மையாக உற்று நோக்கினால், அவற்றில் பெரும்பாலானவை விழிப்புணர்வு இல்லாமல் நிகழ்ந்திருக்கின்றன என்பதை நீங்கள் கண்டு கொள்வீர்கள். மீதம் உள்ள பெரும்பாலான செயல்கள் அனைத்துமே, நீங்கள் கிரகித்துள்ள பல்வேறு உள்ளீடுகளின் காரணமாக தவிர்க்க இயலாச் செயல்களாக கட்டாயமாக நிகழ்கின்றன.

இப்போது நீங்கள் ஒரு காரை ஓட்டிக் கொண்டிருக்கிறீர்கள், ஆனால் ஒரு சதவிகித நேரம் மட்டுமே விழிப்போடு இருக்கிறீர்கள் என்று வைத்துக்கொள்வோம். அதன் விளைவு என்னவாக இருக்கும் என்பதை நீங்களே அனுமானித்துவிட முடியும். அதேதான் மக்களின் வாழ்விலும் நிகழ்கிறது. ஏனெனில் அவர்கள் தங்கள் உடல், மனம், உணர்ச்சி மற்றும் சக்தி சார்ந்த செயல்களை விழிப்புணர்வோடு நிகழ்த்துவது இல்லை. எனவே, ஏதோ ஒரு சக்தி வேறெங்கோ இருந்து எல்லா நேரங்களிலும் தாக்கிக் கொண்டிருப்பது போல தோன்றுகிறது. ஏதாவது கெட்டதாக நிகழ்ந்தால், "கேடு வந்தது" என்று கூறுவார்கள். ஏதாவது நன்மையாக நிகழ்ந்தால், "நான் அதிர்ஷ்டசாலி" என்று கூறுவார்கள். வாழ்க்கை எப்போதுமே தற்செயலாக நிகழ்வதைப் போலவே தோன்றும். ஆனால் வாழ்க்கை தற்செயலாக நடப்பது அல்ல. நம் இருப்பின் உடல் சார்ந்த பரிமாணமானது, எப்போதுமே ஒரு காரணகாரியத்தோடு தான் நிகழ்கிறது. பெரும்பாலான மனிதர்களுக்கு தங்கள் வாழ்வில் விளைந்துள்ளவைகள் - துன்பமாக இருந்தாலும் இன்பமாக இருந்தாலும் - அவற்றுக்கான காரணம் பற்றி அறிய முடியவில்லை, அவ்வளவே! ஆனால் காரணம் இல்லாமல் எந்த ஒரு காரியமும் நிகழாது. அதுவே உடல் சார்ந்த நம் இருப்பின் தன்மை.

அடிப்படையாக, கர்மா என்பது செயலை குறிக்கிறது - ஏற்கனவே நிகழ்ந்துவிட்ட செயல் - அது கவனத்தோடும் நிகழ்ந்திருக்கலாம் அல்லது கவனம் இல்லாமலும் நிகழ்ந்திருக்கலாம். இந்த கர்மா பல்வேறு நிலைகளில் உள்ளது. ஆனால் அடிப்படையில் அவை நமக்குள் நினைவு பதிவுகளாக உள்ளன.

மொத்தமுள்ள உங்கள் நினைவு பதிவுகளில் ஒரு சிறு துளியளவு மட்டுமே உங்கள் விழிப்புணர்வில் உள்ளது. உங்களுக்கு அற்புதமான நினைவாற்றல் இருந்தாலும்கூட, உங்கள் உடலில் நீங்கள் சுமக்கும் நினைவுகளோடு ஒப்பிட்டால், உங்கள் மூளையில் நீங்கள் கொண்டுள்ள நினைவுகள் மிகக் குறைந்த அளவுதான். உங்களின் மூன்று தலைமுறைக்கு மூத்த பூட்டி எப்படி இருந்தார் என்பதை இப்போது உங்களால் நினைவுபடுத்திக்கொள்ள முடியாது என்பது உங்களுக்கே தெரியும். ஆனால் அவரின் மூக்கு இப்போது உங்கள் முகத்தில் அமர்ந்துள்ளது. ஆயிரம் காலத்துக்கு முந்தைய உங்கள் மூதாதையரின் தோல் அமைப்பு இப்போதும் உங்களது உடலில் வெளிப்படுகிறது. மரபணு, பரிணாம வளர்ச்சி மற்றும் பல வெவ்வேறு நிலைகளில் இருக்கும் நினைவுகளைத்தான் நாம் கர்மா என்று குறிப்பிடுகிறோம். உங்களது ஒவ்வொரு செயலின் எச்சமாக வெளிப்படும் தாக்கம்தான் கர்மா. அவை எல்லாமும் நம் கவனத்தில் இல்லை என்றாலும், அதன் பங்கு நமது வாழ்வில் நடந்தேறுகிறது.

கர்மா என்றால் அனைத்தும் முடிந்துவிட்டது என்று அர்த்தமல்ல

கர்மா என்று சொன்னாலே எல்லாமே முடிந்துவிட்டது என்று அர்த்தமல்ல - இருப்பதிலேயே மிகவும் துடிப்போடு உங்கள் வாழ்வை அணுகுவதற்கான வழி இதுதான். "என் வாழ்வு என் கர்மாவால் நடக்கிறது" என்பதன் பொருள் "என் வாழ்வு நான் நிகழ்த்துவது, வேறெவரும் என் வாழ்வை நிகழ்த்தவில்லை" என்பதுதான். இந்த உலகம் உங்களை நோக்கி எதை எறிகிறது என்பது எப்போதும் உங்கள் கைகளில் இல்லை. பத்தாயிரம் ஆண்டுகளுக்கு முன்பு, அவர்கள் உங்கள் மேல் ஒரு கல்லை வீசியிருக்கக்கூடும். ஒரு ஆயிரம் ஆண்டுகளுக்கு முன்பு, ஒரு ஈட்டியை வீசியிருக்கக்கூடும். இன்று அவர்கள் உங்கள் மேல் வாட்ஸ்ஆப் தகவல்களை வீசக்கூடும்.

உலகம் உங்கள் மேல் என்ன வீசுகிறது என்பது நாம் வாழும் காலத்தின் விளைவாக நிகழ்வது. ஆனால் நம் வாழ்வை நாம் எவ்வாறு உணர்கிறோம், எந்த அளவுக்கு உணர்கிறோம் என்பது முற்றிலுமாக நாம் உருவாக்குவது. உலகம் நம்மை நோக்கி என்ன வீசுகிறது என்பதை நம்மால் எப்போதும் தீர்மானிக்க முடியாது, ஆனால் அதைக் கொண்டு நாம் என்ன உருவாக்குகிறோம் என்பது நூறு சதவிகிதம் நம் கையில் இருக்கிறது. இதுதான் கர்மா என்பதன் பொருள் - உங்கள் வாழ்வை உங்கள் கட்டுப்பாட்டில் எடுத்துக் கொள்கிறீர்கள். இன்னும் விழிப்புணர்வான ஒரு செயல்முறையாக உங்கள் கர்மாவை நீங்கள் நிகழ்த்தும்போது, உங்கள் விதியை நிர்ணயிப்பவரே நீங்கள்தான் என்றாகிறீர்கள்.

ஆசிரியர் குறிப்பு: இந்தத் தலைப்பில் மேலும் ஆழமாக ஆராய விரும்புகிறீர்களா? தன்னுடைய சமீபத்திய ஆங்கில நூலான "Karma - A Yogi’s Guide to Crafting Your Destiny" மூலம் சத்குரு கர்மா என்றால் என்ன, அதன் கருத்தாக்கங்கள் கொண்டு நம் வாழ்வை எவ்வாறு மேம்படுத்துவது ஆகியவற்றைப் பற்றி விளக்குகிறார். மேலும், சூத்திரங்கள் குறித்தும் கூறுகிறார் - சவாலான இந்த உலகில் நம் வழியை கண்டறிந்து நம் விதியை நாமே தீர்மானிக்கும் படிப்படியான வழிகாட்டுதல்கள் இவை.

சமீபத்தில் நடந்த "இன் த க்ரேஸ் ஆஃப் யோகா" நிகழ்வின்போது சத்குரு, இன்றைக்கு மனிதர்கள் தங்களுக்குத் தாங்களே உருவாக்கிக் கொள்ளும் அடிப்படையான தடைகளையும், ஏற்பாடுகளையும் வெளிப்படுத்துகிறார். அவை அவர்களது முழுமையான சாத்தியத்தை அடையவிடாமலும், அவர்களின் வாழ்க்கையை இயன்ற அளவுக்குச் சிறப்பாக உணர்வதையும் தவிர்க்கின்றன என்கிறார். மேலும் இதுபற்றிக் கூறுகையில் சத்குரு, காலம் மற்றும் உடல்தன்மையான இருப்பின் செயல்பாடுகளை விளக்கியதோடு, பஞ்சபூதங்களின் மீது சிறிதளவு ஆளுமை கொண்டு வந்தாலும், அது எவ்வாறு உங்களை விடுவிக்கிறது என்றும் கூறுகிறார்.

உடல்தன்மையான படைப்பின் விளையாட்டு மேடை

இந்த உடல், காலம் என்னும் பரிமாணத்தில் இருக்கிறது. காலம் என்னும் மேடையின் மீதுதான் அது விளையாடுகிறது. ஆனால், விளையாட்டின் அளவும், தன்மையும் பஞ்சபூதங்களின் மீது நமக்கு இருக்கும் நெகிழ்வுத்தன்மை, ஆளுமை மற்றும் புரிதலைச் சார்ந்து இருக்கிறது. நமது புரிதலில், காலம் என்றால் சுழற்சி இயக்கங்கள் என்பது பொருள். அது நிலவாக இருந்தாலும், பூமியாக, சூரியனாக அல்லது ஒரு கடிகாரமாக இருந்தாலும், காலம் என்றால் சுழற்சி இயக்கம் என்பதே நமது கருத்தாக இருக்கிறது. வெவ்வேறு சுழற்சிகளை, காலத்தின் வெவ்வேறு அலகுகளாக நமது மனங்கள் குறித்துக்கொள்கின்றன.

நீங்கள் இங்கு உடல்தன்மையான ஒரு உயிரினமாக இருக்கும் வரை அது உண்மையாக இருக்கிறது. ஆனால், மனிதராய் இருப்பதன் முக்கியத்துவம் மற்றும் தனிச்சிறப்பு என்னவெனில், இந்த உலகில் செயல்படுவதற்கு உடல் சார்ந்த தன்மையை நாம் ஒரு வாகனமாக உபயோகிக்கிறோமா, அல்லது மற்ற எந்த உயிரினங்களையும் போலத்தான் நாமும் இருக்கிறோமா? இப்போதெல்லாம், பூச்சிகள், பறவைகள், மீன் மற்றும் பல்வேறு உயிரினங்களின் அற்புதமான புகைப்படங்கள் இருக்கின்றன. அதனால் மனிதர்களை விட, மற்ற உயிரினங்கள் மிகுந்த அழகுடன் இருக்கின்றன என்று எண்ணத் தொடங்கிவிட்டார்கள்.ஆனால் பிறகு, பல லட்சக்கணக்கான வருடங்கள் எடுத்துக்கொண்டு, உங்களை இந்த இடத்திற்குக் கொண்டு வந்திருப்பதில் பரிணாம வளர்ச்சிக்கு என்ன முக்கியத்துவம் இருக்கிறது?